2 Corintios 6 - Kaqchiquel Bible

¹ Roj kan junan rik'in ri Dios niqaben ri samaj chi'ikojolil rix, kan niqachilabej k'a chiwe chi man tiben chi xa man jun rejqalen ri rutzil ri Dios ri ruya'on chik pe chiwe.

² Y chirij k'a ri' nich'on-wi ri Dios toq nubij:*f2* Kan pa ruq'ijul k'a xink'uluba-pe ri ich'owen, y chupan ri q'ij richin kolotajik, kan xixinto', nicha'. Y jare' k'o chik ri ruq'ijul richin ri utzil ri'; ja q'ij re' richin ri kolotajik.

³ Y richin chi man ek'o winaqi' ri yetzaq ta qoma roj, kan niqatej k'a qaq'ij chi man jun tilitej chiqij, richin man tiyoq'otej ri samaj ri yojtajin chubanik.

⁴ Pa ruk'exel ri', kan niqak'ut k'a qi' chi oj rusamajela' ri Dios. Kan niq'alajin-wi chi oj rusamajela' ri Dios roma k'iy koch'onik k'o qik'in, qak'owisan tijoj-poqonal, oj q'axineq toq k'o k'iy ri nik'atzin chiqe, chuqa' kan oj q'axomarineq.

⁵ Roj qak'ulun ch'ayikil, oj ya'on pa taq cárcel, oj qajineq pa kiq'a' winaqi' ri e q'aq'arineq qoma roj, oj samajineq janila, qakoch'on waran y wayjal.

⁶ Kan niq'alajin-wi chi oj rusamajela' ri Dios roma ch'ajch'oj ri qak'aslen, qetaman ri qitzij, nim qánima, oj utz kik'in ri winaqi', ri ajowabel ri k'o qik'in kan qitzij, k'o ri Loq'olej Espíritu qik'in,

⁷ qik'in k'a roj k'o ri qitzij ch'abel, y k'o chuqa' ri ruchuq'a' ri Dios. Kan ja wi ri ruch'ajch'ojil ri qak'aslen ri niqakusaj richin niqato-qi' toq ek'o yeyakatej-pe chiqij, y richin chi niqachojmirisaj ri man utz ta.

⁸ Ek'o k'a winaqi' ri yeya'on qaq'ij, y ek'o chuqa' ri xa kan yojkitorij. Ek'o ri jebel yech'on chiqij, y ek'o chuqa' ri xa itzel yech'on chiqij. Y ek'o chuqa' ri yebin chi oj q'olonela', stape' roj ja ri qitzij ri niqabij chike.

⁹ Niban chiqe chi achi'el chi man etaman ta qawech, stape' xa kan jebel etaman qawech. Banon chiqe chi achi'el oj kaminaqi' chik, jak'a xa k'a oj k'es na. K'iy ruk'ayewal taqon-pe pa qawi', jak'a kan k'a k'o na qak'aslen.

¹⁰ Kan achi'el yojbison yojtzu'un, jak'a xa kan yojkikot. Stape' ojk'o pa meba'il, jak'a kan ek'o ri xebeyomer qoma roj. Y stape' chuqa' kan man jun ok k'o qik'in, xa kan yojtikir niqabij chi kan ronojel k'o qik'in.

¹¹ Roj kan man jun k'a ri man ta qabin chiwe rix qach'alal ri ixk'o pa Corinto. Kan ronojel k'a ri k'o pa qánima xqabij yan chiwe.

¹² Roj man qak'ek'en ta k'a ri qajowabal chiwe rix, jak'a rix xa man keri' ta ibanon qik'in roj.

¹³ Roma ri' yixinpixabaj achi'el ta kan ix walk'ual, y ninbij k'a chiwe chi tinimirisaj ri iwánima chiqajowaxik roj.

Tichajij iwi' chuwech ronojel ri xa man ch'ajch'oj ta

¹⁴ Rix man tijunamatej-iwech kik'in ri winaqi' ri man kikuquban ta kik'u'x rik'in ri Cristo. Roma xa kan man nuk'uaj ta ri' jun k'aslen choj rik'in jun ri xa man choj ta. Ri nibiyin pa saqil man nitikir ta nibiyin rik'in jun ri nibiyin pa q'equ'm.

¹⁵ ¿Achi'el ta k'a toq ri Cristo nijunamatej ruwech rik'in ri Belial?*f3* ¿O kan man jun ta kami rukojol jun nimanel rik'in jun ri xa man nimanel ta?

¹⁶ ¿Kan yek'oje' ta kami ri wachibel chupan ri rachoch ri Dios? Roma kan ja roj ri oj rachoch ri k'aslik Dios. Roma ri' rija' kan keri' wi k'a rubin:*f4* Jantape' k'a xkik'oje' chi'ikojol y kan ja yin ri i-Dios y rix kan ix nutinamit, nicha'.

¹⁷ Chuqa' rubin ri ajaw:*f5* Kixel-pe chikikojol ri man e wichin ta yin. Tich'ara-pe-iwi', y man tichop-apo ri xa tz'ilolej k'aslen, richin chi yin yixink'ul.

¹⁸ *f6*Yin xkinok k'a tata'aj iwichin rix, y rix xkixok numi'al-nuk'ajol, nicha' ri ajaw ri k'o ronojel uchuq'a' pa ruq'a'.