2 Corintios 5 - Kaqchiquel Bible

¹ Qetaman k'a chi ri qach'akul xa achi'el ok jun jay banon rik'in tzieq, re chuwech re ruwach'ulew, ja k'a toq xtiken re ch'akulaj re' kan xtiqak'ul chik jun qachoch rik'in ri Dios, ri kan ja rija' ri banayon, kan richin jantape' y ja ri chila' chikaj k'o-wi.

² Wakami kan yojjilo, roma kan janila k'a rayibel qik'in chi yojok yan ta chupan ri jun chik qachoch ri k'o chila' chikaj.

³ Roma ri' niqarayij yan k'a ri k'ak'a' qach'akul achi'el jun k'ak'a' tzieq, richin man niqana' ta chi achi'el oj ch'anel.

⁴ Roj kan yojjilon y niqak'owisaj tijoj-poqonal rik'in re ch'akulaj re qak'uan, jak'a man niqajo' ta chi niqaya' yan kan. Ri niqajo' ja ri nipe yan ta ri k'ak'a' qachoch, richin keri' ri ch'akulaj ri xa kamel nijalatej yan ta rik'in ri man kamel ta.

⁵ Ronojel re' kan ja ri Dios banayon, y ruya'on ri Loq'olej Espíritu chiqe richin retal chi kan qitzij chi keri' xtibanatej.

⁶ Roma ri' roj kan kuqul qak'u'x jantape', roma qetaman chi re k'a ojk'o na chupan re ch'akulaj re', man jani ojk'o ta chupan ri k'ak'a' qachoch rik'in ri ajaw Jesús.

⁷ Re wakami qachapon bey stape' xa man niqatz'et ta ruwech ri Cristo, jak'a kan qakuquban qak'u'x rik'in.

⁸ Kan qakuquban-wi qak'u'x rik'in, y janila k'a niqajo' chi man ta chik ojk'o chupan re ch'akulaj re', y kan rik'in ta chik rija' ojk'o-wi.

⁹ Roma ri' kan niqatej qaq'ij chi niqaben ri rurayibel ri Dios richin chi yojqa' chuwech, stape' k'a ojk'o chuwech re ruwach'ulew, o rik'in chik rija'.

¹⁰ Niqaben re' roma kan qonojel roj k'o chi yojapon na chuwech ri ruq'atbal-tzij ri Cristo, y chiqajujunal niqak'ul na k'a rajel-ruk'exel ri qabanobal toq xojk'oje' chupan re ch'akulaj chuwech re ruwach'ulew; wi utz xqaben o man utz ta.

Rutzijol richin ri uxlanibel-k'u'x rik'in ri Dios

¹¹ Roj kan k'o-wi k'a rukiy y rejqalen ri ajaw chiqawech, roma ri' yojsamej richin chi ek'o ta k'a más ri nikikuquba' kik'u'x rik'in. Ri Dios kan retaman-wi k'a qawech roj, y ninwoyobej chi keri' ta chuqa' rix.

¹² Man k'a tich'ob chi yojtajin chubixik keri' chiwe xaxe richin chi yojik'ul ta. Roj xaxe niqajo' niqaya' q'ij chiwe chi tina' janila kikoten pa taq iwánima qoma roj. Richin keri' rix yixtikir nipaba-iwi' chikiwech ri nikibananej chi e utz, jak'a ri pa taq kánima xa man keri' ta.

¹³ Wi rix nich'ob chi roj oj ch'ujerineq, kan ja ri Dios ri etamayon. Y wi nich'ob chi oj raxneq, kan k'o k'a utz xtuk'en-pe chiwe rix.

¹⁴ Roj kan ja ri ajowabel richin ri Cristo ri nibanon chiqe chi niqanimaj rutzij. Kan kuqul k'a qak'u'x chi pa qak'exel qonojel roj toq rija' xken. Y roma ri' roj kan xojken-wi k'a rik'in rija'.

¹⁵ Rija' kan qoma wi k'a qonojel toq xken, richin chi man xaxe ta oj k'es qoma roj, xa kan richin yojk'ase' roma ri xken y xk'astej qoma roj.

¹⁶ Roj re wakami y ri chiqawech-apo man jun chik wineq ri xtiqatzu', achi'el nikitzu' ri aj-ruwach'ulew. Stape' roj chuqa' xqach'ob chirij ri Cristo, chi rija' xa achi'el xabachike wineq. Jak'a re wakami man chik keri' ta niqach'ob chirij.

¹⁷ Kan xabachike k'a wineq ri rukuquban chik ruk'u'x rik'in ri Cristo, kan xok yan jun k'ak'a' wineq. Ronojel ri richin ojer xa xekanej yan kan, y wakami ronojel chik k'ak'a'.

¹⁸ Y ronojel k'a re', kan rik'in ri Dios xalex-wi-pe. Kan rurayibel k'a rija' chi roj junan ta qawech rik'in, y xukusaj ri Cristo richin xuben ri samaj ri'. Y ri samaj ri ruya'on chiqe roj, ja ri niqaya' ri ruchojmilal chike ri winaqi' ri rubanik chi nijunamatej kiwech rik'in ri Dios.

¹⁹ Ri Dios xuben chi qonojel roj winaqi' xjunamatej qawech rik'in roma ri rusamaj ri Cristo, y xojrukuy chire ri qamak. Y chiqe roj xuchilabej chi k'o chi niqaq'alajirisaj re jun utzilej rutzijol re'.

²⁰ Roma ri' roj kan yojch'on pa rubi' ri Cristo, y kan achi'el ja ta ri Dios ri nich'on iwik'in qoma roj. Niqak'utuj k'a utzil chiwe pa rubi' ri Cristo chi tijunamatej-iwech rik'in ri Dios.

²¹ Ri Cristo kan man jun bey k'a xmakun, jak'a kan xban chire roma ri Dios chi achi'el xa ta jun aj-mak, richin chi qonojel roj yojk'ulun ta chuwech ri Dios chi man jun qamak.