2 Corintios 4 - Kaqchiquel Bible

Ri rusaqil ri Dios nusaqirisaj ri q'equ'm

¹ Roma ri' roj man yojq'itej ta chubanik ri rusamaj ri Dios ri ruya'on chiqe roma ri rutzil.

² Roj man niqaben ta ri banobel ri man pa saqil ta yeban-wi y xa e richin k'ix. Man yeqaq'ol ta ri winaqi'; man niqajel ta chuqa' rubanik ri ruch'abel ri Dios ri niqabij. Roj kan ja wi k'a ri qitzij ri niqaq'alajirisaj y ri' kan nuben k'a chi xabakuchi yojk'ul-wi. Ri Dios kan nutz'et k'a pe chi keri'.

³ Jak'a ek'o ri xa man niq'ax ta chikiwech ri utzilej ch'abel richin kolotajik ri niqatzijoj, y ri' xaxe chikiwech ri winaqi' ri yebeqaqa chupan ri kamik richin jantape',

⁴ ri man kikuquban ta kik'u'x rik'in ri Cristo. Y ri xbanon keri' chike, ja ri Itzel-Wineq ri k'o pa ruwi' re ruwach'ulew. Kan e rumoyirisan k'a richin man niq'ax ta chikiwech ri utzilej ch'abel ri niq'alajirisan ruq'ij-ruk'ojlen ri Cristo, ri xoruq'alajirisaj ri Dios chiqawech, roma rija' kan Dios wi.

⁵ Y roj kan niqaq'alajirisaj k'a chi ri Jesucristo jari' ri ajaw, y man ja ta roj. Roj xaxe k'a oj isamajela' rix; y re' kan roma k'a ri Jesús toq roj keri' niqaben iwik'in.

⁶ Pa rutikeribel, ri Dios xubij chi tik'oje' saqil ri pa q'equ'm. Y ja chuqa' rija' ri nisaqirisan ri pa taq qánima, richin chi roj kan tiqasaqirisaj y tiqaq'alajirisaj k'a chikiwech ri winaqi' ri ruq'ij-ruk'ojlen ri Dios, ri kan nitz'etetej-wi rik'in ri Jesucristo.

Ri uchuq'a' ri k'o qik'in, rik'in ri Dios peteneq-wi

⁷ Ri ruwaq'ijaj ri ruya'on-pe ri Dios chiqe, kan jun beyomel-wi, jak'a roj ri oj rukusan xa maneq ok qejqalen. Xa oj junan ok rik'in jun ulew leq, y re' richin chi tiq'alajin chi ri nimalej uchuq'a' ri k'o qik'in, rik'in ri Dios peteneq-wi y xa man qik'in ta roj.

⁸ Roma roj kan k'o k'a ri niqak'uluwachila', jak'a kan man niqamalij ta qak'u'x. Yojk'oje' pa latz', jak'a man nisach ta qak'u'x.

⁹ Xabakuchi k'a yojapon-wi, ri winaqi' man utz ta yojkitz'et, jak'a man jun bey qayon ta ojk'o. kan oj qajineq chuqa' pa kiq'a', jak'a man e tikirineq ta oj kikamisan.

¹⁰ Roj, xabakuchi yojapon-wi, kan chuwech-wi k'a ri kamik ojk'o-wi roma ri Jesús, richin keri' niq'alajin chi roj kan niqak'ul-wi k'a chuqa' qak'aslen achi'el ri ruk'aslen rija' wakami.

¹¹ Roma roj ri k'a oj k'es na, kan jantape' k'a ojk'o chuwech ri kamik, roma niqaben rusamaj ri ajaw Jesús. Richin keri' ri ruk'aslen rija' kan niq'alajin ta k'a chuqa' ri pa taq qak'aslen roj, stape' xa oj winaqi' y oj kamel.

¹² Roj kan niqatz'etela' k'a ruwech ri kamik. Jak'a rix re wakami xiwil yan ik'aslen.

¹³ Y roma kuqul qak'u'x rik'in ri Dios, niqatzijoj ri achike qaniman. Niqaben k'a achi'el ri tz'ibatel kan chupan ri ruch'abel ri Dios toq nubij:*f1* Kan kuqul-wi nuk'u'x, roma ri' xich'on, nicha'. Y roma ri' roj chuqa' niqakuquba' qak'u'x rik'in rija' y niqatzijoj.

¹⁴ Qetaman chi ri xk'ason-el richin ri ajaw Jesús chikikojol ri kaminaqi', ja chuqa' ri' ri xqojk'ason-el roj. Roma roj jun qabanon rik'in ri ajaw. Y roj qachibilan-qi' iwik'in rix xqojberuya' chila' chikaj.

¹⁵ Y roma k'a niqajo' chi rix niwil ri utzil ri', roma ri' toq roj qakoch'on janila tijoj-poqonal. Y rik'in ri' kan janila ta e k'iy ri yematioxin chire ri Dios y nikiya' ta ruq'ij-ruk'ojlen.

Oj k'es roma ri qakuqubabel-k'u'x

¹⁶ Jari' ri nibanon chiqe roj chi man jun bey niqamalij qak'u'x, stape' ta ri ch'akulaj ri qak'uan kan nuna-wi janila. Jak'a ri qa-espíritu, pa ruk'exel chi nik'is ta qa ruchuq'a', xa q'ij-q'ij más ruchuq'a' nik'oje-el.

¹⁷ Roma ri tijoj-poqonal ri niqak'owisaj, xa ti juba' ok y xa q'axel. Jak'a re' kan nuben chiqe chi nik'oje' qaq'ij-qak'ojlen ri xa kan más wi nim y man jun bey xtik'is.

¹⁸ Roj kan man beneq ta k'a qánima chirij ri yeqatz'etela' pa ruwi' re ruwach'ulew; roj kan qatzuliben-apo ri man e tz'etel ta. Roma ri e tz'etel, xa ronojel e q'axel, jak'a ri xa man e tz'etel ta, kan e richin-wi jantape'.