2 Corintios 3 - Kaqchiquel Bible

Ri e taqon roma ri Cristo nikisamajij ri k'ak'a' jikibel-tzij

¹ Ri ch'abel ri xinbij chiwe, man nel ta chi tzij chi re' achi'el xa ta jun wuj richin yojik'ul. Ni man nik'atzin ta k'a chi rix nitz'ibaj na el jun wuj ri nubij chi qojk'ul koma ri qach'alal ri ek'o pa ch'aqa' chik tinamit, achi'el nikiben ch'aqa' chik.

² Roma xaxe rik'in nitz'etetej ri utzilej ik'aslen rix, jari' ri nibin chi utz chi yojk'ul koma konojel. Y ri k'aslen ri' pa taq qánima roj tz'ibatel-wi y man chuwech ta wuj, y kan nitz'etetej k'a koma konojel ri winaqi'.

³ Ri qawuj roj ri nibin chi kan qojk'ul, kan ja wi rix, y ja ri Cristo ri banayon-pe rik'in ri Loq'olej Espíritu richin ri k'aslik Dios. Jak'a man rik'in ta tz'ibabel banon-wi, ni man chuwech ta chuqa' tz'alem taq abej; xa kan chuwech k'a ri iwánima.

⁴ Y roj kan kuqul qak'u'x rik'in ri Dios chi kan keri' wi, roma ri samaj ri xuben ri Cristo.

⁵ Man niqabij ta chi roma roj k'iy yojtikir niqaben, man keri' ta. Jak'a roma ri Dios kan nuya' quchuq'a' chubanik.

⁶ Ja rija' k'a ri xbanon chiqe richin niqasamajij ri jun k'ak'a' jikibel-tzij. Ri jikibel-tzij ri' man tz'iban ta chuwech tz'alem taq abej. Xa kan tz'iban k'a rik'in ri Espíritu. Roma ri jikibel-tzij ri tz'iban chuwech tz'alem taq abej man nuya' ta k'aslen. Jak'a ri tz'iban rik'in ri Espíritu, kan nuya-wi k'aslen.

⁷ Toq xban ri nabey jikibel-tzij, xtz'ibex chuwech tz'alem taq abej y kan xq'alajin ri ruq'ij-ruk'ojlen ri Dios, y ri ruwech ri Moisés kan xch'ich'an. Y stape' ri saqil ri' xa beneq-qa ruk'isinen, ri winaqi' judío kan man xetikir ta xkitzu' ruwech ri Moisés. Y ri nabey jikibel-tzij ri' xa xuk'en-pe ri kamik.

⁸ Jak'a ri k'ak'a' jikibel-tzij ri tz'iban rik'in ri Loq'olej Espíritu, nuk'en-pe más ruq'ij-ruk'ojlen ri Dios.

⁹ Roma wi xa kan k'o ruq'ij ri jikibel-tzij ri nibin chi ri winaqi' kan ek'o chuxe' ri ruk'ayewal ri Dios, kan más wi k'a ruq'ij ri k'ak'a' jikibel-tzij, ri kan nuben chiqe chi man jun qamak.

¹⁰ Roma ri' ri xk'oje' ruq'ij pa nabey, wakami man jun ok ruq'ij chuwech ri k'ak'a' jikibel-tzij.

¹¹ Roma ri' wi ri jikibel-tzij ri xa xk'is kan, xk'oje' ruq'ij, ri k'ak'a' jikibel-tzij ri man k'isel ta, kan k'o-wi k'a más ruq'ij.

¹² Roma ri k'ak'a' jikibel-tzij ri' ri man k'isel ta, k'o oyobenri'il qik'in, y roma ri' kan man niqapoqonaj ta niqatzijoj chike ri winaqi'.

¹³ Y roma man k'isel ta, man nik'atzin ta chik chi niqaben achi'el xuben ri Moisés, ri xutz'apej ruwech rik'in jun tzieq, richin chi ri ruwinaq man nikitz'et ta toq nik'is-qa ri ruq'ij-ruk'ojlen ri Dios, ri k'o rik'in.

¹⁴ K'a re wakami ri winaqi' judío xa kan tix-tix ri kich'obonik, xa kan achi'el k'a tz'apel na kiwech toq nisik'ix ri ojer jikibel-tzij. Y ri nelesan ri tz'apebel-kiwech kan xaxe ri Cristo.

¹⁵ Y rije' kan k'a ke na ri' kibanon re wakami. Toq nisik'ix ri nabey jikibel-tzij ri ruya'on kan ri Moisés, xa kan k'a tz'apel na ri kich'obonik.

¹⁶ Jak'a toq nikikuquba' kik'u'x rik'in ri ajaw Jesucristo, jari' toq nelesex-el ri tz'apeyon ri kich'obonik y niq'ax chikiwech.

¹⁷ Roma toq nikik'ul ri ajaw Jesucristo, ja ri ru-Espíritu rija' ri nikik'ul. Y ri akuchi nik'oje-wi ri ru-Espíritu rija', kan yekolotej chuxe' ri nabey jikibel-tzij.

¹⁸ Roma ri' qonojel roj ri qakuquban qak'u'x rik'in ri Jesucristo, man tz'apel ta chik qach'obonik. Xa kan niq'alajin k'a ri ruq'ij-ruk'ojlen rija' qik'in roj, y ri ru-Espíritu nuben chiqe chi yojok achi'el rija'.