2 Corintios 13 - Kaqchiquel Bible

Ri ruk'isibel taq ch'abel

¹ Y jare' ri rox bey ri xkinapon chila' iwik'in. Xtiqachojmirisaj k'a ronojel xa rik'in ta e ka'i' o e oxi' xkebin ri kitz'eton chikij chikijujunal ri e qajineq pa mak.

² Toq xik'oje' ri chila' iwik'in ri pa ruka'n bey, kan xinbij yan kan chike chi wi k'a ke na ri' nikiben toq xkinapon chik jun bey, kan man xkekolotej ta chuwech ri ruk'ayewal ri xtiqaya' pa kiwi'. Y kan keri' chuqa' ninbij chiwe chi kan man ninkuy ta chik kimak ri k'a yemakun na.

³ Toq yin xkinapon iwik'in, rix xtitz'et chi ri Cristo kan xtuk'ut-ri' chiwech woma yin. Chuqa' xtitz'et chi rija' kan k'o-wi ruchuq'a'.

⁴ Ri Cristo xuya' ri' chuwech ri cruz, achi'el xa ta maneq ruchuq'a', jak'a wakami k'es roma ri nimalej ruchuq'a' ri Dios. Y keri' roj, kan maneq-wi quchuq'a' achi'el ri Cristo toq xken. Jak'a chuqa' kan xqojk'ase' rik'in ri Cristo, roma ri ruchuq'a' ri Dios richin xkixqasamajij rix.

⁵ Jak'a re wakami, kan titzu-qa-iwi', wi kan qitzij chi kuqul ik'u'x rik'in ri Cristo. Titz'eta-qa iwi' jebel. ¿Man iwetaman ta k'a chi ri Jesucristo k'o pa taq iwánima? ¡Xaxe wi man iya'on ta kan chi nikuquba-ik'u'x rik'in!

⁶ Y yin ninwoyobej k'a chi rix xtiwetamaj ta chi roj kan oj k'ulun chik roma ri Dios.

⁷ Roj kan niqak'utuj-wi k'a chire ri Dios chi yixruto' ta y man ta jun etzelal niben. Re' man niqaben ta xaxe richin chi rix ninabej chi kan oj k'ulun chik roma ri Dios. Ri niqajo' chiwe rix ja ta chi ja ri utz ri niben, stape' man xtiq'alajin ta chiwech chi roj kan oj k'ulun chik roma ri Dios.

⁸ Ri niqaben roj kan xaxe k'a richin nik'iy ri qitzij y re' kan man yojtikir ta niqaq'et rutzijoxik.

⁹ Y roma ri' roj kan yojkikot toq rix k'o iwuchuq'a' stape' roj maneq uchuq'a' qik'in. Roj kan niqak'utuj k'a chire ri Dios chi rix ix tz'aqatineq ta rik'in ri ik'aslen.

¹⁰ Y richin k'a chi man rik'in ruk'ayewal yibech'on toq xkinapon ri chila' iwik'in, roma ri' nintz'ibaj yan el re wuj re' chiwe, stape' yin kan k'o-wi uchuq'a' ri ya'on chuwe roma ri ajaw Jesucristo. Y re' richin chi yixinto' richin yixk'iy rik'in ri ik'aslen y man richin ta chi yixinwulaj.

¹¹ Wach'alal, pa ruk'isibel ninbij chik el chiwe chi kan tik'oje' kikoten ri pa taq iwánima, titija' iq'ij chi ri ik'aslen kan tz'aqatineq ta, tikuqubala' ik'u'x chi'ijujunal, jun iwech tibana', y man jun ta oyowal chi'ikojol. Richin keri' ri Dios kan xtik'oje' iwik'in, roma xaxe rik'in rija' nipe-wi ri ajowabel y ri uxlanen.

¹² Kan tiq'ejela' k'a iwi' chi'ijujunal rik'in jun loq'olej tz'ubanik.

^13-14 Konojel k'a ri qach'alal ri ek'o wawe', nikiteq rutzil-iwech. Wach'alal, ri nurayibel yin ja k'a chi ri rutzil ri ajaw Jesucristo y ri ajowabel richin ri Dios ri xtik'oje' ta iwik'in. Y chuqa' ninrayibej chiwe chi rix junan ta iwech roma ri Loq'olej Espíritu. Kan keri' ta k'a.