2 Corintios 11 - Kaqchiquel Bible

Ri Pablo y ri xa man e qitzij ta e taqon roma ri Cristo

¹ Nink'utuj k'a utzil chiwe chi kinikoch'o' chik juba', rik'in ri nuch'ujerik, roma k'a k'o ri ninwajo' ninbij chiwe.

² Kan yixinchajij-wi k'a rik'in ri ik'aslen achi'el nuben ri Dios iwik'in. Yin ninwajo' chi rix yixapon ta rik'in ri Cristo rik'in jun k'aslen ch'ajch'oj, achi'el ta jun xten ri kan ch'ajch'oj y nibek'ule' yan rik'in jun ala' ri xtok rachijil.

³ Jak'a yin nuxibin-wi', roma man xa tibanatej iwik'in achi'el xbanatej rik'in ri Eva ojer kan, ri xq'olotej roma ri kumetz rik'in ri jebelej taq ruch'abel. Y rik'in juba' xa keri' xtiben rix, chi xa rik'in jun niya'on ina'oj, nijalatej ri ich'obonik. Y ri' nuben chiwe chi niya' kan ri Cristo.

⁴ Roma rix xa janila yixkikot rik'in jun ri napon iwik'in y xa man ja ta ri Jesús ri xqatzijoj chiwe roj ri nutzijoj chiwe. Y keri' chuqa' yalan yixkikot rik'in toq nusuj jun chik espíritu chiwe y xa man ja ta ri' ri xik'ul pa nabey. Y kan yixkikot rik'in toq nubij chi k'o jun chik ch'abel richin kolotajik ruk'uan chiwe.

⁵ Rix nibij chi kan ek'o ri e nima'q taq rusamajela' ri Dios chi'ikojol. Jak'a yin man más ta in ko'ol chikiwech rije'.

⁶ Roma stape' ta ri nuch'abel man kan ta janipe' rubanik toq yich'on, jak'a kan wetaman-wi ri qitzij. Y re' kan iwetaman chuqa' rix, roma xabachike y xabakuchi keri' qabanon, kan qabin-wi ri ruch'abel ri Dios.

⁷ ¿Itzel kami xinben chi man jun wajel xink'utuj chiwe toq xinapon iwik'in richin xintzijoj ri utzilej ruch'abel ri Dios ri nik'amon-pe kolotajik. Toq xinqasaj-wi' yin richin xinnimirisaj iq'ij rix?

⁸ Roma yin, richin chi xinben ri rusamaj ri Dios chila' iwik'in, ri wajel xinwelesaj k'a pe kik'in ri ch'aqa' chik molaj qach'alal ri ek'o pa ch'aqa' chik tinamit.

⁹ Y toq yin k'o xk'atzin chuwe ri chila' chi'ikojol, man jun chiwe rix ri xinya' ta ejqa'n chirij y xink'utuj ta chire ri nik'atzin chuwe. Xa ja ri qach'alal aj-Macedonia ri xe'apon wik'in chila' ri xeto'on kan wichin. Xintej k'a nuq'ij chi man xinya' ta ejqa'n chiwij, y k'a ke na ri' ninch'ob ninben re chinuwech-apo.

¹⁰ Y roma ri ruch'abel ri Cristo ri k'o wik'in, ninbij k'a chiwe rix ri ixk'o pan Acaya, chi kan man jun ri xtibanon ta chuwe chi man ta chik yich'on pa ruwi' re'.

¹¹ ¿Achike k'a roma kere' ninbij chiwe? ¿Roma kami chi yin man yixinwajo' ta? Man keri' ta, roma ri Dios retaman chi yin kan yixinwajo-wi.

¹² Y ri nubanon-pe chi nuyon ninq'axaj-wi', kan k'a xtinben na keri', roma ninwajo' ninwelesaj ri ch'obonik ri k'o kik'in ch'aqa' chik ri nikibananej chi e rusamajela' ri Dios. Keri' rije' man xketikir ta xtikibij chi kan e junan qik'in roj.

¹³ Roma rije' kan nikibananej chi e qitzij e taqon roma ri Cristo, jak'a xa e q'olonela'.

¹⁴ Y ri nikiben man k'ak'a' ta, roma xa kan keri' chuqa' nuben ri Satanás; rija' nubananej chi jun utzilej ángel richin saqil y xa man keri' ta.

¹⁵ Xa roma ri', man k'ak'a' ta chi ri e rusamajela' nikibananej chi kan e samajela' richin ri ruchojmilal. Jak'a ri pa ruk'isibel xa xtikik'ul k'a ruk'ayewal, achi'el ri nuk'utuj ri itzel taq kibanobal.

Ri tijoj-poqonal ri ruk'owisan ri Pablo

¹⁶ Y yin ninbij chik k'a jun bey, chi man jun k'a chiwe rix tich'obon chi yin xa in ch'ujerineq. O wi xa keri' ta ri nich'ob rix, kan keri' k'a kinik'ulu', richin yin chuqa' yitikir ninya' juba' nuq'ij chupan ri nuch'ujerik.

¹⁷ Ri ajaw man rubin ta k'a chuwe chi kere' ninben, roma xa nuyon xtinya' nuq'ij. Y ri ch'abel ri xke'el pa nuchi', ruyon ch'obon man ch'obon ta.

¹⁸ Jak'a xa roma ri e janila ri nikibananej chi k'o kiq'ij, roma ri' yin chuqa' keri' ninben.

¹⁹ Kan qitzij wi chi rix wach'alal kan janila chik etamabel k'o iwik'in. Roma ri' kan rik'in kikoten ye'ik'ul xabachike ri xa man jun ketaman.

²⁰ Rix kan jebel k'a e itz'eton ri yebanon chiwe chi yixk'oje' chuxe' kitzij. Kan utz ina'on chi ye'ilon chiwij, chi kan ix kiq'olon y man jun iq'ij chikiwech. Chuqa' kan utz ina'on chi nikiya' q'a' chi'ipalej.

²¹ Jak'a yin kan janila yik'ix, roma roj man xk'oje' ta quchuq'a' richin xojtikir xqaben ta chiwe achi'el re nikiben rije' chiwe re wakami. Jak'a re wakami yin kan xtinkusaj k'a ri nuch'ujerik richin xkich'on. Wi rije' k'o kuchuq'a' richin man nikixibij ta ki' yekibila' ch'abel richin nikinimirisaj kiq'ij, yin chuqa' yitikir ninben keri'.

²² Rije' nikibij chi e hebreo. Yin chuqa' in hebreo. Nikibij chi e winaqi' israelita. Keri' chuqa' yin. Chi e riy-rumam kan ri Abraham. Yin chuqa' keri'.

²³ Chi rije' e rusamajela' ri Cristo. Yin chuqa'. Re ninbij wakami kan achi'el xa ta in ch'ujerineq. Jak'a yin más in samajel ke chikiwech rije'. Yin más nuch'ayik nuk'ulun ke chikiwech rije', roma ni man noqaqa ta chik chinuk'u'x janipe' bey in ch'ayon. Yin más k'iy bey xik'oje' pa cárcel ke chikiwech rije'. Kan k'iy k'a chuqa' bey in apowineq chuwikamik.

²⁴ Ri e aj-raqen chikikojol ri nuwinaq judío wo'o' k'a bey in kich'ayon rik'in tz'um ri k'o k'ix taq ch'ich' chutza'n; kan juwineq belejlajuj jich' k'a xink'ul chi wo'o' bey.*f9*

²⁵ Oxi' bey ri in ch'ayon rik'in xik'a'y. Jun bey xinkik'eq chi abej. Oxi' bey k'a beneq kan chuxe' ya' ri barco ri in beneq-wi. Jun bey chire ri' xik'oje' jun q'ij y jun aq'a' chupan ri palou.

²⁶ K'iy k'a ri e nuk'owisalon-pe: Pa raqen taq ya', pa kiq'a' eleq'oma', ri nuwinaq judío ri ye'etzelan wichin y keri' chuqa' ri ch'aqa' chik winaqi' ri xa man e nuwinaq ta. Wilon ruk'ayewal pa taq tinamit, pa taq tz'iran ruwach'ulew, pa ruwi' ri palou, y pa kiq'a' ri man e qitzij taq qach'alal ta.

²⁷ Yin in samajineq janila y k'iy tijoj-poqonal nuk'owisan. Nukoch'on nuwaran, nuk'owisan wayjal y chaqi'j-chi', nukoch'on tew, k'o bey k'isineq-qa ri nutziaq chuwij y chuqa' kan k'iy bey ri man xiruben ta ri nuway.

²⁸ Y man xaxe ta k'a ri', roma chuqa' k'o ri ralal ri samaj ri niqa' chuwij q'ij-q'ij, roma jantape' yich'obon pa kiwi' ri molaj qach'alal ri nikimol-ki' pa rubi' ri Dios xabakuchi.

²⁹ Toq jun qach'alal maneq ruchuq'a' y yawa' nuna', yin kan jari' ink'o-apo rik'in. Toq jun qach'alal nitzaq kan roma jun chik, ri wánima kan niq'axo roma ri xban chire.

³⁰ Rix nich'ob chi nik'atzin chi yin ninya-qa nuq'ij, y kan xtinben-wi k'a. Jak'a xaxe xtinbij ri nuk'ut chi yin xa maneq wuchuq'a'.

³¹ Kan qitzij wi ri ninbij yin. Y ri Dios, ri rutata' ri qajaw Jesucristo, ri k'o ruq'ij richin jantape', retaman chi yin man nintz'uk ta tzij.

³² Toq yin xik'oje' pa tinamit Damasco, ri q'atoy-tzij richin ri rey Aretas xubij chi kichap toq yitz'et. Roma ri' kan jebel k'a xchajix ri tinamit richin man yikolotej pa kiq'a'.

³³ Jak'a xikolotej-el pa kiq'a', roma xa xiqasex-el pa jun ventana ri k'o chuwech ri tz'aq ri sutiyon-rij ri tinamit. Y xinkiqasaj-el pa jun chakech.