1 Timoteo 6 - Kaqchiquel Bible

¹ Konojel ri qach'alal ri e ximon pa samaj, k'o chi nikinimaj kitzij ri kajaw, richin keri' man tiyoq'otej rubi' ri Dios y ri ruch'abel.

² Y wi yesamej rik'in jun wineq ri rutzeqeliben ri Cristo, man k'a tikibij chi man ta nikiya' ruq'ij, xaxe roma kach'alal chik ki'. Pa ruk'exel ri' kan tikiya' ruq'ij y más jebel tikisamajij, roma kan ja ri kach'alal, ri junan kikuquban kik'u'x rik'in ri Cristo ri nikisamajij. Rat Timoteo, ninbij chawe chi ke'atijoj y tabij chike ri qach'alal chi tikibana' ronojel re'.

Ri man qitzij ta tijonik y ri qitzij beyomel

³ Y wi k'o jun, ri nuya' tijonik ri man junan ta rik'in ri utzilej tijonik ri ruk'amon-pe ri qajaw Jesucristo, y man junan ta rik'in ri tijonik ri nuk'en-pe ri k'aslen utz chuwech ri Dios,

⁴ ri wineq ri' kan niq'alajin chi janila runimirisan-ri', y xa man jun retaman. Xa yalan niqa' chuwech ri tzij ri man jun nikik'en-pe y jari' nibanon chire chi itzel nuna' chire jun chik roma utz k'o, xaxe oyowal nuben, nubila' itzel taq tzij chikij ch'aqa' chik, k'o itzel ch'obonik pa ránima chirij jun chik wineq.

⁵ Beneq-ruwech nuben oyowal junan kik'in ri ch'aqa' chik ri yojtajineq kina'oj, y man ketaman ta ri qitzij ruch'abel ri Dios, ri xa nikinimaj, xaxe richin chi ye'ok beyoma'.

⁶ Y qitzij wi, chi ri ak'uan jun k'aslen utz chuwech ri Dios, kan beyomel: Xaxe wi k'o kikoten pan awánima rik'in ri janipe' k'o awik'in.

⁷ Roma toq xojalex, man jun qak'amon-pe y toq xqojken, man jun chuqa' xtiqak'uaj-el.

⁸ Roma ri' qojkikot k'a xa rik'in k'o ri qaway y ri qatziaq.

⁹ Jak'a ri winaqi' ri nikirayij ye'ok beyoma', man k'ayew ta chi yeq'olotej, y yetzaq pa pikbel. Rije' xa e nakaneq y ri itzel taq rayibel xa yeruk'uaj pa tijoj-poqonal.

¹⁰ Roma, ri ruxe' ronojel ruwech etzelal ja ri nibe awánima chirij ri méro. Y kan ek'o k'a qach'alal ri xkiya' kan ri Dios roma xbe kan kánima chirij ri méro, y ri' xa k'o q'axo'n xuk'en-pe chike.

K'o chi natej aq'ij richin naben ri nrajo' ri Dios

¹¹ Jak'a rat, Timoteo, ri at rusamajel ri Dios, katanimej chuwech ronojel re'; kan tatija' aq'ij nak'uaj jun k'aslen choj, jantape' tabana' ri niqa' chuwech ri Dios, kan takuquba' ak'u'x rik'in ri Cristo, katajowan, kakoch'on y tak'uaj jun k'aslen ch'uch'uj.

¹² Roma nakuquba' ak'u'x rik'in ri Cristo, k'iy poqon xtatej, jak'a kan tatija' aq'ij richin yach'akon y ja ri k'aslen richin jantape' ri xtak'ul rik'in ri Dios. Roma rija' xaroyoj richin nak'ul ri k'aslen ri' toq xabij chi xakuquba' ak'u'x rik'in ri Cristo chikiwech e k'iy.

¹³ Wakami, ninbij chawe chuwech ri Dios ri niya'on k'aslen y chuwech ri Jesucristo ri xuk'ut chuwech ri q'atoy-tzij Poncio Pilato chi kan rukuquban ruk'u'x rik'in ri Dios,

¹⁴ chi tataqej ronojel ri xinbij chawe, y man tamalij kan. Ri ak'aslen kan ta ch'ajch'oj k'a toq xtipe chik jun bey ri qajaw Jesucristo.

¹⁵ Toq xtapon ri q'ij, ri Dios xtuben ronojel re' roma kan xaxe rija' ri k'o y xaxe rija' ri nimalej ruq'ij. Ja rija' ri nimalej rey pa kiwi' konojel rey. Kan nimalej ajaw pa kiwi' konojel ajaw.

¹⁶ Y kan xaxe rija' ri man kamel ta. Rija' kan pa saqil k'o-wi, ri kan man jun nitikir nijel-apo rik'in. Man jun achike ta wineq tz'eteyon, ni man jun chuqa' nitikir nitz'eton. Ri ruchuq'a' rija' xtik'oje' ta pa qawi' richin jantape', y kan xtuk'ul ta ruq'ij richin jantape'. Keri' ta k'a.

¹⁷ Y rat Timoteo, tabij chike ri qach'alal ri e beyoma' chi man tikinimirisaj-ki', ni man tikoyobej chi ri beyomel nuk'en-pe ronojel chike, roma ri beyomel xa nik'is. Pa ruk'exel ri' xa kan tikikuquba' kik'u'x rik'in ri Dios ri niya'on ronojel ri utz chiqe paruk'iyal richin nikikot ri qánima.

¹⁸ Tabij chike chi kekibanala' k'iy utzil, y e beyoma' ta chubanik ri utzilej taq banobel kik'in ri ch'aqa' chik, y man tikik'ek'ej ri nikiya' chike ri beyomel ri k'o kik'in.

¹⁹ Richin keri' nikimol yan ta apo ri beyomel ri xtik'atzin chike ri chikiwech-apo, richin keri' y nikil ta ri k'aslen ri man k'isel ta.

Ri ruk'isibel taq ch'abel

²⁰ Y rat Timoteo, tachajij k'a ri samaj ri ya'on chawe. Man ke'ak'ul ri tzij ri xa man rik'in ta ri Dios e peteneq-wi, ri xa e richin re ruwach'ulew, y xa man jun nikik'en-pe chawe. Ri winaqi' ri yebin keri', nikibij chi k'o etamabel kik'in jak'a xa man keri' ta.

²¹ Roma ek'o ri xeniman ri tzij ke taq ri', y roma ri' xesach, y xkich'er-el-ki' rik'in ri qitzij ruch'abel ri Dios. Y ja ta k'a ri rutzil ri Dios xtik'oje' awik'in rat Timoteo. Kan keri' ta k'a.