1 Timoteo 3 - Kaqchiquel Bible

Ri ruk'amon chi ye'ok uk'uey kichin ri qach'alal

¹ Re ninbij k'a chawe wakami kan qitzij: Wi k'o jun qach'alal ri k'o rayibel rik'in chi nok uk'uey kichin ri qach'alal, kan utz wi ri samaj ri nurayij.

² Jak'a kan k'atzinel chi ruk'uan jun k'aslen utz, richin chi man jun niyako pe tzij chirij. K'o chi xaxe jun rixjayil,*f1* nuna' jebel ri yerubanala', retaman nuq'il ri' chuwech ri mak, ruk'amon chi ninimex rutzij, kan jebel yeruk'ul-apo ri ye'apon pa rachoch y jebel nuk'ut ri ruch'abel ri Dios,

³ man niq'aber ta, man nuben ta oyowal, man nubanala' ta ri itzel chuch'akik ruméro. Kan nik'atzin k'a chi jun achin ch'uch'uj, y utz runa'oj kik'in konojel winaqi'.

⁴ Y chuqa' jebel ta kik'uaxik rubanon chike ri e aj pa rachoch, ruk'utun ta chikiwech ri ralk'ual chi nikinimaj rutzij y nikiya' ruq'ij.

⁵ Roma wi man retaman ta yeruyuqej ri ralk'ual, man nitikir ta chuqa' yeruyuqej ri molaj qach'alal.

⁶ Man ruk'amon ta chi jun k'ak'a' nimanel nok jun uk'uey kichin ri qach'alal, roma rik'in juba' nunimirisaj-ri', y xa xtuk'uluwachij ri achi'el xuk'uluwachij ri Itzel-Wineq.

⁷ Y chuqa' jun uk'uey kichin qach'alal nik'atzin chi utz nitz'etetej ri ruk'aslen koma ri winaqi' ri man jani kikuquban kik'u'x rik'in ri Jesucristo, richin chi man jun itzel nilitej chirij, y nitzaq pa ruq'a' ri Itzel-Wineq.

Ri k'atzinel chi nikiben ri ye'ilin chikikojol ri qach'alal

⁸ Y keri' chuqa' wi k'o jun nrajo' nilin chikikojol ri qach'alal: Nik'atzin k'a chi nuk'uaj jun k'aslen utz chikiwech ri winaqi', man ka'i' ta rupalej, man niq'aber ta, y man yerubanala' ta itzel chuch'akik ruméro.

⁹ Nik'atzin chi kan tik'oje' chuk'u'x ri ruch'abel ri Dios, y nik'ase' ta rik'in ch'ajch'ojilej ránima.

¹⁰ Pa nabey k'o chi nitz'et na wi utz ri ruk'aslen. Y wi man jun itzel nilitej chirij, utz nok kan chupan ri samaj ri'.

¹¹ Y keri' chuqa' wi k'o jun ixoq ri nrajo' nilin: Nik'atzin chi nuk'uaj ta jun k'aslen utz chikiwech ri winaqi', man ta kamuluy-tzij, jun chojilej ixoq ta y kan nuben ta ronojel ri nubij.

¹² Ri qach'alal achin ri nilin kan nik'atzin chi xaxe jun rixjayil, y jebel ta kik'uaxik rubanon chike ri aj pa rachoch.

¹³ Roma ri utz nuben chire ri rusamaj, xtel utz rutzijol, y chuqa' más xtinimer ri rukuqubabel-k'u'x rik'in ri Cristo.

Ri k'aslen ri niqa' chuwech ri Dios

¹⁴ Ninwajo' yinapon awik'in chi'anin, jak'a ninteq-el re wuj re' chawe,

¹⁵ roma man jani wetaman ta wi xkitikir xkinapon chi'anin yan. Y ninwajo' chi nawetamaj ri achike chi k'aslen ri k'o chi nikik'uaj ri molaj qach'alal ri e ralk'ual chik ri k'aslik Dios ri etemeyon ri qitzij tijonik achi'el ri ruxe' y xata't richin jun jay.

¹⁶ Y qitzij na wi chi kan janila nim rejqalen ri ruq'alajirisan chik ri Dios chiqawech re wakami: Ri Jesucristo xpe wawe' chuwech re ruwach'ulew, y xok wineq achi'el roj. Xk'ut chiqawech roma ri Loq'olej Espíritu chi kan choj wi ruk'aslen. chuqa' xtz'etetej koma ri ángel. Xtzijox chuwech ronojel re ruwach'ulew, y e k'iy xkikuquba' kik'u'x rik'in. Y toq xel-el chuwech re ruwach'ulew, xk'ul chila' chikaj roma ri Dios.