1 Tesalonicenses 5 - Kaqchiquel Bible

¹ Qach'alal, man nik'atzin ta ninbij chiwe ri achike q'ij xtipe ri Jesucristo.

² Roma rix jebel iwetaman chi man jun etamayon janipe' xtipe. Roma rija' toq xtipe, xtuben achi'el nuben jun eleq'om toq napon pa jun jay ri chi'aq'a'.

³ Toq k'a man jani nipe ri Jesucristo, ri winaqi' xtikich'ob chi janila jebel kibanon, y xa jari' k'a toq chaq k'ate' xtoqaqa ri ruk'ayewal pa kiwi'. Xa xtikik'uluwachij achi'el ri nuk'uluwachij jun ixoq ri peteneq alanik chirij, ri chaq k'ate' nok'ulun ri ruq'axo'n. Y keri' k'a ri xtikik'uluwachij ri winaqi' ri', man xkekolotej ta chuwech ri ruk'ayewal.

⁴ Jak'a rix qach'alal man ixk'o ta chik pa q'equ'm, roma kan iwoyoben ri q'ij toq xtipe chik ri Jesucristo. Y roma ri', toq xtoqaqa rija' iwik'in, man xtoqaqa ta achi'el noqaqa jun eleq'om.

⁵ Roma qonojel ri qakuquban qak'u'x rik'in ri Jesucristo kan oj richin chik ri saqil, y man oj richin ta chik ri q'equ'm.

⁶ Roma ri' man tiqaben achi'el nikiben ch'aqa', ri xa yewer. Jak'a roj qojk'ase' jebel y tiqana' jebel ri yeqabanala'.

⁷ Ri yewer, kan yewer ri chi'aq'a'; y ri yeq'aber, kan jari chi'aq'a' yeq'aber.

⁸ Jak'a roj ri oj richin ri saqil, tiqana' jebel ri achike yeqabanala'. Kan tiqakuquba' qak'u'x rik'in ri Jesucristo, y qojajowan, achi'el nuben jun aj-labal ri nukusaj ri rutobal ruwa-ruk'u'x. Chuqa' k'o chi niqaq'et-qi' rik'in ri qach'obonik, achi'el ri aj-labal ri nukusaj rutobal rujolon.*f3*

⁹ Ri Dios man nrajo' ta chi nipe ruk'ayewal pa qawi'. Pa ruk'exel ri' nrajo' chi yojkolotej roma ri qajaw Jesucristo.

¹⁰ Rija' xken qoma roj, richin keri', wi k'a oj k'es na wawe' chuwech re ruwach'ulew, niqak'ul qak'aslen rik'in rija'. Y wi oj kaminaqi' chik el, k'o chuqa' qak'aslen rik'in rija'.

¹¹ Roma ri' tikuqubala' ik'u'x chi'iwachibil-iwi'. Y chuqa' titola-iwi' richin chi yixk'iy rik'in ri ik'aslen, kan achi'el ri ibanon-pe.

Ri nuchilabej ri Pablo chike ri qach'alal aj-Tesalónica

¹² Qach'alal, niqak'utuj utzil chiwe chi tiya' kejqalen ri achi'a' ri janila yesamej chi'ikojol pa rusamaj ri Dios, roma ja rije' ri e uk'uayon iwichin, y yixkipixabala'.

¹³ Roma ri' kan ke'ipoqonaj y ke'iwajowala' janila. Chuqa' jebel tik'uaj-iwi' y man ta jun oyowal ri chi'ikojolil.

¹⁴ Chuqa', qach'alal, ke'ipixabaj ri qach'alal ri k'o kiq'oral. Y ri qach'alal ri xa ka'i' kik'u'x rubanon, tikuqubala' kik'u'x. Y ri man jani k'o ta kuchuq'a' jebel chupan ri kik'aslen rik'in ri Jesucristo, kan ke'itola'. Y chuqa' ke'ikoch'ola' konojel.

¹⁵ Y wi k'o ri xkebanon etzelal chiwe, man tiben ruk'exel chike. Xa titija' iq'ij niben ri utz chike ri qach'alal, y chike konojel winaqi'.

¹⁶ Jantape' tikikot ri iwánima.

¹⁷ Jantape' kixch'on rik'in ri Dios.

¹⁸ Kixmatioxin chire ri Dios toq utz ixk'o, y toq ixk'o pa jun ruk'ayewal, roma keri' nrajo' ri Dios chi niben rix ri ix richin chik ri Cristo Jesús.

¹⁹ Man tiq'et ri rusamaj ri Loq'olej Espíritu.

²⁰ Y toq ri Dios nuya' jun rutzijol chire jun qach'alal richin k'o nuq'alajirisaj, man tiwetzelaj.

²¹ Xa tiwak'axaj ri nubij, richin keri' rix ninabej wi qitzij o man qitzij ta. Y wi qitzij, tiwojqaj k'a.

²² Jak'a chire ronojel ruwech etzelal, kan tijech'ej-iwi' rik'in.

²³ Rix iwetaman chi ja ri Dios ri niya'on uxlanen pa taq iwánima. Y ninwajo' k'a chi rija' yixruch'er richin kan ix richin rija'. Ninwajo' chi xtuchajij ta ri ik'aslen, ri iwánima y ri ich'akul, richin keri' man jun itzel nilitej chiwij toq xtipe chik jun bey ri qajaw Jesucristo.

²⁴ Y ri Dios kan xtuben ronojel re', roma ja rija' ri xoyon iwichin, y roma ri' rija' man jun bey xkixruya' ta kan.

Ri ruk'isibel taq ch'abel

²⁵ Qach'alal, kixch'on rik'in ri Dios pa qawi' roj.

²⁶ Tiya' rutzil-kiwech konojel ri qach'alal, rik'in jun loq'olej tz'ubanik.

²⁷ Y pa rubi' ri ajaw ninbij k'a chiwe, chi tisik'ij re wuj re' chikiwech konojel ri qach'alal.

²⁸ Y ri rutzil ri qajaw Jesucristo xtik'oje' ta k'a iwik'in chi'iwonojel. Kan keri' ta k'a.