1 Tesalonicenses 4 - Kaqchiquel Bible

Ja ri k'aslen choj ri niqa' chuwech ri Dios

¹ Toq xojk'oje' iwik'in, xqabij chiwe achike ri niqa' chuwech ri Dios, y chi jari' ri utz niben. Y rix kan keri' ibanon. Y kan k'a k'o k'a ri niqajo' niqak'utuj chiwe pa rubi' ri Jesucristo, chi kan más k'a titija' iq'ij chi niben ri niqa' chuwech ri Dios.

² Rix jebel iwetaman achike ri xqabij chiwe, ri k'o chi niben. Y roj xqabij keri' chiwe, roma kan keri' bin kan roma ri ajaw Jesucristo.

³ Qach'alal, ri Dios nrajo' k'a chi rix nich'er ta iwi' chuwech ronojel ri man utz ta, ri achi'a' y ri ixoqi' man tikikanola-ki' richin yemakun.

⁴ Rix achi'a' chi'ijujunal tiwetamaj k'a achike rubanik yixk'oje' kik'in ri iwixjayilal, richin niqa' chuwech ri Dios, y chikiwech ri winaqi'.*f2*

⁵ Man k'a tiben achi'el nikiben ri winaqi' ri man ketaman ta ruwech ri Dios, roma rije' xaxe ri itzel rurayibel ri ch'akulaj ri nikiben.

⁶ Man tiq'ol jun chike ri qach'alal richin yixk'oje' rik'in ri rixjayil. Roma wi keri' niben, ri Dios xtuya' ruk'ayewal pan iwi'. Kere' xqabij chiwe toq xojk'oje' iwik'in.

⁷ Ri Dios man xojroyoj ta richin niqak'uaj jun itzel k'aslen. Rija' xojroyoj richin niqak'uaj jun k'aslen ri kan loq'olej.

⁸ Y wi k'o jun ri chi'ikojol ri xa man nrak'axaj ta ronojel ri xqabij yan qa chiwe, man ja ta roj o jun ta chik wineq ri nretzelaj ri ruch'abel. Xa kan nretzelaj ri ruch'abel ri Dios, ri xya'on-pe ri Loq'olej Espíritu qik'in.

⁹ Jak'a chirij ri ajowabel ri k'o chi nik'oje' chi'ikojol rix chi'iwach'alal-iwi', ri Dios ruk'utun chik chiwech chi k'o chi niwajowala-iwi'. Y roma ri' man nik'atzin ta chi ninnataj chik chiwe.

¹⁰ Roma kan niq'alajin-wi jebel chi rix janila ye'iwajo' konojel ri qach'alal ri ek'o pa Macedonia. Jak'a chuqa' niqabij chiwe chi jantape' kixajowan más.

¹¹ Y chuqa' man tich'ujerisaj-iwi'. Xa choj tikanoj ri nik'atzin chiwe qa rix. Jantape' kixsamej richin nich'ek iway, achi'el xqabij chiwe toq xojk'oje' iwik'in;

¹² richin chi nik'uaj jun k'aslen pa rubeyal chikiwech ri winaqi' ri man kikuquban ta kik'u'x rik'in ri Jesucristo, y richin chuqa' chi man nik'atzin ta chi ri winaqi' k'o nikiya-pe chiwe.

Toq ri Jesucristo xtipe chik jun bey

¹³ Roj niqajo' chi rix niwetamaj ri achike xtiban chike ri qach'alal ri e kaminaqi' chik el, richin man yixbison, achi'el nikiben ri winaqi' ri man koyoben ta ri utzil ri k'o rik'in ri Jesucristo.

¹⁴ Roma roj kan niqanimaj-wi chi ri Jesucristo xken y xk'astej-el. Y chuqa' kan niqanimaj-wi chi toq xtipe chik ri Jesucristo, ri Dios xkeruk'asoj-el ri qach'alal ri e kaminaqi' chik el, y xkeruk'uaj-el rik'in rija'.

¹⁵ Y re' niqabij chiwe wakami roma keri' rubin kan ri Ajaw; chi toq rija' xtipe chik jun bey, roj ri k'a oj k'es na, man xqojnabeyej ta el chikiwech ri qach'alal ri e kaminaqi' chik el.

¹⁶ Roma ri ajaw xtipe chila' chikaj y xtich'on-pe kow. Chuqa' xtisik'in-pe ri nimalej ángel, y xtiq'ajan-pe ri trompeta richin ri Dios. Y jari' toq xkek'astej-el ri kaminaqi' ri xkikuquba' kik'u'x rik'in ri Jesucristo.

¹⁷ Y k'ari', ri k'a oj k'es na kan, jari' toq xqojuk'uex-el junan kik'in rije', pa taq sutz' chikaj, richin xtibeqak'ulu' ri ajaw. Y xqojbek'oje' rik'in rija' richin jantape'.

¹⁸ Roma ri' tikuqubala' ik'u'x chi'iwachibil-iwi', rik'in re ch'abel re'.