1 Tesalonicenses 2 - Kaqchiquel Bible

Ri rusamaj ri Pablo pa Tesalónica

¹ Qach'alal, rix jebel iwetaman chi yalan rejqalen ri xojapon iwik'in.

² Y chuqa' iwetaman chi toq man jani qojapon ri chila' iwik'in rix, roj xa kan xqatej yan k'a poqon y k'iy yan ri xban chiqe chiri' pa tinamit Filipos. Y stape' xa kan janila xojetzelex, ri Dios kan xuben k'a chiqe chi man xqaxibij ta qi' richin xqatzijoj chiwe ri utzilej ruch'abel ri nik'amon-pe kolotajik.

³ Y ri ruch'abel ri Dios ri xqabila' chiwe, kan pa rubeyal-wi. Y man xixqaq'ol ta. Y man xqabila' ta chuqa' ri ruch'abel ri Dios chiwe xaxe roma k'o ta jun ri niqajo' chiwe.

⁴ Xqabila' ri utzilej ch'abel richin kolotajik chiwe, roma ja ri Dios ri xya'on re samaj re' chiqe. Rija' retaman chi niqajo' niqaben ri niqa' chuwech, y man ja ta ri niqa' chikiwech ri winaqi'.

⁵ Rix iwetaman chi toq xqabij ri ruch'abel chiwe, man richin ta xqach'ek méro. Y chuqa' iwetaman chi man xqakanoj ta ch'abel ri yalan ta xqa' chiwech richin keri' xixqaq'ol ta.

⁶ Man xqajo' ta chi rix y ch'aqa' chik winaqi' xiya' ta qaq'ij roj,

⁷ stape' kan ruk'amon ta chi keri' roma kan oj taqon-pe roma ri Cristo. Jak'a pa ruk'exel ri' roj xa janila xixqajo', achi'el nuben jun te'ej kik'in ri taq ral.

⁸ Janila yixqajo'. Roma ri' xqatzijoj chiwe ri utzilej ruch'abel ri Dios ri nik'amon-pe kolotajik. Y man xaxe ta ri'. Roma wi ta xk'atzin chi xojapon chuwech ri kamik chi'ito'ik, kan xqaben ta.

⁹ Qach'alal, jebel iwetaman chi man jun bey xqak'utuj qaway chiwe. Jak'a roj xojsamej chi paq'ij chi chaq'a' richin xqach'ek qaway, richin man xixqaya' ta pa k'ayew, toq xojk'oje' iwik'in chubixik ri utzilej ruch'abel ri Dios ri nik'amon-pe kolotajik.

¹⁰ Ri Dios kan xutz'et y rix chuqa', chi toq roj xojk'oje' iwik'in, ri qak'aslen kan utz wi chiwech rix, y kan man jun itzel xilitej pa qak'aslen.

^11-12 Rix iwetaman chi roj kan qakuquban ik'u'x, kan ixqato'on, achi'el nuben jun tata'aj chike ri ralk'ual y qaya'on pixabanik chiwe, richin chi tik'uaj jun k'aslen utz achi'el ruk'amon nikiben ri e ralk'ual chik ri Dios, roma rija' xojroyoj richin yojok pa rajawaren ri akuchi k'o-wi ruq'ij-ruk'ojlen.

¹³ Roj jantape' niqamatioxij chire ri Dios, roma toq xqatzijoj ri ruch'abel ri Dios chiwe, kan xik'ul-wi. Y man xibij ta qa chi ruch'abel wineq, xa kan xibij chi kan ruch'abel-wi ri Dios. Y wakami k'a, ja ch'abel ri' ri nisamej pan iwánima rix ri ikuquban chik ik'u'x rik'in ri Jesucristo.

¹⁴ Qach'alal, rix xiben achi'el nikiben ri ch'aqa' chik molaj qach'alal. Rix xban poqon chiwe koma ri iwinaq, achi'el xban chike ri molaj qach'alal judío koma ch'aqa' chik judío ri man kikuquban ta kik'u'x rik'in ri Cristo.

¹⁵ Ri judío ri xek'oje' ojer kan xekikamisala' ri e q'alajirisey ruch'abel ri Dios. Chuqa' ri qawinaq xebin chi tikamisex ri ajaw Jesucristo. Y chuqa' ja rije' ri xe'oqotan-pe qichin roj. Konojel re itzel taq winaqi' re' man nikiben ta ri niqa' chuwech ri Dios, y yeketzelaj ri winaqi'.

¹⁶ Pa ruwi' ri', toq roj xqajo' xqatzijoj ruch'abel ri Dios richin kolotajik chike ri winaqi' ri man e judío ta, rije' janila itzel xkina', roma man xkajo' ta chi xojbe kik'in. K'iy ri kimak ri qawinaq judío. Y roma ri' ri Dios ruya'on chik ruk'ayewal pa kiwi'.

Ri Pablo nrajo' nibe pa Tesalónica

¹⁷ Qach'alal, roj yalan k'a yixqabisoj, roma k'o yan chik juba' q'ij qojel-pe iwik'in. Jak'a stape' man ojk'o ta apo iwik'in, jantape' yixqanataj, y yalan qajowan chi oj apowineq ta iwik'in.

¹⁸ Xqaben richin yojbe. Yin ka'i-oxi' bey xinben chi yojbe ta, jak'a ri Satanás xojruq'et.

¹⁹ Roj kan niqajo-wi yojapon iwik'in, roma nikikot qánima chi rix ikuquban ik'u'x rik'in ri Jesucristo rik'in ronojel iwánima. Y roma ri' rik'in kikoten qoyoben ri q'ij toq xtipe ri qajaw Jesucristo. Roma chupan ri q'ij ri' xtikikot ránima ri Jesucristo qik'in roj iwoma rix, chi k'o rejqalen ri xqatzijoj ri ruch'abel ri Dios chiwe.

²⁰ Kan iwoma wi rix toq roj k'o qaq'ij y k'o kikoten pa taq qánima.