1 Sam 9 - Kaqchiquel Bible

Ri Saúl napon rik'in ri Samuel

¹ K'o k'a jun achin rijatzul kan ri Benjamín rubini'an Cis. Rija' ruk'ajol ri Abiel, ri ruk'ajol ri Seror. Y ri Seror ruk'ajol kan ri Becorat y rija' ruk'ajol chik kan ri Afíah. Y ri Afíah aj-Benjamín. Y ri Cis kan maneq k'a xibinri'il chuwech,

² y k'o k'a jun ruk'ajol rubini'an Saúl ri k'a man jani k'o k'iy rujuna' y kan janila jebel ok nitzu'un. Chikikojol ri israelita kan man jun chik ala' ri más ta jebel chuwech rija', y kan xaxe rija' ri más nim rupalen chikikojol ri ek'o chupan ri ruwach'ulew ri'.

³ Y ri Cis ek'o k'a rubur y k'o k'a jun q'ij xesach-el re bur re'. Roma ri' rija' xubij chire ri Saúl chi tuk'uaj-el jun chike ri rusamajela' y kebekikanoj ri bur ri xesach-el.

⁴ Xebe k'a rije' y xkiq'axaj ri ruwi' taq juyu' richin Efraín, y k'ari' xeq'ax chupan ri ruwach'ulew Salisá y man xekil ta. K'ari' xeq'ax pa ruwach'ulew Saalim y chupan ri ruwach'ulew Benjamín y chuqa' man xekil ta chiri'.

⁵ Toq xe'apon pa ruwach'ulew richin Suf, ri Saúl xubij chire ri rusamajel ri beneq rik'in: Jo'; más utz qojtzolin roma rik'in juba' ri nata' xa xerumestaj yan qa ri bur y ja chik roj ri yojruquqa-pe, xcha'.

⁶ K'ari' ri rusamajel xubij: Wawe' chupan re tinamit re' k'o jun achin ri q'alajirisey ruch'abel ri Dios. Kan janila k'a rutzijol chi ri achin ri' ronojel ri nubij nibanatej. Jo' rik'in rija'. Rik'in juba' nubij chiqe ri achike ta bey k'atzinel richin niqak'uaj, xcha'.

⁷ Y ri Saúl xubij chire: Jo' k'a; jak'a ¿Achike ta k'a niqak'uaj-el chire ri achin ri'? Roma maneq chik kaxlan-wey qik'in, y man jun chik k'o qik'in richin niqak'uaj chire. ¿Achike ta k'a yojtikir niqaya' chire?, xcha'.

⁸ Y ri samajel xubij chire ri Saúl: Yin xaxe chik jun ti méro ri banon rik'in saqipueq ri k'o wik'in. Jare' ri xtinya' kan chire ri achin richin ri Dios, richin nuq'alajirisaj chiqawech ri bey ri k'o chi niqatzeqelibej, xcha'.

⁹ Ri ojer kan ri pan Israel xabachike k'a nibe richin niberuk'ulubej ri Dios y kere' k'a nubij: Kixanpe y jo' rik'in ri nitz'eton ri peteneq chiqawech-apo, yecha'. Jak'a re wakami nibix Q'alajirisey ruch'abel ri Dios chire.

¹⁰ K'ari' ri Saúl xubij chi janila utz ri xuch'ob ri rusamajel. Y xebe k'a chupan ri tinamit ri akuchi k'o-wi ri achin richin ri Dios.

¹¹ Y toq ri achi'a' ri' e jotol-q'anej pa ruwi' ri juyu' richin ri tinamit, xekik'ul ka'i-oxi' xtani' e xulan-pe, ri nikeraj kiya' y xkibij k'a chike: ¿Wawe' kami k'o-wi ri nitz'eton ri peteneq chiqawech-apo?, xecha'.

¹² Y ri xtani' ri' xkibij: Ja' wawe' k'o-wi; xaxe chi'anin kixbiyin rik'in, roma k'a juba' toqaqa chupan re tinamit re' y niberusuju' jun kamelabel chila' pa ruwi' juyu'.

¹³ Kan xaxe toq xkixok-apo pa tinamit, tikanoj chi'anin, roma xa nijote' yan q'anej pa ruwi' juyu' richin ri wa'in. Ri winaqi' man yewa' ta qa wi man napon ta q'anej rija', roma ja rija' ri nurtisan ri kamelabel. K'ari' yewa' ri e oyon. Roma ri' kixjote-q'anej chi'anin, roma wakami kan xtiwil, xecha' ri xtani' chike.

¹⁴ K'ari' rije' xejote-q'anej pa tinamit. Toq ek'o chik chiri', jari' toq ri Samuel xnaqajub-apo kik'in richin nibe-q'anej pa ruwi' ri juyu' ri akuchi nisuj-wi ri kamelabel.

¹⁵ Y jun q'ij chi man napon ri Saúl rik'in ri Samuel, ri Jehová k'o k'a ri xuq'alajirisaj chire ri Samuel y xubij chire:

¹⁶ Ke taq wa' chua'q yin xtinteq-pe awik'in jun achin richin ri tzobaj richin Benjamín y rat xtaqasaj aceite pa ruwi' richin xtok rey pa ruwi' ri nutinamit Israel. Y ja rija' xtikolon ri nutinamit pa kiq'a' ri aj-Filistea, roma nutz'eton ri tijoj-poqonal ri nikik'owisaj y ri kich'abel kan oqawineq k'a wik'in yin, xcha' ri Jehová.

¹⁷ Y chupan chik ri jun q'ij, toq ri Samuel xutz'et ri Saúl, jari' toq ri Jehová xubij chik chire chi ja Saúl re' ri xtok rey pa ruwi' ri tinamit.

¹⁸ Xjel k'a apo ri Saúl rik'in ri Samuel chunaqaj ri ruchi' ri tinamit, y xuk'utuj chire ri akuchi k'o-wi ri rachoch ri achin ri nitz'eton ri peteneq chikiwech-apo.

¹⁹ Y ri Samuel xubij: Ja yin ri', wakami katik'o-el chinuwech k'a pa ruwi' la juyu'. Kan xkawa' k'a wik'in, y nimaq'a' yan xkatinjech-el y xtinbij-el chawe ronojel ri k'o pan awánima.

²⁰ Y pa ruwi' ri taq bur ri k'o yan chik oxi' q'ij ke'asech, man chik tach'ob, roma xa xe'ilitej yan. Man tach'ob rij, roma ronojel ri k'o rejqalen re wawe' pan Israel, ronojel ri' xtok awichin rat y kichin ri e aj pan awachoch, xcha' ri Samuel.

²¹ Y ri Saúl xubij: ¿Achike roma nabij chuwe yin re ch'abel re'? Roma yin xa in rijatzul kan ri Benjamín, jun tzobaj ri janila ko'ol ok chikikojol konojel tzobaj richin ri Israel. Pa ruwi' re', ri e aj pa wachoch yin xa kan maneq ok qejqalen chikiwech ri ch'aqa' chik jay winaqi' richin ri tzobaj richin ri Benjamín, xcha'.

²² K'ari' ri Samuel xeruk'uaj-q'anej ri Saúl y ri rusamajel y xerukusaj-apo pa nima-jay. Y chiri' xeruya' pa nabey chike konojel ri e royon, y ri e oyon jun la'eq e juwineq lajuj achi'a'.

²³ Y ri Samuel xubij chire ri nibanon ri q'utun: Tak'ama-pe wawe' ri juba' chire ronojel ri q'utun ri xinya' chawe yin, ri xinbij chawe chi tach'ara' kan, xcha'.

²⁴ K'ari' ri nibanon ri q'utun xuk'en-el ri racheq ri chikop ri ruyakon kan y xuya-apo chuwech ri Saúl. Y ri Samuel xubij chire: Jare' ri q'utun ri ch'aron kan awichin rat richin natej wakami y kan roma ri' e woyon re winaqi' re', xcha'. Chupan k'a ri q'ij ri' ri Saúl kan xwa' rik'in ri Samuel.

²⁵ Y toq xeqaqa yan pe ri pa ruwi' juyu' richin xepe pa tinamit, ri Samuel xuk'uaj-q'anej ri Saúl pa ruwi' ri taq'aj ruwi' ri rachoch, chiri' xwer-wi kan ri Saúl.

²⁶ Y ri ruka'n q'ij nimaq'a' yan k'a xek'astej y ri Samuel xroyoj-q'anej ri Saúl y xubij chire chi tiyakatej richin nuchop chik el bey. K'ari' xyakatej ri Saúl y xel-pe pa bey junan rik'in ri Samuel.

²⁷ Toq ek'o chik k'a chuchi' ri tinamit, jari' toq ri Samuel xubij chire ri Saúl: Tataqa-el la asamajel richin nik'o-el chawech y rat kakanej na kan juba' richin ninq'alajirisaj chawe ri rubin ri Dios chuwe, xcha'.