1 Sam 5 - Kaqchiquel Bible

Ri Dios xuya' ruk'ayewal pa kiwi' ri aj-Filistea

¹ Ri aj-Filistea xkelesaj-el ri káxa richin ri jikibel-tzij ri Dios pa tinamit Eben-ézer y xkik'uaj pa tinamit Asdod.

² Y toq xe'apon, xkikusaj-apo ri káxa pa rachoch ri ki-dios rubini'an Dagón, y xkiya' kan chunaqaj ri wachibel.

³ Toq xseqer ri jun chik q'ij, jari' toq ri aj-Asdod xkitz'et chi ri ruwachibel ri Dagón jupul pan ulew chuwech ri káxa. K'ari' rije' xkiyek-el ri wachibel ri' xkipaba' kan y xkiya' kan pa ruk'ojelibal.

⁴ Y toq xeyakatej chik nimaq'a' yan ri ruka'n q'ij, xkitz'et chi ri wachibel tzaqineq chik pe jun bey y jupul chuwech ri káxa. Ri rujolon y ri ka'i' ruq'a' xeq'aj y e punul kan k'a chuchi' ri ruchi-jay. Xaxe ri ruch'akul man jun xuben.

⁵ Roma ri' ri e sacerdote ri e richin ri dios Dagón y konojel ri ye'apon pa rachoch, kan ja q'ij ri' toq man nikipalibej ta ri ulew akuchi xtzaq-wi ri rujolon y ri ruq'a' ri ki-dios.

⁶ Chirij ri' ri Jehová xuya' jun ruk'ayewal pa kiwi' y xuben chike konojel ri aj-Asdod y chijun ri kiruwach'ulew, chi xpe sipojik chikij ri kan k'o rujeleb.

⁷ Toq xkitz'et ronojel re', ri aj-Asdod xkibij: Man niqajo' ta chik nik'oje' ri káxa richin ri rujikibel-tzij ri ki-Dios ri aj-Israel wawe' qik'in, roma re Dios re' xa janila nuya' tijoj-poqonal pa qawi' y kan keri' chuqa' nuben rik'in ri qa-dios Dagón, xecha'.

⁸ Y xtaq k'a koyoxik ri e tata'al chikikojol ri aj-Filistea y xk'utux k'a chike ri achike niban rik'in ri káxa. Y rije' xkibij chi tiq'axex-apo pa tinamit Gat. Y kan keri' k'a xkiben.

⁹ Y toq kiq'axan chik pe pa Gat, ri Jehová xuya' pa poqon ri tinamit ri'. Xuya' sipojik chike ri kan k'o rujeleb, richin nikiq'axaj ri ruk'ayewal. Y ri yabil ri' xeruchop chi ch'uti'q chi nima'q.

¹⁰ Y k'ari' xbekiya' chik kan ri káxa pa tinamit Ecrón. Jak'a toq xapon chiri', ri aj-Ecrón xesik'in roma xibinri'il y xkibij chi ri káxa ri' xapon kik'in xaxe richin yeruk'is.

¹¹ Y roma ri nimalej xibinri'il ri k'o kik'in, roma ri' xkiteq k'a koyoxik ri e tata'al kichin ri aj-Filistea y xkibij chi tikik'uaj-el ri káxa y tikibetzolij kan ri akuchi kik'amon-wi-pe, richin keri' man yerukamisaj ta chik, roma xkich'ob chi ri Dios kan xunimirisaj ri ruk'ayewal pa kiwi'.

¹² Y ri man xeken ta, kan janila k'a yesik'in roma rukiy ri sipojik rik'in ri jeleb ri k'o chikij y ri kiraqoj-chi'ij napon k'a chikaj.