1 Sam 31 - Kaqchiquel Bible

¹ Rokik re', ri aj-Filistea xkichop oyowal kik'in ri israelita. Jak'a rije' xa xe'animej chikiwech ri aj-Filistea, y xeken k'a chuwa taq juyu' richin Guilboa.

² Y ri aj-Filistea xekitzeqelibej-el ri Saúl y ri e ruk'ajol y xkikamisaj ri Jonatán, ri Abinadab y ri Malquisúa.

³ Y ri oyowal kan más k'a xnimer-q'anej, y xkiq'ijuj ri Saúl ri q'ij ri', roma ri e aj-ch'ab xkimej rik'in ri kich'ab y kan janila xsokotej.

⁴ Roma ri' xubij chire ri achin uk'uey rukamisabal: Tawelesaj la a-espada y kinakamisaj, richin chi man yepe ta ri achi'a' ri man ketaman ta ruwech ri Dios, y ja rije' xkekamisan wichin y xketze'en chuwij, xcha'. Jak'a ri uk'uey ri rukamisabal man xrajo' ta xukamisaj, roma janila xuxibij-ri'. K'ari' ri Saúl xuchop ri ru-espada y xuk'eq-ri' chutza'n y xukamisaj-ri'.

⁵ Toq ri uk'uey ri rukamisabal ri Saúl xutz'et keri', chuqa' rija' xuk'eq ri' chutza'n ri ru-espada, y xukamisaj-ri'. Kan junan k'a xeken rik'in ri Saúl.

⁶ Keri' k'a xkiben chupan ri q'ij toq xken ri Saúl, ri e oxi' ruk'ajol, ri uk'uey rukamisabal y konojel ri achi'a' ri e beneq rik'in.

⁷ Y toq ri ch'aqa' chik israelita ri ek'o juk'an chik chire ri taq'aj, y ri ek'o juk'an chik chire ri raqen-ya' Jordán, xkitz'et chi ri kiwinaq xe'animej, y chi ri Saúl y ri e ruk'ajol xeken kan, rije' chuqa' xe'animej y xkimalij kan ri tinamit ri akuchi ek'o-wi. K'ari' ri aj-Filistea xebek'oje' k'a chiri' chupan ri kitinamit kan rije'.

⁸ Y ri jun chik q'ij toq ri aj-Filistea xebe richin nibekelesaj ronojel ri k'o rejqalen chuwi-kiq'a' ri kaminaqi', jari' toq xkil ri Saúl y ri e oxi' ruk'ajol, e li'an kan chiri' pa juyu' Guilboa.

⁹ Rije' xkitzak'ij kan rujolon ri Saúl y xkelesaj-el ri rukamisabal, y xekiteq-el ya'ol rutzijol chijun ruwach'ulew Filistea richin nikiya' utzilej rutzijol chupan ri kachoch ri wachibel ri nikiya' kiq'ij y chire ri tinamit.

¹⁰ K'ari' xkiya' ri rukamisabal ri Saúl y ri kichin ri e ruk'ajol chupan ri rachoch ri ki-dios Astarté, y ri ruch'akul ri rey y ri kich'akul ri e ruk'ajol, xetzeqebex kan chuwech ri tz'aq richin Bet-sán.

¹¹ Toq xkak'axaj k'a konojel ri winaqi' ri ek'o pa tinamit Jabés richin Galaad, ri xkiben ri aj-Filistea rik'in ri ruch'akul ri Saúl,

¹² konojel k'a ri achi'a' ri maneq xibinri'il chikiwech, xebe y xebiyin chijun aq'a' y xe'ok-apo chupan ri tz'aq richin Bet-sán y xbekik'ama-pe ri ruch'akul ri Saúl y ri kich'akul ri e oxi' ruk'ajol. Toq xe'apon pa Jabés, chiri' xekiporoj-wi.

¹³ K'ari' xmol-el ri kibaqil y xekimuq chuxe' jun che', y man xewa' ta wuqu' q'ij, roma janila yebison.