1 Sam 30 - Kaqchiquel Bible

Ri David xeruch'ek ri winaqi' amalecita

¹ Chupan k'a ri rox q'ij jari' toq ri David y ri achi'a' ri e beneq rik'in xe'apon pa Siclag. Jari' toq xkitz'et chi ri amalecita xe'eleq' yan el chiri' y ri pa Négueb, y kan xkiya' kan ruq'aq'al.

² Xekik'uaj-el ri ixoqi' y konojel ri ek'o chiri', chi ch'uti'q chi nima'q xekik'uaj-el y kan man jun k'a xkikamisaj. Xa kan xekik'uaj k'a el keri'. Y k'ari' xkichop chik el ri kibey.

³ Toq ri David y ri achi'a' ri e beneq rik'in xe'apon pa kitinamit Siclag, jari' toq xkitz'et chi ya'on kan ruq'aq'al ri kitinamit, y xe'uk'uex-el ri kixjayilal y ri kalk'ual.

⁴ Ri David y konojel ri achi'a' ri e beneq rik'in, kan janila xesik'in y xe'oq' y kan xk'is k'a kuchuq'a' roma oq'ej.

⁵ Chuqa' xe'uk'uex-el ri e ka'i' rixjayil ri David, ri Ahinóam y ri Abigail.

⁶ Ri David janila bis k'o rik'in roma ri achi'a' ri e beneq rik'in nikibij chi nikik'eq chi abej roma ri xbanatej. Chijun k'a tinamit janila niq'axon ri kánima roma ri kalk'ual. Jak'a ri David kan xril ruchuq'a' rik'in ri Jehová ri ru-Dios.

⁷ K'ari' xubij chire ri sacerdote Abiatar ruk'ajol kan ri Ahimélec chi tuk'ama-pe ri tzieq ri nibix efod chire, richin nuk'utuj chire ri Dios. Y ri Abiatar kan xuk'en k'a pe ri tzieq ri' chire ri David.

⁸ K'ari' xuk'ulubej ri Jehová y xubij chire: ¿Utz kami yentzeqelibej re tzobaj eleq'oma' re'? ¿Yitikir kami yenq'i'?, xcha'. Y ri Jehová xubij chire: Ke'atzeqelibej, roma kan ninbij chawe chi xke'aq'i', y xke'akol-pe ri xekik'uaj-el, xcha'.

⁹ K'ari' ri David xbe k'a, e rachibilan-el ri e 600 achi'a' ri ek'o rik'in, y xe'apon k'a chuchi' ri ch'uti'n raqen-ya' Besor, ri akuchi xek'oje' kan ch'aqa' chike rije'.

¹⁰ Y e 200 k'a ri xek'oje' kan chiri', roma maneq chik kuchuq'a' richin nikiq'axaj ri ch'uti'n raqen-ya' Besor. Jak'a ri David y ri e 400 achi'a' kan kichapon k'a kitzeqelibexik.

¹¹ Toq rije' e beneq pa bey, xkil k'a jun achin aj-Egipto y xkik'en-pe rik'in ri David. Xkitzuq k'a y xkiya' ruya'.

¹² Chuqa' xkiya' ka'i' peraj ponon wíkix chire y uva ri e chaqirisan chik. Toq rutijon chik qa re' xk'oje' chik el ruchuq'a', roma man jun rutijon ni man jun ruqumun oxi' q'ij y oxi' aq'a'.

¹³ K'ari' ri David xuk'utuj chire ri achike rajaw, y akuchi nipe-wi. Y rija' xubij: Yin in aj-Egipto; in jun samajel rik'in jun amalecita. Ri wajaw k'o yan oxi' q'ij xirumalij kan wawe', roma janila in yawa'.

¹⁴ Roj xojok chiri' pa xokon chire ri kiruwach'ulew ri quereteo, ri kiruwach'ulew ri aj-Judá y ri kiruwach'ulew ri e rijatzul kan ri Caleb. Chuqa' xqaya' kan ruq'aq'al ri tinamit Siclag, xcha'.

¹⁵ Y ri David xuk'utuj chire: ¿Yatikir rat yinak'uaj chiri' akuchi ek'o-wi ri achi'a' ri'?, xcha'. Y rija' xubij: Tajikiba-atzij chuwech ri Dios chi wi man yinakamisaj ta ni man yinajech ta pa ruq'a' ri wajaw, yin xkatink'uaj kik'in rije', xcha'.

¹⁶ K'ari' xeruk'uaj k'a, y toq xe'apon, ri achi'a' ri' kitalun-ki' richin yewa', ye'uk'ya' y kan yenimaq'ijun roma janila k'iy xkimej-pe ri k'o rejqalen chuwi-kiq'a' ri aj-Filistea y ri aj-Judá.

¹⁷ Ri David xeruchop k'a chi oyowal ri nimaq'a' yan y xtane' k'a ri tiqaq'ij richin ri jun chik q'ij. Xaxe k'a e 400 alaboni' ri xech'oke-el chirij camello ri xe'animej.

¹⁸ Keri' toq ri David xtikir xukol kan ronojel chuwi-kiq'a' ri amalecita. Y xerukol kan ri e ka'i' rixjayil.

¹⁹ Kan ronojel k'a xetikir xkikol-pe, chi ch'uti'q chi nima'q, konojel ri kalk'ual, y ronojel ri eleq'an-el kik'in. Ronojel k'a xukol-pe ri David.

²⁰ Ri David chuqa' xuk'en-pe ronojel ri karne'l y ri wákix. Y ja ri rusamajela' ri xenimon-pe kichin y xkibij: Jare' ri xumej-pe ri David chuwi-kiq'a' ri etzelanel kichin, xecha'.

²¹ Toq ri David xapon chuchi' ri ch'uti'n raqen-ya' Besor ri akuchi ek'o-wi kan ri e 200 achi'a' ri xekanej kan roma maneq chik kuchuq'a', rije' xebe richin xebekik'ulu' ri David y ri achi'a' ri e beneq rik'in. Y toq ri David xapon kik'in ri winaqi' ri' xuya' rutzil kiwech.

²² K'ari' xech'on-apo ri jujun itzel taq achi'a' ri e beneq rik'in y xkibij: Roma k'a man xebe ta chiqij, man xtiqaya' ta chike ri xqakol-pe chuwi-kiq'a' ri e etzelanel qichin. Xaxe k'a tiya-el chike ri kixjayilal, y ri kalk'ual; kekik'uaj-el y kebe, xecha'.

²³ Jak'a ri David xubij: Man tiben keri' wach'alal rik'in ri xuya' chiqe ri Jehová ri kan xojruto' y xuya' pa qaq'a' ri e itzel taq achi'a' ri xeyakatej-pe chiqij roj.

²⁴ ¿Achike ta k'a xtak'axan iwichin rik'in re', roma junan xtiya'ox chike ri xebe pan oyowal y ri xechajin kan ri qak'amon-pe? Kan junan k'a xtiya'ox chike, xcha'.

²⁵ Y kan keri' xbanatej, chi kan ja q'ij ri' ri David xuben chire chi kan xok jun pixa', y jun chojmirisabel ri chiri' pan Israel.

²⁶ Toq ri David xapon pa tinamit Siclag, xuteq-el juba' chire ri ruk'amon-pe chuwi-kiq'a' ri etzelanel kichin chike ri achi'a' aj-Judá ri k'o kiq'ij ri kan e rachibil. Y xubij-el chike: Wakami ninsipaj-el juba' chiwe ri qak'amon-pe chuwi-kiq'a' ri etzelanel richin ri Jehová, xcha'.

²⁷ Xuteq-el juba' chike ri ek'o pa Betel, pa Ramot, ri ek'o pa xokon, ri ek'o pa Jatir,

²⁸ pan Aroer, pa Sifmot, pan Estemoa,

²⁹ pa Racal, pa Jerahmeel, pa kitinamit ri quenita,

³⁰ pan Hormá, pa Corasán, pan Atac

³¹ y pan Hebrón. Xuya' chike konojel ri akuchi e q'axineq-wi-el ri David e rachibilan ri achi'a' ri e beneq rik'in.