1 Sam 3 - Kaqchiquel Bible

Ri Dios nroyoj ri Samuel

¹ Ri ti ala' Samuel nuben ri rusamaj ri Jehová chuxe' rutzij ri sacerdote Elí. Y chupan ri q'ij ri' man beneq ta ruwech k'o jun wineq ri k'o niq'alajirisex chuwech roma ri Jehová, y man nuk'ut ta ri' chikiwech pa kachik'.

² Xapon k'a jun q'ij toq ri Elí man kan ta chik nitzu'un roma nimoyir yan y chupan k'a ri aq'a' ri' kotz'ol pa rachoch ri akuchi niwer-wi.

³ Y ri Samuel niwer k'a pa rachoch ri Jehová ri akuchi k'o-wi ri káxa richin ri rujikibel-tzij ri Dios. Y toq man jani tichup-qa ri ruq'aq' ri Dios,

⁴ jari' toq ri Jehová xroyoj ri Samuel. Y ri Samuel xubij: Jare' ink'o wawe' táta, xcha'.

⁵ Y junanin xbe rik'in ri Elí y xubij: Jare' ink'o táta ¿Achike roma xinawoyoj?, xcha'. Y ri Elí xubij chire chi maneq royon, y tibekotz'e' chik jun bey.

⁶ Y xoyox chik k'a jun bey ri Samuel roma ri Jehová. Y ri Samuel xyakatej chik el jun bey y xbe rik'in ri Elí, y xubij chire: Jare' ink'o táta, xcha'. Y ri Elí xubij chik jun bey chire chi maneq royon y tibekotz'e' chik.

⁷ Ri ti ala' Samuel man jani k'a tretamaj ruch'abel ri Jehová, roma man jun bey ch'owineq ta rik'in.

⁸ Y roma ri', toq xoyox-pe pa rox mul, ri Samuel xbeyakatej chik pe jun bey y xbe rik'in ri Elí y xubij chire: Jare' ink'o táta, ¿achike roma yinawoyoj?, xcha'. Jari' toq ri Elí xq'ax chuwech chi ja ri Jehová noyon richin ri Samuel.

⁹ Y ri Elí kan xubij k'a chire ri Samuel: Kabiyin y kabekotz'e'. Y wi xkatoyox chik pe jun bey, kere' k'a tabij: Kach'on-pe Jehová, roma yin ri in asamajel kan xkatinwak'axaj, kacha', xcha' ri Elí. Y ri Samuel xbekotz'e' chik jun bey.

¹⁰ Y ri Jehová xapon k'a y xoyon achi'el ri rubanon-pe. K'ari' ri Samuel xubij achi'el ri xbix chire roma ri Elí.

¹¹ Y ri Jehová xubij k'a chire ri Samuel: Yin k'o jun ri xtinbenbana' kik'in ri awinaq israelita. Ri xke'ak'axan kan xtikik'en k'a nukiy.

¹² Toq xtapon k'a ri q'ij ri', xtinbenbana' ri nubin chire ri Elí, pa kiwi' ri aj pa rachoch y pa kiwi' ri e rijatzul.

¹³ Y kan xtink'ut k'a chuwech chi ja yin xkiq'aton-tzij pa ruwi' rija' y pa kiwi' ri aj pa rachoch, roma rija' retaman chik ri itzel taq kibanobal ri e ruk'ajol ri nikiben chinuwech. Y rija' kan xretamaj y man e relesan ta el chiri'.

¹⁴ Roma ri' kan ninya' nutzij kik'in ri aj pa rachoch ri Elí chi ri itzel taq kibanobal kan man xtitojtej ta, ni rik'in kamelabel, ni rik'in sipanik, xcha' ri Dios.

¹⁵ Y ri Samuel xk'oje' chiri' pa ruwarabel, y k'a toq xseqer na, k'ari' xyakatej-el. K'ari' xujeq ruchi' ri rachoch ri Jehová, y rija' k'o rukiy chuwech chi nuq'alajirisaj chire ri Elí ronojel ri xbix chire roma ri Jehová.

¹⁶ Y ri Elí xroyoj k'a ri Samuel, y ri Samuel xubij: Jare' ink'o táta, xcha'.

¹⁷ Y ri Elí xuk'utuj chire: ¿Achike xubij ri Dios chawe? Nink'utuj jun nimalej utzil chawe richin man tawewaj ri achike xbix chawe. Wi rat man xtabij ta chuwe ri xbix chawe, ri Dios kan ta xtuya' k'a ri ruk'ayewal pan awi' rat, xcha' chire.

¹⁸ Y ri Samuel xutzijoj k'a ronojel chire ri Elí ri xbix chire, y man jun xrewaj. K'ari' ri Elí xubij: Ja rija' ri Jehová, y tubana' pa nuwi' ri achike ri niqa' chuwech, xcha'.

¹⁹ Ri Samuel xk'iy-q'anej y ri Jehová kan k'o-wi rik'in, y kan xbanatej k'a ronojel ri xubij ri Jehová chire.

²⁰ Y chijun k'a ri ruwach'ulew Israel, ri nitiker-el pa tinamit Dan ri k'o pa xaman y napon k'a pa Beerseba ri k'o pa xokon, k'a chiri' xapon-wi rutzijol chi ri Samuel kan qitzij chi q'alajirisey ruch'abel ri Jehová.

²¹ Ri Jehová kan xuchop xuq'alajirisaj chik ri' jun bey chiri' pa Siló, akuchi xch'on-wi rik'in ri Samuel. Y ri Samuel nuq'axaj k'a chike ri ruwinaq ri nubij-pe ri Jehová chire.