1 Sam 29 - Kaqchiquel Bible

Ri aj-Filistea man xkikuquba' ta kik'u'x rik'in ri David

¹ Ri aj-Filistea xekimol konojel ri tzobaj aj-labal chiri' chupan ri tinamit Afec, y ri aj-Israel xek'oje-qa chiri' chunaqaj ri ralaxbel-ya' ri k'o pa Jezreel.

² Ri e aj-raqen ri ek'o pa kiwi' ri aj-Filistea kan e beneq k'a pa taq tzobaj, e beneq pa taq wok'al y pa taq 1,000 achi'a', y ri David e rachibilan ri achi'a' e beneq chirij ri Áquis.

³ K'ari' ri e aj-raqen kichin ri aj-Filistea xkik'utuj chire ri rey Áquis: ¿Achike nikiben re taq achi'a' hebreo wawe'?, xecha'. Ri rey Áquis xubij chike: Re' jare' ri David ri rusamajel ri Saúl ri rey richin Israel, ri kan k'o-pe wik'in k'o yan chik pe jun juna' ri', roma kan ja ri q'ij toq xoqaqa qik'in y k'a re wakami man jun itzel wilon ta chirij, xcha'.

⁴ Jak'a ri aj-raqen kichin ri aj-Filistea janila xyakatej koyowal chire ri ki-rey y xkibij chire: Tataqa-el la achin la'. Titzolin chiri' chupan ri tinamit ri akuchi aya'on-wi, y man nibe ta chiqij roj pan oyowal, roma rik'in juba' pan oyowal xa nupiskolij-ri' chiqij y nok etzelanel qichin. Roma ¿Achike ta chik k'a xtuben richin nuch'ek chik ri rajowabal ri rey Saúl? Xaxe k'a wi yojrukamisaj roj.

⁵ ¿Man ja ta kami David re', ri xebixan ri winaqi' chirij y xkibij: Ri Saúl xaxe e 1,000 xerukamisaj, Jak'a ri David e 10,000?, xecha'.

⁶ K'ari' ri rey Áquis xroyoj ri David y xubij chire: Kan qitzij ninbij chawe chi rat kan at choj-wi, kan janila at qajineq chinuwech y ninrayij chi yabe ta wik'in pan oyowal. Roma kan ja ri q'ij toq xatoqaqa qik'in y k'a re wakami man jun itzel nutz'eton chawij, jak'a ri aj-raqen kan man yaqa' ta chikiwech.

⁷ Wakami k'a katzolin kan y kabiyin rik'in uxlanibel-k'u'x, richin chi man itzel nikina' chawe ri e aj-raqen, xcha' ri rey Áquis chire.

⁸ K'ari' ri David xuk'utuj chire ri rey Áquis: ¿Achike k'a nubanon yin ri in asamajel? ¿Achike k'a ri itzel xawil chuwij yin, ri q'ij toq xinoqaqa awik'in y k'a re wakami, richin chi yin man yibe ta pan oyowal y nintej nuq'ij richin ninben oyowal kik'in ri etzelanel awichin rat, wajaw, nu-rey?, xcha' ri David.

⁹ Y ri Áquis xubij chire ri David: Yin wetaman chi rat janila at utz, kan at achi'el jun ángel richin ri Dios. Jak'a ri e aj-raqen xkibij chi man yabe ta qik'in pan oyowal.

¹⁰ Roma ri' chua'q nimaq'a' yan, kayakatej rat y ri samajela' ri e peteneq chawij, y kixbiyin, xcha' ri rey Áquis chire.

¹¹ K'ari' ri David y ri rusamajela' xeyakatej nimaq'a' yan richin xebe y xetzolej pa kiruwach'ulew ri aj-Filistea, y ri aj-Filistea xejote-q'anej pa tinamit Jezreel.