1 Sam 28 - Kaqchiquel Bible

¹ Chupan ri q'ij ri' ri aj-Filistea xekimol k'a konojel tzobaj aj-labal, y xa jun xkiben richin nibekibana' oyowal kik'in ri aj-Israel. K'ari' ri rey Áquis xubij chire ri David: Awetaman chi rat y ri aj-labal ri ek'o awik'in k'o chi yixbe wik'in pan oyowal, xcha'.

² Y ri David xubij chire ri rey Áquis: Wakami k'a xtatz'et achike ri xtinbenbana' yin ri asamajel, xcha'. Y ri rey Áquis xubij chire ri David: Yin kan xkatinya' richin yatok chajiy wichin richin jantape', xcha'.

Ri Saúl xbe rik'in ri jun ixoq aj-itz ri aj-Endor

³ Ri Samuel xken yan el y chijun tinamit Israel kan janila xkibisoj. Xkimuq k'a pa rutinamit chiri' pa Ramá. Y ri rey Saúl e relesan chik k'a el chupan ri kiruwach'ulew konojel ri yek'uluben kaminaqi' y ri nikibananej chi ketaman ri peteneq chikiwech.

⁴ Ri aj-Filistea xkimol k'a ki' y xepe pa tinamit Sunem, y chiri' xek'oje-wi. Ri Saúl chuqa' xerumol k'a konojel ri ruwinaq y xebek'oje' pa Guilboa.

⁵ Y ri Saúl toq xutz'et ri akuchi ek'o-wi-qa ri aj-Filistea, janila xuxibij-ri'.

⁶ K'ari' xberuk'ulubej ri Jehová, jak'a man xk'ulubex ta ri ruch'abel; ni pa rachik', ni koma ri sacerdote, ni koma ri q'alajirisey ruch'abel ri Dios.

⁷ Ri Saúl xubij chike ri rusamajela' chi tikikanoj jun ixoq ri kan nitikir yeruk'ulubej kaminaqi' richin nibe rik'in. Y ri rusamajela' xkibij chire chi pa tinamit Endor k'o jun ixoq ri kan nitikir nich'on kik'in kaminaqi'.

⁸ K'ari' ri Saúl xujel k'a el ri rutziaq richin rey, richin man netamex ta ruwech, y xebe k'a e rachibilan-el e ka'i' achi'a'. Y toq xe'apon rik'in ri ixoq, rija' xubij chire: Tabana' utzil kach'on kik'in ri kaminaqi' y tawoyoj ri xtinbij chawe yin, xcha'.

⁹ Jak'a ri ixoq xubij chire: Rat jebel awetaman achike xuben ri Saúl, toq xerelesaj-pe chupan ri qaruwach'ulew konojel ri nikik'ulubej kaminaqi' y ri nikibananej chi ketaman ri peteneq chikiwech. ¿Achike k'a roma naya' re jun pikbel re' chuwe ri xa nuk'en-pe kamik chuwe?, xcha'.

¹⁰ Jak'a ri Saúl xubij chire ri ixoq: Ninya' nutzij chuwech ri Jehová chi rat kan man jun xtabek'uluwachij roma re', xcha' ri Saúl.

¹¹ K'ari' ri ixoq xuk'utuj chire ri achike nrajo'. Y ri Saúl xubij chi turoyoj-pe ri Samuel.

¹² Jak'a toq ri ixoq xutz'et ri Samuel, kan xsik'in k'a y k'ari' xubij chire ri Saúl: ¿Achike roma xinaq'ol? ¡Xa kan ja rat ajk'a ri at Saúl!, xcha'.

¹³ Y ri rey xubij chire chi man tuxibij-ri'. Y xuk'utuj ri achike k'a ri xutz'et. Y ri ixoq xubij chire: Nintz'et achi'el rubanik jun wineq aj-chikajil jotol-pe chuwech re ruwach'ulew, xcha'.

¹⁴ K'ari' ri Saúl xuk'utuj chire ri achike k'a ri rubanik. Y ri ixoq xubij: Jotol-pe jun achin ti ri'j-ri'j chik y kan rupison-pe-ri' pa tzieq, xcha'. Ri Saúl xq'ax chuwech chi rija' ja ri Samuel, xulukuba-qa-ri' k'a pan ulew y xxuke-qa chuwech.

¹⁵ K'ari' ri Samuel xuk'utuj chire ri Saúl: ¿Achike roma xaben chuwe richin chi yin xipe?, xcha'. Y ri Saúl xubij chire: Yin janila sachineq nuk'u'x, roma ri aj-labal aj-Filistea nokibana' oyowal qik'in, y ri Dios kan ruch'aron-el-ri' wik'in. Kan man nuk'uluba' ta chik pe ri nuch'abel, ni kik'in ri q'alajirisey ri ruch'abel, ni ta pa wachik'. Roma ri' xatinwoyoj, richin naq'alajirisaj chinuwech achike nik'atzin richin ninben, xcha'.

¹⁶ K'ari' ri Samuel xubij: ¿Achike k'a roma nak'utuj chuwe yin? Roma awetaman chik chi ri Jehová kan xujech'ej yan el ri' awik'in, y xa kan xok etzelanel awichin.

¹⁷ Rija' xuben achi'el ri xinq'alajirisaj chawe, roma ri Jehová xrelesaj ri q'atbel-tzij pan aq'a', y xuya' yan pa ruq'a' ri David ri awachibil.

¹⁸ Roma man xanimaj ta rutzij ri Jehová y man xaben ta ri xubij chawe toq yakatajineq janila royowal chikij ri amalecita, y xubij chawe chi ke'ak'isa' kan jumul. Roma ri' kere' xuben chawe wakami.

¹⁹ Chuqa' ri Jehová xkarujech rat y chuqa' ri aj-labal pa kiq'a' ri aj-Filistea. Roma ri' chua'q, rat y ri e ak'ajol xkixbek'oje' qik'in chiqakojol ri oj kaminaqi' chik, xcha' ri Samuel chire.

²⁰ K'ari' ri Saúl xbaqabo-qa pan ulew, y kan janila xuk'en rukiy roma ri xubij ri Samuel chire. Kan man jun chik k'a ruchuq'a', roma man wayneq ta chijun q'ij y chijun aq'a'.

²¹ K'ari' ri ixoq xjel-apo rik'in ri Saúl y toq xutz'et chi kan janila ruxibin-ri' xubij chire: Yin ri in asamajel kan xinnimaj atzij. Kan xinya' pa k'ayew ri nuk'aslen y kan xinben ri xabij chuwe.

²² Wakami k'a, nink'utuj utzil chawe chi tawak'axaj ri nuch'abel. Taya' q'ij chuwe richin ninya' juba' away richin chi yawa-el y nik'oje-el juba' awuchuq'a' y yatikir yatzolej, xcha' ri ixoq.

²³ Jak'a ri Saúl xubij chi man niwa' ta. Jak'a ri e rusamajela' ri e beneq rik'in y ri ixoq, xkitej kiq'ij chirij, k'ari' rija' xunimaj kitzij. K'ari' xyakatej-q'anej pan ulew y xtz'uye' pa ch'at.

²⁴ Ri ixoq ri' k'o jun ti nima-alaj achij wákix rik'in ri jebel ti'ojirisan, y chi'anin xukamisaj. K'ari' xberuk'ama-pe juba' k'ej y xuben kaxlan-wey chire ri maneq ch'amilej-q'or rik'in.

²⁵ Y xuya' chire ri Saúl y chike ri rusamajela' richin xewa'. Toq e wayneq chik, xebe y xetzolej chupan ri aq'a' ri'.