1 Sam 27 - Kaqchiquel Bible

Ri David xberewaj-ri' chikikojol ri aj-Filistea

¹ Ri David xubij-qa pa ránima: K'o na jun q'ij xkiberukamisaj ri Saúl. Wakami k'a, más utz yinanimej-el chi'anin y yibe pa kiruwach'ulew ri aj-Filistea, richin chi man yiruch'ob ta chik, y man chaq yirukanoj ta chupan re ruwach'ulew Israel. Keri' xtinkol-el-wi' pa ruq'a', xcha-qa.

² Xbe k'a ri David e rachibilan-el ri e 600 achi'a'. Y xebe k'a rik'in ri rey Áquis ruk'ajol ri Maoc, rey richin ri tinamit Gat.

³ Rija' y ri achi'a' kachibilan ri kixjayilal y ri kalk'ual, y ri David rik'in ri e ka'i' rixjayil: Ri Ahinóam, y ri Abigail rixjayil kan ri ánima Nabal aj-Carmel.

⁴ Xapon k'a rutzijol rik'in ri Saúl chi ri David xanimej-el y k'o pa tinamit Gat, y keri' man xukanoj ta chik.

⁵ K'ari' ri David xubij chire ri rey Áquis: Wi rat niqa' chawech, tabana' utzil chi taya' q'ij chuwe chi yik'oje' chupan jun ti ko'ol tinamit, roma yin xa in jun asamajel, y kan man ruk'amon ta chi yin ink'o-qa re wawe' awik'in chupan re nimalej tinamit, xcha'.

⁶ Chupan ri q'ij ri' ri rey Áquis xuya' ri tinamit Siclag chire. Roma ri' ri tinamit Siclag xok kan kichin ri rey ri e richin Judá.

⁷ Y ri David xk'oje' k'a chiri' pa kiruwach'ulew ri aj-Filistea, jun juna' rik'in kaji' ik'.

⁸ Rija' y ri aj-labal, xebe richin yebekik'isa' ri winaqi' aj-Guesur, ri aj-Guézer y ri amalecita. Re winaqi' re' kan ojer yan ri' ek'o-pe chupan ri ruwach'ulew ri', nitiker-pe pa ruchojmilal ri Sur y napon k'a pan Egipto.

⁹ Y xabakuchi k'a niberubana' oyowal ri David, kan chi achi'a' chi ixoqi' yerukamisaj kan. Man jun k'a nuya' kan ruk'aslen. Y chuqa' yeruk'uaj k'a el ri karne'l, ri wákix, ri bur, ri camello y ri kitziaq ri winaqi'. K'ari' nitzolin k'a rik'in ri rey Áquis.

¹⁰ Y ri rey Áquis nuk'utuj k'a chire: ¿Achike k'a tinamit xixok-wi wakami?, nicha'. Y ri David nubij chire: Xojok chupan ri tinamit ri k'o pa xokon chire ri tinamit Judá, o ri k'o pa xokon akuchi ek'o-wi e rijatzul ri Jerahmeel, o pa xokon chire ri kiruwach'ulew ri quenita, nicha'.

¹¹ Ri David kan man jun k'a nuya' kan rik'in ruk'aslen, ni ta achin, ni ta ixoq, richin chi man ye'apon ta pa Gat, y nibekiya' rutzijol ri achike najin chubanik rija'. Keri' xuben janipe' q'ij xk'ase' chiri' kik'in ri aj-Filistea.

¹² Ri rey Áquis kan xukuquba' ruk'u'x rik'in ri David, y xubij-qa: Ri winaqi' aj-Israel kan itzel chik nikina' chire, y roma ri' rija' xtok nusamajel richin q'asen, xcha-qa.