1 Sam 26 - Kaqchiquel Bible

Ri David man jun chik xuben chire ri Saúl toq k'o pa Zif

¹ Ri David rewan-ri' chiri' pa juyu' Haquilá, ri k'o pa relebel-q'ij chire ri tz'iran ruwach'ulew.

² Y ri Saúl xbe k'a qa pa tz'iran ruwach'ulew Zif, y e rachibilan-el e 3,000 aj-labal ri e rucha'on-el chikikojol ri aj-Israel, richin xbekikanoj ri David chiri' pa tz'iran ruwach'ulew Zif.

³ Y ri Saúl xk'oje' k'a qa chiri' chunaqaj ri bey ri nibe pa juyu' Haquilá ri k'o pa relebel-q'ij chire ri tz'iran ruwach'ulew. Jak'a ri David, kan k'o chiri' pa tz'iran ruwach'ulew, y xunabej chi ri Saúl kan rutzeqeliben-el k'a chiri'.

⁴ K'ari' rija' xeruteq el nachanela' y kan xunabej chi kan qitzij xapon chiri' ri Saúl.

⁵ Y ri David xbe y xapon k'a akuchi k'o-wi-qa ri Saúl. Rija' xutz'et jebel akuchi xewer-wi-qa ri Saúl y ri Abner, ruk'ajol ri Ner. Y ri Saúl kan niwer k'a chiri' ri akuchi k'o-wi-qa y kan kisutin-ki' chirij.

⁶ Ri David xuk'utuj chire ri Ahimélec hitita y chire ri Abisai rach'alal ri Joab, y xubij: ¿Achike nrajo' nibe chuwij rik'in ri Saúl chiri' akuchi ek'o-wi-qa?, xcha'. Y ri Abisai xubij chi ja rija' nibe chirij.

⁷ K'ari' ri David y ri Abisai chupan ri aq'a' ri' xebe kik'in ri aj-labal ri ek'o rik'in ri Saúl. Y rija' kotz'ol, y jebel k'a niwer chiri', y ri rukum ruch'ikiban kan pan ulew chunaqaj ri ruch'akat-ruwi'. Ri Abner y ri aj-labal, konojel yewer y kisutin rij ri Saúl.

⁸ K'ari' ri Abisai xubij chire ri David: Wakami ri Dios xujech pan aq'a' ri etzelanel awichin. Wakami taya' k'a q'ij chuwe richin ninkamisaj rik'in la rukum, pa jun bey xtinch'ikiba' pan ulew y man k'atzinel ta xtinya' chik jun chire, xcha'.

⁹ Jak'a ri David xubij chire: Man takamisaj roma ri achike xtikamisan richin ri rey ri kan cha'on roma ri Jehová, kan xtiqaqa rutojbalil pa ruwi'.

¹⁰ Kan k'es ri Jehová, chi kan ja rija' ri xtikamisan richin toq xtapon ruq'ij y xtiken, o toq xtibe pa jun oyowal chiri' xtiken-wi.

¹¹ Jak'a ri Jehová xkiruto' richin man ta xtinjeluj nuq'a' chirij ri cha'on roma Rija'. Wakami k'a, tak'uaj-el la rukum ri k'o chunaqaj la ruch'akat-ruwi' y la ruk'ojelibal-ruya', y jo', xcha'.

¹² Ri David xuk'uaj k'a el ri rukum y ri ruk'ojelibal ruya' ri ruya'on kan chunaqaj ri ruch'akat-ruwi', y xebe. Man jun k'a xtz'eton-el kichin, ni man jun k'a xnaben-el kichin y man jun xna'on ruwech. Konojel k'a jebel yewer, roma ri Jehová xuben chike chi xqa' jun waran pa kiwi'.

¹³ K'ari' ri David xq'ax-apo pa ruwi' ri jun chik juyu' ri k'o juk'an-apo. Kan janila k'a nej ri kikojol chi e ka'i'.

¹⁴ Y rija' xsik'in k'a apo chike ri aj-labal y chire ri Abner y xubij: Abner, tak'uluba' k'a pe ri nuch'abel, xcha'. Y ri Abner xubij: ¿At achike k'a rat richin yasik'in-pe chirij ri rey?, xcha'.

¹⁵ Y ri David xubij chire ri Abner: Rat kan at jun achin y kan man jun achoq ik'in xkajunamex-wi chikikojol ri qawinaq. ¿Achike roma man achajin ta jebel ri rey ri awajaw? Roma k'o jun ri xok-apo richin xrajo' xberukamisaj kan ri rey ri awajaw.

¹⁶ Re xaben, kan man utz ta. Pa rubi' ri Jehová, ninbij chi rat y ri achi'a' ri e awachibilan-pe kan ruk'amon ta richin yixkamisex, roma kan man ichajin ta ri rey ri iwajaw, ri kan cha'on roma ri Jehová. Wakami, tatz'eta' akuchi k'o-wi ri rukum ri rey y ri k'ojelibel ruya' ri k'o kan chunaqaj ri ruch'akat-ruwi', xcha'.

¹⁷ Ri Saúl xrak'axaj k'a ri ruch'abel ri David, y xubij: ¿Ja ach'abel rat David ri at achi'el nuk'ajol ri ninwak'axaj?, xcha'. Y ri David xubij chi ja rija'.

¹⁸ Y chuqa' xubij: Rat wajaw, ¿achike k'a roma in atzeqeliben yin ri in asamajel? ¿Achike k'a nubanon yin? ¿Achike k'a etzelal nubanon chawe?

¹⁹ Wakami k'a wajaw tabana' utzil tawak'axaj k'a ri nuch'abel yin, ri asamajel. Wi ja ri Jehová xbin chawe richin yayakatej chuwij, rik'in juba' rija' xtuk'ul ta jun sipanik chiqawech ri xtiqasuj chire. Jak'a wi ja ri achi'a' ri xetaqchi'in awichin, ri Jehová xtuben chi xtiqaqa itzel pa kiwi', roma kan xinkelesaj-pe richin chi yin man yinichinan ta kik'in chupan ri qaruwach'ulew. Rije' chuqa' xkibij chi yin xkensamajij ch'aqa' chik dios.

²⁰ Wakami k'a, man ta xkiken yin nej chire ri qaruwach'ulew, roma rat kan at eleneq-pe chi nukanoxik achi'el nikanox jun k'eq y achi'el toq nikanox jun saqkorowach pa q'ayis, xcha' ri David.

²¹ K'ari' ri Saúl xubij: In makuwineq chawech rat David ri at achi'el nuk'ajol. Katzolej k'a pe, roma xa man jun chik k'a xtinben chawe, re chiqawech-apo, roma rat kan janila apoqonan ri nuk'aslen. Yin kan man utz ta nubanon awik'in roma kan nubanon achi'el ta jun achin nakanik y kan man utz ta nubanon, xcha' ri Saúl.

²² Y ri David xubij: Ri akum jare' k'o wawe'. Tipe k'a jun chike ri asamajel, y toruk'ama-el.

²³ Y ja ta ri Jehová xtiya'on rajel ruk'exel chuwe achi'el ri ruchojmilal ri xinben, roma rija' kan xarujech pa nuq'a' wakami. Jak'a yin man xinwajo' ta xinjeluj nuq'a' chawij rat ri kan at cha'on roma ri Jehová richin at okineq rey.

²⁴ Y achi'el ta yin ri kan janila rejqalen ri ak'aslen chinuwech re q'ij re', kan keri' ta k'a chuqa' ri nuk'aslen yin chuwech ri Jehová. Rija' kan xkirukol ta chuwech ronojel tijoj-poqonal, xcha' ri David.

²⁵ Y ri Saúl xubij k'a chire ri David: Utz ruwa-aq'ij David, ri at achi'el nuk'ajol. Rat kan xtabebana' nima'q taq samaj y kan ronojel utz xtuben chawech, xcha'. K'ari' ri David choj xbe chupan ri rubey, y ri Saúl xtzolej kan akuchi peteneq-wi.