1 Sam 25 - Kaqchiquel Bible

Ri rukamibal ri Samuel

¹ Xken k'a ri Samuel y konojel ri israelita xbekimuqu' kan pa rutinamit Ramá, roma chiri' k'o-wi ri rachoch, y konojel janila xe'oq' chirij. Y ri David xberewaj-ri' chupan ri tz'iran ruwach'ulew rubini'an Parán.

Ri David y ri Abigail

² Y chiri' pa tinamit Maón k'o k'a jun achin janila beyom, y k'o jun rachoch pa tinamit Carmel. Ek'o k'a e 3,000 rukarne'l y e 1,000 tzuntzun, y chiri' nusokaj-wi ri kisumal ri taq karne'l.

³ Ri achin ri' rubini'an Nabal rijatzul kan ri Caleb y kan janila itzel achin. Ri rixjayil rubini'an Abigail, jun ixoq janila nowineq y kan jebel ok.

⁴ Toq ri David k'o chiri' pa tz'iran ruwach'ulew, jari' toq xrak'axaj chi ri Nabal nusokaj kisumal ri rukarne'l pa Carmel.

⁵ Jari' toq rija' xeruteq-el lajuj alaboni' chiri', y xubij-el chike chi kebiyin-q'anej rik'in ri Nabal pa Carmel, y kere' k'a xubij-el:

⁶ Ninwajo' chi nik'oje' uxlanibel-k'u'x awik'in y chuqa' kik'in ri ek'o pan awachoch y konojel ri ek'o awik'in.

⁷ Yin xinnabej chi rat yatajin chusokaxik-kij ri akarne'l. Ninwajo' k'a chi nawetamaj chi janipe' xek'oje' ri ayuq'unela' chiqakojol roj re wawe' pa Carmel, kan man jun itzel xqaben chike, ni man jun xqamej chike.

⁸ Tak'utuj na pe chike ri asamajela', y rije' xkebin chawe. Wakami k'a, ja q'ij re' richin nimaq'ij y roma ri' tabana' k'a pe utzil chike re alaboni' re'. Xtaya' ta pe chike rije' ri nink'utuj-el chawe. Ri achike ta k'o awik'in richin nitij, xtasipaj ta pe juba' chiqe, xcha-el ri David.

⁹ Y toq xe'apon ri alaboni' ri e taqon-el roma ri David, xkibij chire ri Nabal ri ch'abel ri bin-el chike. Y xkoyobej ri achike nubij rija'.

¹⁰ Y rija' xubij chike: ¿Achike ta k'a ri David? Y ¿achike ta k'a ri ruk'ajol ri Isaí? Wakami janila samajela' ri e yuqul pa samaj ri ye'animej-el chikiwech ri kajaw.

¹¹ ¿Utz kami ninchop-el ri nukaxlan-way y ri ti'ij nuchojmirisan chik kichin ri nusamajela' ri yesokan ri karne'l, y ninya' chike ri achi'a' ri xa man wetaman ta kiwech y akuchi na kepe-wi?, xcha' ri Nabal.

¹² K'ari' ri alaboni' ri' xetzolej k'a el chupan ri kibey, y xe'apon rik'in ri David, y xkibij chire ronojel ri ch'abel ri xbix-el chike roma ri Nabal.

¹³ K'ari' ri David xubij chike ri achi'a' ri ek'o rik'in: Tixima' jebel ri i-espada chi'ijujunal y chuqa' yin keri' xtinben, xcha'. Y xkiximila' k'a el ri ki-espada xekipan ri achi'a' y keri' chuqa' xuben ri David. Y xebe e 400 achi'a' chirij y ri e 200 chik xkichajij kan ronojel ri nikikusaj.

¹⁴ Y k'o k'a jun chike ri rusamajela' ri Nabal xberubij chire ri Abigail ri ixjayilonel y xubij chire: Ri David xeruteq-pe ya'ol rutzijol ri e peteneq k'a kela' pa tz'iran ruwach'ulew richin xokiq'ejela' ri wajaw, jak'a rija' xa janila xeruyoq'-el.

¹⁵ Y ja achi'a' ri' ri janila e utz kibanon qik'in roj; kan man jun bey xkiben ta itzel chiqe. Kan janila e utz y man jun xkeleq'aj chiqe toq xojk'oje' chikikojol ri chiri' pa juyu'.

¹⁶ Rije' xojkito' y xojkichajij chi paq'ij chi chaq'a', achi'el xa ta jun tz'aq chiqe roj ronojel q'ij toq yojyuq'un.

¹⁷ Jak'a ri wajaw kan janila banoy etzelal, y man jun nitikir nich'on rik'in. Wakami k'a, rat tach'obo' ri achike nabebana'. Roma xa kan k'o xtibeqak'uluwachij roj, ri wajaw y qonojel roj ri oj aj pa rachoch, xcha' ri samajel.

¹⁸ K'ari' ri Abigail chi'anin xberuk'ama-pe 200 kaxlan-wey, ka'i' tz'um vino, wo'o' karne'l q'anarisan, ka'i' arroba jalajoj ruwech ixin k'ilin, wok'al tzeqaj uva chaqi'j y 200 peraj wíkix ri chaqirisan. Ronojel re' xuya-el chikij ri taq bur.

¹⁹ K'ari' xubij chike ri rusamajela': Kixik'o-el chinuwech y yin xkixintzeqelibej-el, xcha'. Y kan man jun xubij kan chire ri rachijil.

²⁰ Xch'oke' k'a el chirij jun bur y xbe-qa pa jun ti bey chukojol juyu'. Y jari' chuqa' toq ri David y ri achi'a' ri ek'o rik'in e xulan-pe chuwech-apo rija'.

²¹ Ri David k'a juba' tubij-qa: Xa man jun ajk'a xuq'ajuj ri xqachajij ri rukarne'l ri Nabal ri ek'o pa tz'iran ruwach'ulew richin man jun xsach kan chike, xa rik'in itzel xutojbej-wi ri utzil ri xqaben roj chire.

²² Ri Dios kan ta xtuya' nimalej ruk'ayewal pa nuwi' yin, wi ri chua'q toq xtiseqer-q'anej k'a k'es na ri Nabal o jun chike ri achi'a' ri ek'o rik'in rija', xcha-qa.

²³ Y toq ri Abigail xutz'et-apo ri David, jari' toq chi'anin xqaqa-qa chirij ri bur, y xulukuba-qa-ri' chuwech, k'a pan ulew.

²⁴ K'ari' xjel-apo chiraqen y xubij chire: Wajaw, kan pa nuwi' ta k'a yin xtiqaqa-wi ronojel re mak re'; taya' q'ij richin yich'on awik'in y kan xtawak'axaj ta k'a ronojel ri xtinbij chawe yin ri in asamajel.

²⁵ Man tanimaj rutzij ri jun achin ri'; rija' kan banoy etzelal. Roma ri' rija' Nabal ri rubi', nel chi tzij ch'u'j, y man nich'obon ta chi utzil. Yin ri in asamajel man xentz'et ta pe ri alaboni' ri xe'ateq qik'in.

²⁶ Ri Jehová xq'aton awichin richin xaben ta kamik, richin ta xaben ruk'exel chike ri xebanon itzel chawe. Kan ja ta k'a ri Jehová xtibanon chi konojel ri e etzelanel awichin y chuqa' ri nikich'ob itzel chawij, xtikik'uluwachij ta achi'el xtiberuk'uluwachij ri Nabal.

²⁷ Y wakami nuk'amon-pe jun sipanik chawe richin xtataluj chikiwech ri achi'a' ri ek'o awik'in.

²⁸ Yin nink'utuj utzil chawe richin takuyu' numak yin ri in samajel, roma kan jikil chi ri Jehová xtuben chawe chi ri aq'atbel-tzij xtijike' kik'in ri awijatzul. Xtuben kere' roma rat kan ja wi ri oyowal richin rija' naben. Y man jun ta k'a etzelal xtaqajbej chupan chijun ri ak'aslen.

²⁹ Stape' kan k'o jun yakatajineq chawij y kan at ruq'eleben richin yarukamisaj, jak'a rat man jun xtak'uluwachij, roma rat kan atk'o pa ruq'a' ri Jehová ri qa-Dios. Jak'a ri kik'aslen ri etzelanel awichin kan xkek'aq ta roma ri Dios achi'el nik'aq jun abej rik'in ri ikeq'.

³⁰ Y keri' toq ri Jehová xtuben awik'in ronojel ri utz ri rusujun chawe, toq xkarujikiba' richin yatok tata'al pa ruwi' ri qaruwach'ulew Israel.

³¹ Rat man xtibison ta ri awánima roma xe'akamisaj winaqi' ri xa man jun kimak, o xaya' ta ruk'exel chike; man tamestaj k'a wajaw yin, toq ri Dios xtuya' q'ij chawe richin naq'et-tzij, xkinoqaqa ta k'a chi'ak'u'x, xcha' ri Abigail.

³² K'ari' ri David xubij chire ri Abigail: Nim ruwa-ruq'ij ri Jehová Dios qichin roj, roma kan xaruteq-pe richin xojak'ulu-el wawe'.

³³ Y chuqa' rat nim ruwa-aq'ij, roma ri utzilej ach'obonik roma xinaq'et richin man xinben ta re kamik re' y kan xaben chuwe richin man ja ta yin yiya'on ruk'exel.

³⁴ Roma wi man ta xaniman-pe richin xinak'ulu-el, ri chua'q toq xtiseqer-q'anej kan man jun ta chik ri achi'a' aj pan iwachoch ri e k'es. Yin kan chuwech k'a ri Jehová ri qa-Dios ninbij ri qitzij, xcha' ri David.

³⁵ K'ari' ri David kan xuk'ul k'a kan ronojel ri uk'uan-el chire roma ri Abigail, y xubij k'a chire: Kabiyin k'a rik'in uxlanibel-k'u'x pan awachoch. Ronojel ri xabij xinwak'axaj y kan xtinben ri nawajo' rat, xcha'.

³⁶ K'ari' ri Abigail xtzolin-el y toq xapon chirachoch, ri Nabal najin chubanik jun nimaq'ij achi'el nikiben ri rey. Y roma ri ruq'abarik kan janila nikikot ri ránima y roma ri' chupan ri q'ij ri', ri Abigail man jun xubij chire k'a ja toq xseqer-q'anej ri ruka'n q'ij.

³⁷ Chupan ri nimaq'a' ri' toq xq'ax yan ri ruchuq'a' ri q'abarik chuwech ri Nabal, k'ari' toq ri Abigail xutzijoj-apo chire ri rachijil ronojel ri xbanatej. Y jari' toq ri Nabal kan xmayamo-qa ri ránima y xpe jun sikirinen chire ri ruch'akul, xk'oje' kan achi'el jun abej.

³⁸ Y pa lajuj q'ij ri Jehová xuben chire ri Nabal chi xken.

³⁹ Y toq ri David xrak'axaj chi ri Nabal xken yan, rija' xubij: Nim ruwa-ruq'ij ri Jehová roma kan ja rija' xq'aton-tzij pa ruwi' ri Nabal, y xuya' rutojbalil pa ruwi' roma xuqasaj nuq'ij. Chuqa' ri Jehová kan xiruq'et chi yin man xinben ta ri itzel chire ri Nabal, y xa kan pa ruwi' k'a rija' xqaqa-wi ri rumak, xcha'. K'ari' ri David xeruteq-el rusamajela' rik'in ri Abigail richin yech'on rik'in.

⁴⁰ Y ri rusamajela' ri David, xebe pa Carmel rik'in ri Abigail, y xbekibij chire: Ri David oj rutaqon-pe richin yatqak'uaj-el richin yatok rixjayil, xecha' ri samajela' ri'.

⁴¹ K'ari' rija' xulukuba-qa-ri' k'a pan ulew y xubij: Jare' ink'o yin ri in rusamajel ri David, richin ninch'ej kaqen ri rusamajela' rija', wi keri' nrajo', xcha' ri Abigail.

⁴² Toq xubij keri' kan jari' xuchojmirisaj-el-ri' chi'anin, y xerachibilaj-el wo'o' xtani' ri ye'ilin richin. Xch'oke' k'a el chirij jun bur y xbe chikij ri samajela' ri e taqon-el roma ri David. Y ri David kan xuben k'a qa rixjayil chire.

⁴³ Chuqa' ri jun ixoq rubini'an Ahinóam aj-Jezreel, xok rixjayil ri David.

⁴⁴ Jak'a ri Saúl xa xujech chik el ri Mical ri rixjayil ri David chire ri Paltí ruk'ajol ri Lais aj-Galim.