1 Sam 24 - Kaqchiquel Bible

¹ Y toq ri Saúl xtzolej-pe chikikamisaxik ri aj-Filistea, jari' toq xkiya-apo rutzijol chire, chi ri David k'o chik chupan ri tz'iran ruwach'ulew richin En-gadi.

² K'ari' xerucha-el e 3,000 achi'a' ri maneq xibinri'il chikiwech. Xebe richin xebekikanoj ri David y ri aj-labal ri akuchi ek'o-wi ri nima'q taq abej ri akuchi ye'ilitej-wi ri tzuntzun aj pa k'echelaj.

³ Y toq ri Saúl xapon akuchi yek'oje-wi ri tzobaj karne'l ri chuchi' bey, chiri' k'o k'a jun nimalej jul. Y rija' xok k'a apo chiri' richin xbechulun kan. Jak'a ri David y ri aj-labal xa kan k'a chupan apo ri jul ri' ek'o-wi.

⁴ Jari' toq ri aj-labal e richin ri David xkibij chire: Ja q'ij re' ri rubin ri Jehová chawe, chi xtujech ri Saúl pan aq'a'. Tabana' k'a rik'in achike nawajo' rat, xecha'. K'ari' ri David xyakatej-q'anej y eqal-eqal xtzale-apo rik'in, y chiri' xutzak'ij kan juba' ri ruchi' ri rutziaq ri Saúl.

⁵ Y toq ri David xuben yan keri' kan janila xq'axon ri ránima, roma xutzak'ij kan juba' ruchi' ri rutziaq ri Saúl.

⁶ K'ari' xubij chike ri aj-labal: Kan ja ta k'a ri Jehová xkito'on richin man jun ta itzel xtinben chire ri rey, roma rija' kan cha'on roma ri Jehová, xcha' ri David.

⁷ Rik'in k'a re ch'abel re' ri David xeruq'et ri rachibil richin man jun xkiben chire ri rey. Y ri Saúl xel k'a pe chupan ri jul y choj k'a xbe chupan ri bey.

⁸ Chi'anin k'a xel-pe ri David, xutzeqelibej-pe ri Saúl y xubij-pe chire: ¡Wajaw nu-rey!, xcha'. Y toq rija' xtzu'un kan chirij, ri David xxuke-qa y xulukuba-qa-ri' chuwech, retal richin xuqasaj-ri' chuwech ri Saúl.

⁹ Y xubij chire: Wajaw, ¿achike k'a roma nanimaj kitzij ri yebin chawe chi yin ninwajo' ninben itzel chawe?

¹⁰ Re q'ij re', rat kan xatz'et chi ri Jehová kan xarujech pa nuq'a' chiri' pa jul; y ri wachibil xkibij chuwe richin xatinkamisaj ta. Jak'a yin xinkuy amak, y man xinben ta, roma xinch'ob chi rat kan at cha'on roma ri Jehová, y roma ri' man xinjeluj ta nuq'a' chawij.

¹¹ Wajaw yin, tatz'eta' re ruchi' ri ko'ol raqen atziaq re k'o pa nuq'a'. Yin kan xintzak'ij kan, retal richin man xatinkamisaj ta. Tawetamaj k'a chi yin man jun itzel k'o pa wánima chawij rat, ni man yatinq'ol ta. Y rat yinakanoj richin nawelesaj ri nuk'aslen.

¹² Wakami k'a kan ja ta k'a ri Jehová xtiq'aton-tzij chiqakojol roj oj ka'i'. Ja ta k'a ri Jehová xtiya'on ruk'exel chawe. Jak'a yin kan man xtinjeluj ta ri nuq'a' chawij.

¹³ Achi'el nubij ri tzij; ri itzel taq banobel nel-pe kik'in ri maneq Dios chikiwech, y xa roma ri' yin man xtinjeluj ta ri nuq'a' chawij.

¹⁴ ¿Achike k'a atzeqeliben rat rey richin Israel? ¿Achike ri awojqan? ¡Yin xa maneq wejqalen! Yin xa in achi'el jun kamineq tz'i' o xa in achi'el jun ti k'eq.

¹⁵ Kan ja ri Jehová ri xtiq'aton-tzij pa qawi' roj oj ka'i'. Kan ja k'a rija' xtitz'eton ri nuk'aslen y kan xkiruto' pan aq'a' rat, xcha' ri David chire ri Saúl.

¹⁶ Toq ri David xtane' richin nich'on, ri Saúl xubij: ¿Ja rat ri', David ri at achi'el nuk'ajol, ri nich'on pe wik'in?, xcha'. Y k'ari' ri Saúl xsik'in-q'anej chi oq'ej,

¹⁷ y xubij: Rat kan más at choj chinuwech yin. Rat xatzolij rajel ruk'exel chuwe rik'in utzil, y yin xa kan ja ri itzel xinben chawe.

¹⁸ Rat xak'ut chinuwech chi kan ja ri utz nawajo' naben chuwe, roma man xinakamisaj ta kan, toq ri Jehová xirujech pan aq'a'.

¹⁹ ¿Achike ta k'a xtibanon keri', chi toq nuk'ul ri etzelanel richin nuya-el q'ij chire chi nibe y man jun nuben el chire? Roma ri' kan ja ri Jehová xtutzolij rajel ruk'exel chawe re xaben wik'in chupan re q'ij re'.

²⁰ Wakami xq'ax chinuwech, chi kan ja rat xkaq'aton-tzij pa ruwi' ri qaruwach'ulew Israel. Y re q'atbel-tzij re' xtik'oje' pan aq'a' richin q'asen.

²¹ Wakami k'a David, taya' atzij chinuwech, pa rubi' ri Jehová, chi man xke'akamisaj ta ri wijatzul richin nayoj ri nubi' jumul, xcha' ri Saúl.

²² Y ri David kan xuya' k'a rutzij chuwech ri Saúl. Y k'ari' ri Saúl xbe pa rachoch. Jak'a ri David y ri achi'a' xetzolej chik kan chupan ri jul akuchi nikewaj-wi-ki'.