1 Sam 20 - Kaqchiquel Bible

Ri Jonatán nuto' ri David

¹ K'ari' ri David xel-pe chiri' pa Naiot richin Ramá richin xpe rik'in ri Jonatán, y xubij chire: ¿Achike k'a nubanon yin? ¿Achike k'a numak nubanon chuwech ri atata' richin yirukanoj y kan nrajo' yirukamisaj?, xcha'.

² Y ri Jonatán xubij chire: Man nach'ob keri', David. Rat man yabeken ta. Ri nata' man jun xtuben chawe. Roma rija' man jun xtrewaj chinuwech yin, stape' k'o rejqalen o xa maneq. ¿Achike ta k'a roma xtrewaj chinuwech ri nata' richin nrajo' yarukamisaj? Ni, man keri' ta, xcha'.

³ K'ari' ri David xuya' rutzij chuwech ri Jonatán y xubij chire: Ri atata' retaman jebel chi roj janila niqajo-qi'. Roma ri' rija' man xtubij ta chawe ri achike ri ruch'obon chuwij, richin keri' rat man yabison ta. Kan qitzij na wi, k'es k'a ri Jehová y k'es k'a ri awánima rat, chi ri nukamik yin xa naqaj chik k'o-wi, xcha'.

⁴ K'ari' ri Jonatán xuk'utuj chire ri David achike nrayij ri ránima richin nuben pa ruwi'.

⁵ K'ari' ri David xubij chire ri Jonatán: Ri chua'q jari' ri niban ri nimaq'ij roma xalex ri ik', y yin ri q'ij ri' k'o chi yitz'uye' junan rik'in ri rey pa ru-mesa richin yiwa' rik'in. Tabana' jun utzil taya-el q'ij chuwe, richin ninwewaj-el-wi' pa juyu' ka'i' q'ij y k'a ri tiqaq'ij ri kabij, k'ari' yitzolin-pe.

⁶ Y wi ri atata' yiruk'utuj, rat xtabij-apo chire: Rija' xuk'utuj janila utzil chuwe richin tinya-el q'ij chire richin nibe pa rutinamit Belén, roma konojel ri e rach'alal nikinimaq'ijuj ri q'ij richin ri kamelabel richin ronojel juna', xkacha'.

⁷ Jak'a wi ri atata' man jun xtubij, nel chi tzij chi k'o uxlanibel-k'u'x pa nuwi' yin, y wi niyakatej royowal, tawetamaj k'a chi k'o ruk'ayewal niberuya' pa nuwi'.

⁸ Tajoyowaj k'a nuwech roma kan qabanon jun jikibel-tzij chuwech ri Jehová, y wi kan ja yin ri in aj-mak, kan ja k'a rat xkakamisan wichin. Man k'atzinel ta yinak'uaj-el chuwech ri atata', xcha' ri David.

⁹ K'ari' ri Jonatán xubij chire: Rat man xtabek'uluwachij ta keri'. Wi yin wak'axan ta chi ri nata' keri' nuch'ob chawij richin yarukamisaj, xinbij yan ta chawe ri', xcha'.

¹⁰ K'ari' ri David xubij: ¿Achike xtiya'on rutzijol chuwe yin, wi ri atata' xtich'on awik'in rik'in oyowalen?, xcha'.

¹¹ K'ari' ri Jonatán xubij chire: Katanpe: Jo' juba' pa juyu', xcha'. Y keri' chi e ka'i' junan xebe pa juyu'.

¹² K'ari' ri Jonatán xubij chire ri David: Chuwech k'a ri Jehová ri qa-Dios ninbij ri qitzij, ja rija' xkitz'eton toq yin xkich'on rik'in ri nata' richin ninwetamaj ri ruch'obonik rija'. Ketaqwa' chua'q o kabij, wi xtich'on utz chawij, yin xtinteq rutzijol awik'in richin nawetamaj.

¹³ Jak'a wi ri nata' xa itzel ruch'obonik, kan ja ri Jehová xtiya'on ruk'ayewal pa nuwi' yin wi man xtinbij ta chawe, richin rat yabe rik'in uxlanibel-k'u'x. Y ja ri Jehová xtik'oje' awik'in achi'el xk'oje' rik'in ri nata'.

¹⁴ Y wi k'a in k'es na, toq xkatok kan rey, kan xtajoyowaj k'a nuwech pa rubi' ri Jehová, achi'el rujoyowan awech rat. Chuqa' man naya' q'ij richin yin yikamisex.

¹⁵ Y wi xa ta ja yin in kamineq chik, tajoyowaj k'a kiwech ri aj pa wachoch, y kan ke'awajo' richin jantape', toq ri Jehová xkerelesaj-el chikijujunal ri etzelanel awichin chuwech re ruwach'ulew. Chuqa' man taya' q'ij richin ri nubi' nelesex o nimestex chupan ri awachoch, xcha' ri Jonatán.

¹⁶ Keri' ri Jonatán xujikiba-rutzij rik'in ri David y kik'in ri aj pa rachoch y xubij: Ja ri Jehová ri xtibeya'on ruk'ayewal pa kiwi' ri e etzelanel awichin, y xtuya' ruk'exel chike ri itzel nikiben chawe, xcha'.

¹⁷ K'ari' ri Jonatán xuya' chik jun bey rutzij chuwech ri David, roma kan janila nrajo', achi'el nrajo-qa-ri' rija'.

¹⁸ Y chuqa' xubij chire: Chua'q jari' ri nimaq'ij roma nalex ri k'ak'a' ik'. Jari' toq ri nata' xtutz'et chi at maneq, roma man xkak'oje' ta pan atz'uyubal.

¹⁹ Jak'a ri pa rox q'ij, más k'a xtiq'alajin chi rat at maneq pan ak'ojelibal. Man naya' k'a kan ri akuchi xawewaj-wi-awi' ri nabey mul. Yinawoyobej chiri' naqaj chire ri abej Ezel.

²⁰ Y yin xtink'eq-apo oxi' kokoj raqen-ch'ab k'a chiri' y ninben achi'el k'o ninq'ijuj.

²¹ Chirij re', k'ari' xtinteq-apo ri nusamajel y xtinbij-el chire: Kabiyin, ja tabekanoj ri kokoj raqen-ch'ab, xkicha'. Y wi xtinbij chire chi ri kokoj raqen-ch'ab más kere' ek'o-wi-pe, jari' toq rat yatel-pe roma k'o uxlanibel-k'u'x, y man jun k'a itzel xtak'uluwachij. Yin kan chuwech ri k'aslik Jehová ninbij-wi re'.

²² Jak'a wi ninbij chire ri nusamajel chi ri kokoj raqen ch'ab ek'o-apo chawech más k'a kela'. Ja retal ri' chi rat k'o chi nawewaj-el-awi' nej, roma kan keri' nrajo' ri Jehová chawe.

²³ Jak'a re achoq pa ruwi' xojch'on-wi, ja ri Jehová xtik'oje' qik'in roj oj ka'i', xcha' ri Jonatán.

²⁴ Chirij re', ri David xberewaj-ri' pa juyu'. Y toq xapon ri q'ij richin niban ri nimaq'ij, roma xalex ri ik', ri rey Saúl xbetz'uye' chuchi' ri ru-mesa richin nibewa',

²⁵ ri akuchi nitz'uye-wi ronojel mul, chunaqaj ri tz'aq richin ri jay. Ri Jonatán xtz'uye' chuwech-apo ri rey, y ri Abner chuxikin-apo ri rey, jak'a ri rutz'uyubal ri David man jun xk'oje' chupan.

²⁶ Y ri Saúl chupan k'a ri q'ij ri' man jun xubij, roma xa xuch'ob-qa: Rik'in juba' k'o jun xuk'uluwachij, y man ruch'ajch'ojirisan ta ri', achi'el nubij ri pixa'; y roma ri' man k'o ta pe re wawe', xcha-qa.

²⁷ Chupan ri ruka'n q'ij chire ri nimaq'ij, jari' toq ri Saúl xutz'et chi ri David man xk'oje' ta chik pa rutz'uyubal. K'ari' rija' xubij chire ri Jonatán, ¿achike k'a roma man peteneq ta ri ruk'ajol ri Isaí re wawe' richin niwa'? Kan man xpe ta iwir, ni man xpe ta chik wakami, xcha'.

²⁸ K'ari' ri Jonatán xubij chire ri rutata': Rija' xuk'utuj-el utzil chuwe richin nibe chirachoch pa rutinamit Belén.

²⁹ Y xubij chuwe chi ri aj pa rachoch nikinimaq'ijuj ri kamelabel pa rutinamit. Y xubij chi jun chike ri rach'alal xuteq-pe royoxik, y wi janila ninwajo', ninya-el q'ij chire richin xeberuq'ejela' kan juba' ri rach'alal. Roma ri' man xpe ta richin xwa' wawe' pan a-mesa, xcha' ri Jonatán chire ri rutata'.

³⁰ Jari' toq ri Saúl xyakatej janila royowal chirij ri Jonatán, y xubij chire: Rat xa at achi'el ral jun ixoq ri banoy etzelal, y kan xayakatej chuwij, ¿man wetaman ta yin chi rat ja ri David ri ruk'ajol ri Isaí ri más nawajo'? Y kan rusachon ak'u'x richin chi xaya' ruk'ix ri ate'.

³¹ Rokik ri ruk'ajol ri Isaí k'es, rat man q'alaj ta xtaq'et kan tzij. Wakami k'a kabiyin, y tabek'ama-pe ri David, roma rija' ruk'amon nikamisex, xcha'.

³² K'ari' ri Jonatán xubij chire ri rutata': ¿Achike k'a roma k'o chi niken ri David? ¿Achike k'a rumak rubanon chawech, richin keri' nabij?, xcha' chire.

³³ Jari' toq ri Saúl xuk'eq jun kum chirij ri ruk'ajol richin nukamisaj. Jari' toq ri Jonatán xq'ax chuwech chi ri rutata' kan nrajo-wi nukamisaj ri David.

³⁴ K'ari' ri Jonatán xyakatej k'a el chuchi' ri mesa yakatajineq janila royowal, y man jun xutej-el chupan ri q'ij ri'; roma janila niq'axon ri ránima roma ri rutata' xuqasaj ruq'ij ri David.

Ri Jonatán xuya' rutzijol chire ri David chi tanimej

³⁵ Y pa rox q'ij, nimaq'a' yan ri Jonatán xbe pa juyu', roma xapon ri q'ij richin nibe rik'in ri David akuchi rewan-wi-ri', y xuk'uaj-el jun ti ala' rusamajel.

³⁶ K'ari' xubij chire ri ti ala' chi tibiyin y tubekanoj-pe ri kokoj raqen-ch'ab ri xtuk'eq-apo. Y rija' junanin xbe; y ri Jonatán xeruk'eq-apo ri kokoj raqen-ch'ab richin nik'o-el chuwech ri ti ala'.

³⁷ Y toq ri ti ala' xapon akuchi xbeqaqa-wi ri ko'ol raqen-ch'ab, ri Jonatán xsik'in-apo chire ri ti ala' y xubij: ¡Ri ko'ol raqen-ch'ab k'o k'a kela-apo chawech!, xcha'.

³⁸ K'ari' ri Jonatán xsik'in chik apo jun bey chire ri ti ala' y xubij: Chi'anin ri', man yapa'e-qa, xcha'. Y ri ti ala' xeberusik'a-pe ri kokoj raqen-ch'ab, y xtzolej-pe rik'in ri Jonatán.

³⁹ Jak'a ri ti ala' ri' kan man jun k'a xq'ax chuwech, xaxe k'a ri David y ri Jonatán xq'ax chikiwech achike roma keri' xkiben.

⁴⁰ K'ari' ri Jonatán xuya-el ri rukamisabal chire y xubij: Tak'uaj-el y kabiyin pa tinamit, xcha' chire.

⁴¹ Y toq ri ti ala' xbe yan, k'ari' ri David xpa'e-q'anej ri chiri' pa xokon, y chiri' oxi' k'a mul xxuke' y xulukuba-qa-ri' chuwech ri Jonatán. Y chiri' xkitz'ubaj-wi kan ki', y chi e ka'i' k'a xe'oq', jak'a ri David kan más janila xoq'.

⁴² K'ari' ri Jonatán xubij chire: Kabiyin k'a rik'in uxlanibel-k'u'x roma chi oj ka'i' xqaya' yan qatzij pa rubi' ri Jehová. Ja ri Jehová ri xtik'oje' awik'in rat y xtik'oje' wik'in yin. Y kan ja rija' xtik'oje' kik'in ri awijatzul rat y keri' chuqa' kik'in ri e wijatzul yin, xcha'. Xbe k'a ri David, y ri Jonatán xtzolej kan pa tinamit.