1 Sam 19 - Kaqchiquel Bible

Ri Saúl nutej ruq'ij richin nukamisaj ri David

¹ Ri rey Saúl xubij chire ri Jonatán y chike konojel ri aj-raqen, richin nibekikamisaj kan ri David, jak'a ri Jonatán janila nrajo' ri David.

² Y chi'anin xuya' rutzijol chire ri David y xubij: Wakami ri nata' nrajo' yarukamisaj; roma ri' tachajij-awi' y chua'q nimaq'a' yan tabewewaj-awi' akuchi man jun xkatz'eton y chiri' kak'oje-wi.

³ Y yin xkinel-el y xkibek'oje' junan rik'in ri nata' chiri' pa juyu' ri akuchi xkabek'oje-wi rat, y xkatinnataj k'a apo chire. Chirij re', xtinteq rutzijol chawe achike xtubij chawij, xcha' ri Jonatán.

⁴ Y ri Jonatán xch'on utz chirij ri David chire ri rutata' y xubij: Rat man ruk'amon ta richin nakamisaj ri David ri asamajel, roma rija' kan man jun itzel rubanon chawe. Ronojel ri samaj rubanon awik'in ruyon utzilej taq banobel.

⁵ Y chuqa' kan xuya' ri ruk'aslen pa kamik toq xukamisaj ri Goliat. Ri Jehová xuya' kolotajik pa ruwi' ri qaruwach'ulew Israel. Rat xatz'et ri', y kan janila xakikot rik'in. ¿Achike k'a roma wakami nawajo' nakamisaj y xa maneq rumak rubanon chawech?, xcha' ri Jonatán chire ri rutata'.

⁶ Ri Saúl xrak'axaj k'a ri ch'abel ri xubij ri ruk'ajol. K'ari' xuya' rutzij chuwech ri Jehová chi man nukamisaj ta ri David.

⁷ Y ri Jonatán xroyoj ri David y xutzijoj ronojel chire ri xubij ri rutata', y kan ja rija' xuk'uan-el richin ri David pa rachoch ri Saúl, y xk'oje' rik'in achi'el rubanon kan.

⁸ Chirij re' xchapatej chik jun labal. Xbe k'a ri David richin xberubana' oyowal kik'in ri aj-Filistea. Rija' kan xeruch'ek y xe'animej chuwech.

^9-10 Chupan k'a jun aq'a', ri Saúl tz'uyul pa rachoch y ruchapon ri rukum, rokik ri David niq'ojoman. Y jari' toq ri Jehová xuteq chik pe ri itzel espíritu rik'in ri Saúl, y roma ri' xuk'eq ri rukamisabal richin nuch'ik ta ri David chuwech ri jay. Jak'a ri David xtikir xujel y ri kum xch'ike' chuwech ri jay. Y chupan k'a ri aq'a' ri' ri David xrewaj-el-ri' y xbe chirachoch.

¹¹ Y ri Saúl chi'anin xeruteq-el rusamajela' chirachoch ri David richin chi tikichajij, y nimaq'a' yan tikikamisaj kan. Jak'a ri Mical xubij chire ri David: Wi man xtakol ta el awi' chupan re aq'a' re', chua'q nimaq'a' yan xkakamisex, xcha'.

¹² K'ari' ri Mical xuxim k'a jun kolo' pa ventana, y chiri' xutzeqeba-el-ri' ri David richin xanimej-el.

¹³ Xeri' ri Mical xuya' jun wachibel pa ruch'at ri David y xuya' jun ruch'akat-ruwi' ri banon rik'in rusumal tzuntzun, y k'ari' xutz'apej kan rik'in jun k'ul.

¹⁴ Y toq xe'apon ri rusamajela' ri Saúl richin nibekik'ama-pe ri David, ri Mical xubij chike chi rija' janila yawa'.

¹⁵ K'ari' ri Saúl xeruteq chik el ri rusamajela' richin nibekikanoj ri David, y xubij-el chike: Tiwelesaj-pe, stape' pa ruch'at k'o-wi. Tik'ama-pe chuwe richin ninkamisaj, xcha'.

¹⁶ Y toq ri samajela' xe'ok-ok, xbekila' ri wachibel ri k'o chupan ri ch'at y ri ruch'akat-ruwi' xa ja ri rusumal tzuntzun.

¹⁷ Jari' toq ri Saúl xubij chire ri Mical: ¿Achike roma xinaq'ol y kan xaya-el q'ij chire ri etzelanel wichin richin xanimej-el?, xcha'. Y ri Mical xubij chire ri rutata' chi ri David xubij chi wi man xtuya' ta el q'ij chire richin nibe, rija' xtukamisaj kan.

¹⁸ Y ri David xanimej k'a el y xberuto-ri' rik'in ri Samuel pa tinamit Ramá, y xutzijoj k'a ronojel ri niban chire roma ri Saúl. K'ari' ri David y ri Samuel xe'el k'a el chiri' pa Ramá y xebe pa tinamit Naiot, y chiri' xebek'oje-wi.

¹⁹ Y xya'ox k'a rutzijol chire ri Saúl y xbix chire chi ri David k'o pa Naiot richin Ramá.

²⁰ Y xeri' ri Saúl xeruteq-el rusamajela' richin nibekik'ama-pe ri David. Y toq xe'apon xekitz'et jun tzobaj ri e q'alajirisey ruch'abel ri Dios, y ja ri Samuel ik'owineq-el chikiwech. Y ri ru-Espíritu ri Dios xoqaqa pa kiwi' ri rusamajela' ri Saúl, y rije' chuqa' xkiq'alajirisaj ri ruch'abel ri Dios.

²¹ Y toq ri Saúl xretamaj re', xeruteq chik el ch'aqa' kachibil, jak'a rije' chuqa' keri' xkiben. Y pa rox mul xeruteq chik el ch'aqa', y chuqa' keri' xkiben.

²² K'ari' ri Saúl xbe pa tinamit Ramá. Xapon k'a chuchi' ri jun nimalej pozo ri k'o pa Secú, y xuk'utuj-el akuchi ek'o-wi ri Samuel y ri David. Y k'o jun ri xbin-el chire chi rije' ek'o chiri' pa Naiot.

²³ Y toq ri Saúl ruchapon bey, jari' toq ri Espíritu richin ri Dios xoqaqa pa ruwi', y rija' chuqa' xuchop nuq'alajirisaj ri ruch'abel ri Dios, y keri' xapon k'a pa Naiot.

²⁴ Y xrelesaj-el ri rutziaq richin rey y jari' toq xuq'alajirisaj ruch'abel ri Dios chuwech ri Samuel. Chijun q'ij y chijun aq'a' keri' xuben. Y jari' toq xkibij: ¿Ri Saúl k'o chuqa' chikikojol ri e q'alajirisey ruch'abel ri Dios?, xecha'.