1 Sam 18 - Kaqchiquel Bible

Ri Jonatán y ri David xkiben jun jikibel-tzij

¹ Toq ri Saúl y ri David xetane' richin yetzijon, jari' toq ri Jonatán kan janila xrajo' ri David, y roma ri' xok rachibil. Kan xrajo' achi'el nrajo-qa-ri' rija'.

² Y ri Saúl xuk'en k'a qa ri David chupan ri q'ij ri'. Man xuya' ta el q'ij chire richin xbe chirachoch ri rutata'.

³ Ri Jonatán xujikiba' k'a rutzij chuwech ri David, roma kan janila nrajo'.

⁴ Y xeri', ri Jonatán xrelesaj ri tzieq ri ruq'un richin retal chi kan ruk'ajol ri rey, keri' chuqa' ri ru-espada, ri rute-ruch'ab y ri ximibel-rupan. Ronojel re' xerusipaj chire ri David roma janila nrajo'.

⁵ Y ri David kan nibe xabakuchi nitaq-wi-el roma ri Saúl, y ronojel ri nibix-el chire nuben rik'in na'oj. Y xukusex aj-raqen richin jun tzobaj aj-labal. Y re' kan xqa' k'a chikiwech konojel winaqi' y keri' chuqa' ri aj-raqen ri ek'o rik'in ri Saúl.

Ri Saúl nich'upun ruk'u'x chirij ri David

⁶ Y toq xetzolin-pe konojel chubanik oyowal y chuqa' xtzolin-pe ri David ri xkamisan richin ri Goliat, xebe'el k'a pe konojel ri ixoqi' richin ri ruwach'ulew Israel. Yeropilan y yebixan rik'in kikoten richin xkik'ul-apo ri rey Saúl rik'in jalajoj ruwech q'ojom.

⁷ Ri ixoqi' yetzopiyaj, yebixan y nikibila': Ri Saúl xaxe e 1,000 xerukamisaj, jak'a ri David e 10,000, yecha'.

⁸ Ri Saúl kan man utz ta xrak'axaj ri xkibij ri ixoqi', roma ri' kan xyakatej janila royowal y xubij-qa pa ránima: Ri ixoqi' xkibij chi ri David xerukamisaj e 10,000, y jak'a yin xaxe ok 1,000 ri nikibij. Wakami xaxe chik k'a juba' nrajo' richin nikikusaj kan rey, xcha-qa.

⁹ Y chupan k'a ri q'ij ri', ri Saúl kan man utz ta chik xutz'et ri David.

¹⁰ Ri jun chik q'ij ri Jehová xuteq chik k'a pe ri itzel espíritu rik'in ri Saúl, y kan sachineq ruk'u'x k'o pa rachoch. Y ri David niq'ojoman k'a achi'el nuben ri ch'aqa' chik q'ij. Y ri Saúl kan ruk'uan k'a ri rukum.

¹¹ Y xuch'ob chi nuch'ik ri David chuwech ri jay, y xuk'eq ka'i' mul ri rukamisabal chirij ri David y rija' kan chi e ka'i' mul xtikir xujel.

¹² Ri Saúl kan k'o-wi rukiy ri David chuwech, roma ri Jehová kan k'o-wi rik'in ri David, y maneq chik rik'in rija'.

¹³ Y roma ri' man xrajo' ta chik xsamej ri David rik'in, xa xuteq-el nej y xuben-el chire richin xok aj-raqen pa kiwi' e 1,000 aj-labal, y ja rija' ri uk'uey kibey, toq ye'el-el y toq yetzolin.

¹⁴ Y ri David kan rik'in na'oj xuben ronojel re', roma ri Jehová kan k'o-wi rik'in.

¹⁵ Ri Saúl janila xuk'en rukiy ri David toq xutz'et chi ronojel ri nuben, kan nuben rik'in na'oj.

¹⁶ Ri David kan janila k'a xajowex koma ri achi'a' aj-Israel y koma ri aj-Judá; y ja rija' ri nuk'uan kibey toq yebe pa labal.

¹⁷ K'o k'a jun q'ij ri Saúl xubij chire ri David: Yin xtinya' chawe ri numi'al nimalaxel Merab richin xtok awixjayil, wi xtak'ut chi at jun achin ri k'o awuchuq'a' y maneq xibinri'il chawech richin naben oyowal qoma roj ri oj rutinamit ri Jehová, xcha' chire. Jak'a ri Saúl xubij-qa pa ránima: Man ja ta yin ri xkikamisan, xa ja ri aj-Filistea xkekamisan richin, xcha-qa.

¹⁸ Jak'a ri David xubij chire ri Saúl: Wajaw yin ¿Achike ta k'a nuq'ij yin? ¿Y achike ta k'a kiq'ij ri e wach'alal y ri aj pa rachoch ri nata' wawe' pan Israel richin nawajo' yinok aji'?, xcha'.

¹⁹ Y xapon k'a ri q'ij chi ri Merab, rumi'al ri Saúl k'o chi niya'ox-el chire ri David richin nok rixjayil y pa ruk'exel xya'ox-el chire rija', xa xya'ox chik el chire ri jun achin rubini'an Adriel ri aj-Meholá.

²⁰ Jak'a ri Mical ri jun chik rumi'al ri Saúl, janila nrajo' ri David y re' xapon rutzijol rik'in ri Saúl, y rija' kan xqa' chuwech toq xrak'axaj re'.

²¹ Y xubij-qa: Xtinya' ri Mical chire ri David, y re' xtik'atzin richin jun pikbel chire richin xtitzaq pa kiq'a' ri aj-Filistea, xcha-qa. K'ari' ri Saúl xubij chik chire ri David: Wakami kan xkatok-wi nuji', xcha'.

²² Y ri Saúl xeruteq k'a el ri aj-raqen rik'in ri David pa ruyonil, y xkibij chire: Ri rey rutaqon-pe rubixik chawe chi janila yarajo', y chuqa' qonojel yatqajo'. ¿Achike roma man yatok ruji' ri rey?, xecha' chire. Jak'a ri Saúl xa rik'in ka'i' rupalej rubin-el re ch'abel re'.

²³ Jak'a ri David xubij chike: ¿Nich'ob rix chi chaqba' yinok ruji' jun rey, yin in jun achin ri xa man jun k'o wik'in y maneq wejqalen?, xcha'.

²⁴ K'ari' ri aj-raqen ri ek'o rik'in ri Saúl xbekibij ri ch'abel ri xubij-el ri David chike.

²⁵ Y ri Saúl xubij chik: Kere' tibebij chire ri David: Ri rey man nrajo' ta jun sipanik. Rija' nrajo' wok'al rutz'umal ri rutza'n ri kikowil ri aj-Filistea, richin nuben ruk'exel chike ri e etzelanel richin, kixcha' chire, xcha' ri rey. Ri ruch'obonik ri Saúl chi ri David nitzaq ta kan pa kiq'a' ri aj-Filistea.

²⁶ Y toq ri aj-raqen xkiq'alajirisaj chire ri David ronojel ri rubin-el, kan janila xqa' chuwech ri David richin nok ruji' ri rey. Rokik richin napon ri q'ij ri kibin,

²⁷ ri David xbe kik'in ri aj-labal y xebekikamisaj kan e 200 achi'a' aj-Filistea. Rija' xuk'en k'a pe ri k'utun-el chire y xberujacha' chire ri rey. Xuben k'a ronojel re', richin chi nok ruji' rija'. K'ari' ri Saúl xujech-el ri Mical chire ri David richin nok rixjayil.

²⁸ Jak'a ri Saúl xutz'et chi ri Jehová kan k'o-wi rik'in ri David y chuqa' ri rumi'al kan nrajo-wi.

²⁹ Jari' toq xuk'en más rukiy. Ri Saúl kan xok k'a etzelanel richin ri David ronojel q'ij.

³⁰ Ronojel mul toq ri e tata'al aj-Filistea yebe pan oyowal, ja ri David ri nich'akon chikij, roma ja rija' ri más nitikir chikiwech konojel e richin ri Saúl. Roma ri' kan xel janila jebel rutzijol.