1 Sam 17 - Kaqchiquel Bible

Ri David xukamisaj ri Goliat

¹ K'o k'a jun q'ij ri aj-labal aj-Filistea xkimol chik ki' richin nibekibana' labal kik'in ri aj-Israel. Y ri aj-Filistea xek'oje-qa pa Efes-damim chikikojol ri tinamit Socó y Azecá, pa ruwach'ulew Judá.

² Keri' chuqa' ri Saúl y ri aj-labal aj-Israel xkimol-ki' y xek'oje-qa pa taq'aj kojol juyu' richin Elá, y xkinuk'-ki' richin nibekibana' oyowal kik'in ri aj-Filistea.

³ Ri achi'a' aj-Filistea xek'oje' pa ruwi' jun juyu' juk'an-apo, y ri achi'a' aj-Israel xek'oje' pa ruwi' ri juk'an chik ruwi' juyu', y ri taq'aj jari' ri k'o chikikojolil.

⁴ Y k'o k'a jun achin ri kan richin labal ri xel-pe ri akuchi ek'o-wi-qa ri aj-Filistea. Rija' rubini'an Goliat aj pa tinamit Gat, y ri rupalen jubama oxi' metro.

⁵ Y rukusan jun rutobal rujolon ri banon rik'in q'enq'oj-pueq, y chuqa' jun rutobal ruwa-ruk'u'x ri banon rik'in q'enq'oj-pueq y ri ralal jun la'eq 125 libra.

⁶ Y ri rutobal ri raqen e banon rik'in q'enq'oj-pueq y keri' chuqa' ri ru-jabalina ri ruk'uan chuwi-rutele'n, rik'in q'enq'oj-pueq banon-wi.

⁷ Y ri rupan ri raqen ri rukum, kan achi'el k'a ri che' ri chapayon ri kembel, y ri ralal ri rutza'n, jubama wolajuj libra ri nipajon. Y ri achin ri uk'uayon ri rutobal kan ik'owineq k'a chuwech.

⁸ Ri Goliat xpa'e-q'anej, xsik'in y xubij-apo chike ri aj-labal aj-Israel: ¿Achike roma icholajin na iwi' richin niben oyowal? Yin in aj-Filistea y rix xa ix rusamajela' ri Saúl. Wakami k'a ticha-pe jun chi'ikojol ri nipe richin norubana' oyowal wik'in.

⁹ Wi rija' xtitikir xtuben oyowal wik'in, y xkirukamisaj, roj kan xqojok isamajela' rix. Jak'a wi ja yin xkich'akon chirij y xtinkamisaj, ja rix xkixok qasamajela' roj, y xqojiwilij.

¹⁰ Wakami kan ja yin k'a ri yibin chiwe, chi titaqa-pe jun achin richin norubana' oyowal wik'in, xcha'.

¹¹ K'ari' ri Saúl y konojel ri ruwinaq, toq xkak'axaj ri ch'abel ri', kan xmayamo-qa kánima y janila xkixibij-ki'.

¹² Ri Isaí aj-Belén richin Judá, kan janila k'a ri'j chik toq niq'aton-tzij ri rey Saúl, y rija' ek'o e waqxaqi' ruk'ajol, y jun chike rije' ja ri David.

^13-14 Ri e oxi' nabey ruk'ajol ri Isaí e beneq rik'in ri Saúl pa labal. Ri nabey rubini'an Eliab, ri ruka'n rubini'an Abinadab, y ri rox rubini'an Samá. Y ri David ja rija' ri ch'i'p.

¹⁵ Y ri David nibe y nipe rik'in ri Saúl roma k'o chi nuyuq'uj ri rukarne'l ri rutata' chiri' pa Belén.

¹⁶ Rokik k'a ri' ri Goliat nuyek koyowal ri achi'a' aj-Israel. Napon kik'in ronojel nimaq'a' y ronojel tiqaq'ij, y kawineq q'ij ri keri' xuben.

¹⁷ Y k'o k'a jun q'ij, ri Isaí xubij chire ri David: Kabiyin ri akuchi ek'o-wi-qa ri animal, y tak'uaj-el chike re jun arroba trigo k'ilin, y re lajuj kaxlan-wey re'.

¹⁸ Y chire ri aj-raqen pa kiwi' ri awach'alal, nak'uaj-el re lajuj queso re'. Kabiyin y ye'atz'et kan ri animal achike kibanon. Wi utz kiwech, nak'en-pe chuwe jun xabachike retal richin kan q'alaj chi kan e utz, xcha'.

¹⁹ Ri Saúl y ri e rach'alal ri David y konojel ri achi'a' ri ek'o chiri' pa taq'aj kojol juyu' richin Elá, nikiben oyowal kik'in ri aj-Filistea.

²⁰ Ri ruka'n q'ij, ri David nimaq'a' yan xyakatej y xeruya' kan ri rukarne'l pa ruq'a' jun chik achin. Xbe rik'in ri taqikil achi'el xubij-el ri rutata' chire. Xapon k'a akuchi ek'o-wi-qa ri aj-labal, y jari' toq ri achi'a' nikinuk'-ki' richin yebe pan oyowal, y janila k'a yesik'in.

²¹ Ri aj-Israel ek'o pa cholaj richin nikichop oyowal, y chuqa' keri' kibanon ri aj-Filistea, y nikitzu' k'a ki'.

²² Y jari' toq ri David xuya' kan ri taqikil pa ruq'a' ri chajinel kichin ri kikamisabal, y xbe anineq chikikojol ri aj-labal ri kinuk'un chik ki'. Y xeberuq'ejela' ri runimal.

²³ Rokik ri David nich'on kik'in ri rach'alal, jari' toq ri Goliat xel-pe chikikojol ri achi'a' aj-Filistea ri kinuk'un chik ki', y xch'on chik jun bey y xukamuluj ri ch'abel achi'el ri rubin chike. Y jari' toq xrak'axaj ri David.

²⁴ Y konojel k'a ri achi'a' ri aj-Israel, toq nikitz'et ri Goliat, ye'animej chuwech, y janila nikik'en rukiy.

²⁵ Chikijujunal k'a rije' nikibila', ¿man itz'eton ta ri jun achin ri nel-pe chikikojol ri aj-Filistea ri nuyek qoyowal? Ri xtich'ako ri achin ri', ri rey nuya' janila beyomel chire, y chuqa' nuya' ri rumi'al chire richin nok rixjayil, y yerukol ri aj pa rachoch ri rutata' richin man nikitoj ta ri kan k'o chi nikitoj chire ri rey, yecha'.

²⁶ K'ari' ri David xch'on-apo kik'in ri ek'o chunaqaj y xubij: ¿Achike nuch'ek ri xtich'akon chirij ri aj-Filistea y nrelesaj ri k'ixbilal ri ruya'on pa qawi'? ¿Achike ta k'a re achin re' ri xa man qawinaq ta richin chi nuyek qoyowal roj ri kan oj rutinamit ri k'aslik Dios?, xcha'.

²⁷ Y ri achi'a' xkikamuluj ri ch'abel y xkibij ri bin pa ruwi' ri xtich'akon richin ri Goliat.

²⁸ Jak'a ri Eliab ri nimalaxel runimal ri David xyakatej royowal toq xrak'axaj chi ri David nitzijon kik'in ri achi'a' ri' y xubij chire: ¿Achike roma xape wawe'? ¿Achoq ik'in xe'aya-wi kan ri ka'i' oxi' taq qakarne'l ri ek'o pa tz'iran ruwach'ulew? Yin wetaman chi roma ri retzelal ri awánima y ri animirisanen at peteneq wawe', xaxe richin nawajo' natz'et ri oyowal, xcha'.

²⁹ K'ari' ri David xubij: ¿Achike k'a xinben yin? ¿Man ruk'amon ta kami k'a richin yich'on?, xcha'.

³⁰ K'ari' ri David xuch'er-el ri' rik'in ri runimal, y xberuk'utuj chike ch'aqa' chik achi'a'. Y rije' chuqa' xkibij achi'el ri xbix yan pe chire.

³¹ Xak'axatej k'a ri ch'abel ri xubij ri David, y xbekitzijoj k'a chire ri rey Saúl, y ri rey xuteq royoxik.

³² Y ri David xubij chire ri Saúl: Kan man jun k'a timayamo-qa ri ránima, roma la achin la' xa aj-Filistea. Roma yin ri in asamajel xkibe y xtinbenbana' oyowal rik'in, xcha'.

³³ K'ari' ri Saúl xubij k'a chire ri David: Rat man yabe ta. Man yatikir ta rik'in ri achin ri' roma rat xa k'a at k'ajol ala' na, y rija' jun achin ri kan richin-wi labal y kan k'a ala' na toq ruchapon-pe, xcha'.

³⁴ Y ri David xubij: Yin ri in asamajel in jun yuq'unel kichin ri rukarne'l ri nata', y toq nipe jun koj o jun oso y nuk'uaj-el jun chike ri alaji' taq karne'l,

³⁵ jari' toq yibe chirij ri chikop, ninch'ey, y ninkol kan ri karne'l pa ruchi', y toq ri chikop ri' nitzolej-pe chuwij, yin kan ninjoq' pa ruchi' y ninkamisaj.

³⁶ Yin ri in asamajel kan nukamisan k'a koj y oso, y kan keri' chuqa' xtinbenbana' chire ri achin aj-Filistea ri xya'on kik'ix ri aj-labal ri e richin ri k'aslik Dios.

³⁷ Ri Jehová kan in ruto'on pa kiq'a' ri koj y ri oso, kan keri' chuqa' xkiruto' pa ruq'a' la achin la', xcha'. K'ari' ri Saúl xubij chire chi tibe, y kan ja ri Jehová xtito'on richin.

³⁸ K'ari' xuteq rujalik ri David richin nukusaj-el tzieq ri richin oyowal ri nukusaj ri Saúl, y xuya-el jun rutobal ri rujolon ri banon rik'in q'enq'oj-pueq y chuqa' xuya-el jun rutobal ri ruwa-ruk'u'x.

³⁹ Y ri David xuya-el ri ru-espada xerupan y xutejtobej xbiyin, jak'a man xtikir ta, roma man jun bey rukusan ri tzieq ri'. Kan man ruk'ulun ta chire, y xubij chire ri Saúl: Yin man ninkusaj ta el re tzieq re', roma man yitikir ta yibiyin rik'in, xcha'. Y xrelesaj k'a kan.

⁴⁰ Y xaxe ri' ri David xuk'uaj k'a el ri ruch'ame'y. Pa jun ti ch'uti'n raqen-ya' xucha-el wo'o' taq abej liq'-liq' y xuya-el chupan jun ti peqes. Chuqa' xuk'uaj-el ri rikeq' pa ruq'a', y xbe akuchi k'o-wi ri Goliat.

⁴¹ Y rija' xnaqajub k'a apo rik'in ri David, y ri achin ri nito'on richin ik'owineq-el chuwech.

⁴² Y toq ri Goliat xutz'et ri David chi xa jun k'ajol ala', kaqkoj nitzu'un y kan jebejoj ok rubanik, man xuya' ta rejqalen.

⁴³ Y xubij k'a: ¿In tz'i' kami yin richin ak'amon-pe jun che' chuwij?, xcha'. Y pa kibi' ri ru-dios, xroyoj itzel pa ruwi' ri David.

⁴⁴ Y chuqa' xubij: Kajel k'a pe wik'in. La ach'akul la' xtinya' chikiwech k'ucha' y chikiwech k'uxunela' taq chikopi', xcha'.

⁴⁵ Y ri David xubij: Rat yape chuwij rik'in espada, rik'in kum y rik'in jabalina. Jak'a yin in peteneq chawij pa rubi' ri Jehová ri k'o ronojel uchuq'a' pa ruq'a', ri qa-Dios roj ri oj aj-labal; ri Dios ri man aya'on ta rejqalen rat.

⁴⁶ Y chupan re q'ij re' rija' xkarujech pa nuq'a'. Xtintzak'ij la ajolon. Chuqa' chupan re q'ij re' ri kich'akul konojel ri awinaq xtinya' chikiwech k'ucha', y chikiwech k'uxunela' taq chikopi', richin keri' konojel k'a ri ruwach'ulew tiketamaj chi k'o jun k'aslik Dios chiqakojol roj.

⁴⁷ Richin keri' tiketamaj konojel chi ri Jehová man nikolon ta rik'in espada, ni rik'in kum. Roma re jun oyowal re' kan richin rija' y kan ja rija' xkixjachon pa qaq'a' roj, xcha' ri David.

⁴⁸ Y toq ri Goliat xnaqajub-apo rik'in ri David, ri David chuqa' junanin xbe-apo rik'in richin xberubana' oyowal.

⁴⁹ K'ari' xuju-qa ri ruq'a' chupan ri ti peqes ri ruk'uan y xuk'en-qa jun ti abej, xuya-el chupan ri ikeq' y xuq'ijuj ri Goliat y xumej ri nik'aj-ruwech, y ri Goliat jupul xqaqa k'a pan ulew.

⁵⁰ Y keri' ri David xuch'ek ri Goliat rik'in ri ti abej ri xuk'eq rik'in ri ikeq', y xukamisaj stape' man jun espada ruk'uan.

⁵¹ Y xeri' xbe junanin rik'in y xpa'e' chirij y xuk'en-el ri ru-espada ri Goliat pa ruk'ojelibal y rik'in ri' xrelesaj ri rujolon. Y toq ri aj-Filistea xkitz'et chi xa xken yan ri achin ri achoq ik'in kikuquban-wi kik'u'x, xe'animej konojel.

⁵² Ri achi'a' aj-Israel y ri aj-Judá, xesik'in k'a y xekitzeqelibej-el k'a chuchi' ri tinamit Gat y ri Ecrón. Y ri kaminaqi' xepunupuxin kan chupan ri bey ri nibe pa tinamit Saaraim ri pa Gat, y keri' xkiben xe'apon k'a pan Ecrón.

⁵³ Y ri achi'a' richin ri tinamit Israel xetzolej k'a pe chi koqotaxik ri aj-Filistea, y xkiwulaj kan jumul ri akuchi xek'oje-wi-el ri achi'a' ri'.

⁵⁴ Y ri David xuk'en-pe ri rujolon ri Goliat pa Jerusalem. Jak'a ri rukamisabal xa xeruya' kan pa rachoch ri Dios ri banon rik'in tzieq.

⁵⁵ Y ri Saúl toq xutz'et chi ri David xberubana' oyowal rik'in ri Goliat, xuk'utuj chire ri Abner aj-raqen pa kiwi' ri aj-labal chi achoq k'ajol ri ala' ri'. Y ri Abner xubij chire ri rey chi man retaman ta ruwech.

⁵⁶ Y ri Saúl xubij chi tuk'utuj ke taq ri' achoq k'ajol ri'.

⁵⁷ Y toq ri David xtzolin-pe chukamisaxik ri Goliat, ri Abner xuk'ul y xuk'uaj-el rik'in ri Saúl. Y ri David kan ruk'uan-el ri rujolon ri Goliat.

⁵⁸ Y xuk'utuj ri Saúl chire chi achoq k'ajol k'a rija'. Y ri David xubij chi rija' ruk'ajol ri Isaí aj-Belén.