1 Sam 16 - Kaqchiquel Bible

Ri Samuel nuqasaj aceite pa ruwi' ri David

¹ Chirij re' ri Jehová xubij k'a chire ri Samuel: ¿K'a jampe' k'a yatane' chi oq'ej chirij ri Saúl? Roma ja yin ri xibin chire chi man rey ta chik pa ruwi' ri Israel. Wakami tanojisaj k'a ri uk'a' rik'in aceite y xkabe rik'in ri Isaí aj-Belén, roma jun chike ri ruk'ajol rija' nucha'on richin nibe'ok rey, xcha'.

² Y ri Samuel xubij: ¿Achi'el k'a toq xkibe yin? Roma wi nretamaj ri Saúl, xa xkirukamisaj, xcha'. Y ri Jehová xubij chire: Tak'uaj-el jun wákix. Y toq xkatapon, tabij chi at peteneq richin nasuj kamelabel chuwe.

³ Y toq xtasuj ri kamelabel ri' tawoyoj ri Isaí, y yin xtink'ut chawech ri k'o chi naben. Y ri xtink'ut chawech yin, pa ruwi' ri' xtaqasaj ri aceite, xcha' ri Jehová.

⁴ Ri Samuel xuben k'a achi'el xubij ri Jehová chire. Y toq rija' xapon pa Belén, ri rijita'q taq achi'a' ri k'o kiq'ij richin ri tinamit ri' xbekik'ulu-el rik'in xibinri'il, y xkibij chire: ¿Richin uxlanibel-k'u'x ri apeten o ni?, xecha'.

⁵ Y ri Samuel xubij: Ja', richin uxlanibel-k'u'x roma yin in peteneq richin nonsuju' sipanik chire ri Jehová. Tich'ajch'ojirisaj-iwi' y kixanpe wik'in richin niqasuj ri kamelabel, xcha'. K'ari' xroyoj ri Isaí y ri e ruk'ajol y xeruch'ajch'ojirisaj achi'el nubij ri pixa', y xek'oje' rik'in richin xusuj ri sipanik.

⁶ Ri Eliab jun chike ri ruk'ajol, y toq ri Samuel xutz'et, xubij-qa: Jik jare', ri rucha'on ri Jehová richin nok kan rey, xcha-qa.

⁷ Jak'a ri Jehová xubij chire ri Samuel: Man tatzu' ri rubanik, ni man tatzu' ri rupalen, roma yin man ja ta la' nucha'on richin nok kan rey. Ri wineq ja ri rubanik ri nutzu', jak'a yin kan ja ri ránima y ri ruch'obonik ri nintz'et, xcha'.

⁸ Y xaxe ri' ri Isaí xroyoj ri Abinadab, y xuk'owisaj-apo chuwech ri Samuel. Jak'a rija' xubij chire ri Isaí chi man ja ta la' ri rucha'on ri Jehová richin nok kan rey.

⁹ K'ari' ri Isaí xuq'axaj-apo ri Samá, y ri Samuel xubij chik chi man ja ta la'.

¹⁰ Keri' ri Isaí xeruq'axaj-apo wuqu' chike ri ruk'ajol chuwech ri Samuel, jak'a ri Samuel xubij chire: Ri Jehová man jun chike rije' rucha'on richin ye'ok kan rey.

¹¹ ¿Ja konojel ak'ajol re'?, xcha'. Y ri Isaí xubij: K'a k'o na kan jun nuk'ajol ri ti ch'i'p, ri niyuq'un kichin ri nukarne'l, xcha'. Y ri Samuel xubij chire ri Isaí: Tataqa' royoxik, roma kan man xqojtz'uye' ta qa richin ri wa'in k'a toq xtipe na rija', xcha'.

¹² K'ari' ri Isaí xuteq k'a royoxik, y toq xapon xukusaj-apo. Y ri David kan kaqkoj ri ruwi' y ri runaq'-ruwech kan janila jebel ok y kan jebel ok ri nitzu'un. Y ri Jehová xubij chire ri Samuel: Kayakatej y taqasaj ri aceite pa ruwi', roma ja rija' ri nucha'on richin nok kan rey, xcha'.

¹³ K'ari' ri Samuel xuchop ri uk'a' nojineq rik'in aceite y xuqasaj pa ruwi' ri David chiri' chikikojol ri rach'alal. Y chupan k'a ri q'ij ri' ri Espíritu richin ri Jehová xoqaqa pa ruwi' ri David. Y ri Samuel xtzolin-el pa tinamit Ramá.

Ri David niq'ojoman rik'in ri Saúl

¹⁴ Ri Espíritu richin ri Jehová xel k'a el rik'in ri Saúl, y ri Jehová xuteq chik k'a pe jun itzel espíritu rik'in, y jari' ri nich'ujirisan richin.

¹⁵ Y ri rusamajela' ri Saúl xkibij chire: Ri Dios xuteq-pe jun itzel espíritu awik'in, y jari' ri yach'ujirisan.

¹⁶ Ajaw, taya' q'ij chiqe richin chi nibeqakanoj jun ri nitikir nuq'ojomaj arpa, richin toq xtipe ri itzel espíritu awik'in, rija' xtuq'ojomaj ri arpa y jari' toq rat xkach'uch'u' kan, xecha'.

¹⁷ Y ri Saúl xubij chike chi keri' tikibana'.

¹⁸ Y jun chike ri rusamajela' xubij-apo: Yin nutz'eton jun chike ri ruk'ajol ri Isaí aj-Belén. Rija' nitikir niq'ojoman, y kan k'o ruchuq'a', y maneq xibinri'il chuwech richin nibe pan oyowal. Chuqa' kan nino'on rik'in ri ruch'abel y ri nitzu'un kan jebel ok, y ri Jehová kan k'o-wi rik'in, xcha'.

¹⁹ K'ari' ri Saúl xeruteq k'a el ri rusamajela' rik'in ri Isaí y xubij-el: Tataqa-pe wik'in ri ak'ajol David ri yuq'unel kichin karne'l, xcha-el ri Saúl.

²⁰ Y ri Isaí xuteq k'a el ri David, xuya-el kaxlan-wey, jun tz'um yakbel vino ri nojineq-el, jun ti alaj tzuntzun, y xuya-el chirij ri rubur richin xuk'uaj chire ri Saúl, k'ari' xbe.

²¹ Toq xapon k'a ri David rik'in ri Saúl y xbek'oje' kan rik'in, ri Saúl janila k'a xrajo' ri David y xukusaj richin nuchajij ri rukamisabal.

²² Y ri Saúl xuteq chik rubixik chire ri Isaí: Yin nink'utuj utzil chawe richin nik'oje' ta ri David wik'in roma janila niqa' chinuwech, xcha'.

²³ Y ronojel k'a mul toq nipe ri itzel espíritu rik'in ri Saúl, jari' toq ri David nuchop nuq'ojomaj ri arpa. Y ri Saúl kan nich'uch'u' kan ri ránima roma ri itzel espíritu kan nel-el rik'in.