1 Sam 11 - Kaqchiquel Bible

Ri Saúl xeruch'ek ri aj-Amón

¹ Chirij ri', toq xik'o yan la'eq jun ik', jari' toq ri Nahas rey kichin ri amonita xuchop nuben labal kik'in ri aj-Jabés richin ri Galaad, y konojel ri aj-Jabés xkibij chire ri Nahas chi tijunamatej-kiwech kik'in y xke'ok rusamajela'.

² Y ri Nahas xubij: Kan xtijunamatej k'a qawech wi xtiben ri xtinbij chiwe yin, chi chi'iwonojel ninwelesaj-el ri runaq' taq iwech ri k'o pan iwijkiq'a' y keri' xkenk'ixbisaj ri iwinaq, xcha'.

³ K'ari' ri achi'a' ri k'o kiq'ij xkibij chire: Taya' wuqu' q'ij chiqe richin yeqateq uk'uey rutzijol chupan chijun qaruwach'ulew, y wi man jun achike xqojto'on, k'ari' xtiqaya-qi' chuxe' ri atzij, xecha'.

⁴ Xe'apon k'a ri achi'a' ri e uk'uey bey chiri' pa Guibeá, rutinamit ri Saúl. Xkibij k'a ronojel ri ch'abel ri bin chike, y jari' toq konojel winaqi' richin ri tinamit xkichop oq'ej.

⁵ Y ri Saúl tzolejineq k'a pe pa juyu' chikij ri rubóyix, y xubij: ¿Achike k'a xk'uluwachitej chupan ri tinamit richin chi konojel kichapon oq'ej?, xcha'. Y xkitzijoj k'a chire ronojel ri kibin-pe ri achi'a' aj-Jabés.

⁶ Toq xrak'axaj ronojel re' ri Saúl, jari' toq ri Espíritu richin ri Dios xoqaqa rik'in richin nuya' ruchuq'a'. Y rija' kan janila xyakatej royowal chikij ri winaqi' ri'.

⁷ Y xeruchop e ka'i' bóyix y xeruk'ajij. K'ari' xeroyoj jujun chike ri e uk'uey bey richin xuya' jujun ch'ap chike. Y xubij-el chike chi keq'ax chijun ruwach'ulew Israel, y tikibij chi kere' xtiban chike ri kibóyix ri man xkekitzeqelibej ta el ri Saúl y ri Samuel. Toq xkak'axaj re', konojel k'a ri winaqi' xkik'en rukiy ri Jehová, y kan konojel k'a xebe chikij ri Saúl y ri Samuel, y xa jun xkiben-el konojel.

⁸ Xkimol k'a ki' pa tinamit Bézec, y ri Saúl xerajlaj k'a konojel ri achi'a'. Y rije' e 300,000, y ri e aj-Judá e 30,000.

⁹ Y ri Saúl xubij k'a el chike ri e uk'uey rutzijol chi tikibij chike ri aj-Jabés richin ri Galaad chi ri chua'q pa nik'aj q'ij, xkekolotej. Y xebe ri e uk'uayon rutzijol y xbekibij chike ri aj-Jabés ri xbix-el chike, y rije' janila xekikot.

¹⁰ Y ri aj-Jabés xkibij k'a chire ri Nahas y ri ruwinaq: Chua'q xtiqajech-qi' pan iq'a', y xtiben k'a ri achike ri xtiwajo' rix richin niben chiqe, xecha'.

¹¹ Ri jun chik q'ij, ri Saúl xeruch'er ri ruwinaq pan oxi' tzobaj. Nimaq'a' yan xe'ok pa runik'ajal ri akuchi ek'o-wi-qa ri e etzelanel kichin, y chiri' xkiben-wi labal. Y toq xmeq'e-pe ri q'ij, ri amonita xech'akatej yan. Y ri xekolotej kan xa xkitaluj k'a el ki', y kan man jun chik k'a xk'oje' kan chiri'.

¹² K'ari' ri achi'a' ri e tzeqelibeyon-el ri Saúl xkibij chire ri Samuel: ¿Akuchi ek'o-wi ri man xkinimaj ta chi ri Saúl nibeq'aton-tzij pa qawi'? Ke'ijacha-pe chiqe richin yeqakamisaj, xecha'.

¹³ Jak'a ri Saúl xubij: Man jun xtikamisex chupan re q'ij re', roma wakami ri Jehová xukol yan ri Israel, xcha'.

Ri Saúl nijikibex chupan ri q'atbel-tzij

¹⁴ Ri Samuel xubij chire ri tinamit chi kebe pa Guilgal richin xtikijikiba' ri ruq'atbal-tzij ri Saúl.

¹⁵ Chijun k'a tinamit Israel xebe pa Guilgal, y chiri' xkijikiba-wi ri ruq'atbal-tzij ri Saúl. Y konojel k'a ri winaqi' xenimaq'ijun chuwech ri Jehová chiri' pa Guilgal y xekisuj k'a sipanik richin nuq'alajirisaj chi junan kiwech rik'in ri Jehová. Y ri Saúl janila xkikot y keri' chuqa' konojel israelita.