1 Sam 10 - Kaqchiquel Bible

Ri Samuel nuqasaj aceite pa ruwi' ri Saúl

¹ K'ari' ri Samuel xuchop jun k'ojelibel nojineq chi aceite y xuq'ej pa rujolon ri Saúl. K'ari' xutz'ubaj y xubij chire: Ja ri Jehová xturtisan awichin. Ja rija' ri xacha'on richin xatok rey pa ruwi' ri tinamit Israel. Ja retal re' chi ja rija' ri xcha'on awichin.

² Wakami k'a ri xkabe, xke'awil ka'i' achi'a' ri ek'o chunaqaj ri akuchi xmuq-wi ri Raquel, ri pa ruwach'ulew ri Benjamín, chiri' pa Selsah. Rije' xtikibij chawe chi ri taq bur ri xebe'ikanoj xe'ilitej yan. Y ri atata' xa xerumestaj yan qa y wakami kan ja chik k'a rix ri nuch'ob iwij. Y nukanoj achike nuben richin yixril.

³ Toq xtachop chik el binen, xkatapon akuchi k'o-wi ri jun paten-che' chunaqaj ri juyu' Tabor. Chiri' xke'ak'ul k'a oxi' achi'a' e jotol-q'anej pa Betel richin nibekiya' ruq'ij ri Jehová. Ri jun ruk'uan oxi' alaji' taq tzuntzun y ri jun chik ruk'uan oxi' kaxlan-wey y ri rox ruk'uan jun tz'um nojineq chi vino.

⁴ Y re achi'a' re' toq xatkiq'ejela' yan, xtikisuj ka'i' kaxlan-wey chawe y rat kan xtak'ul k'a kan chikiwech.

⁵ Chirij ri', xkatapon pa tinamit Guibeá, akuchi ek'o-wi jun tzobaj aj-Filistea. Y toq xkatok chupan ri tinamit ri', xke'ak'ul jun tzobaj e q'alajirisey ruch'abel ri Dios ri e tzolejineq-pe richin xbekiya' ruq'ij ri Dios y nikiq'alajirisaj ri ruch'abel. Y chikiwech rije' e ik'owineq-pe q'ojomanela' kik'amon-pe ri kiq'ojom: Ri salterio, ri pandero, ri xul y ri arpa.

⁶ Jari' toq ri Espíritu richin ri Jehová xtoqaqa pan awi' richin nuya' awuchuq'a'. Y xkatok jun q'alajirisey ruch'abel ri Dios, y kan achi'el nikiben rije' keri' xtaben rat y kan xkatok k'a jun k'ak'a' achin.

⁷ Y toq ak'owisan chik ronojel re nima'q taq banobel re', tabana' k'a ronojel ri yatikir naben, roma ri Dios kan k'o awik'in.

⁸ K'ari' xkabe pa tinamit Guilgal. Y yin chuqa' xkixule-pe awik'in richin xtinsuj chikop richin niporox y sipanik richin nuq'alajirisaj chi junan qawech rik'in ri Dios. Xtawoyobej k'a wuqu' q'ij, k'a toq xkinapon na yin y chirij ri' k'ari' xtink'ut chawech ri achike ruk'amon richin naben, xcha' ri Samuel chire ri Saúl.

Ri Saúl nitzolej chirachoch

⁹ Ri Saúl kan xaxe toq xujech kan ri' rik'in ri Samuel, jari' toq ri Dios xujel ri ránima y chupan k'a ri q'ij ri' xbanatej rik'in rija' ronojel ri nima'q taq banobel richin retal ri bin-pe chire.

¹⁰ Toq rija' y ri rusamajel xe'apon pa Guibeá, kan xekik'ul k'a ri jun tzobaj q'alajirisey ruch'abel ri Dios. Y ri Espíritu richin ri Dios xpe rik'in ri Saúl, richin xuya' ruchuq'a'. Y kan xok chuqa' jun q'alajirisey ruch'abel ri Dios kik'in ri ch'aqa' chik.

¹¹ Konojel k'a winaqi' ri kan ketaman ruwech ri Saúl, toq xkitz'et chi chuqa' rija' xok jun q'alajirisey ruch'abel ri Dios chikikojol ri ch'aqa' chik, jari' toq xkibij-qa chikiwech: ¿Achike k'a xuk'uluwachij la ruk'ajol ri Cis? ¿Chuqa' rija' k'o chikikojol ri e q'alajirisey ruch'abel ri Dios?, xecha'.

¹² Y ek'o k'a chike rije' xkibij: ¿Achike ta chik k'a ri rutata' rija'?, xecha'. Y roma ri' toq xel-pe re ch'abel re' y xkanej kan pa jun k'ambel-tzij: ¿Ri Saúl chuqa' chikikojol ri e q'alajirisey ruch'abel ri Dios?

¹³ Toq ri Saúl xtane' richin nuq'alajirisaj ruch'abel ri Dios, k'ari' xbe pa rachoch.

¹⁴ Y k'o k'a jun ruch'utitata' ri Saúl, xuk'utuj chire ri rusamajel y ri Saúl ri akuchi e peteneq-wi. Y rija' xubij: Xojbe chikikanoxik ri taq bur y roma man xeqil ta, roma ri' xojbe rik'in ri Samuel, xcha'.

¹⁵ Y ri ruch'utitata' ri Saúl xubij: Yin nink'utuj utzil chiwe chi tiq'alajirisaj chinuwech achike xubij ri Samuel chiwe, xcha'.

¹⁶ Y ri Saúl xubij: Xaxe xuq'alajirisaj chiqawech chi ri taq bur xe'ilitej yan, xcha'. Jak'a chirij ri q'atbel-tzij richin ri Saúl man jun xubij chire.

¹⁷ Chirij k'a ronojel re', ri Samuel xeroyoj ri tinamit richin nikiya' ruq'ij ri Jehová chiri' pa Mispá.

¹⁸ Y toq ek'o chik ri winaqi' chiri', xubij chike: Kere' rubin-pe ri Jehová ri qa-Dios: Yin xenwelesaj-pe ri ite-itata' chiri' pan Egipto. Xenkol-pe pa kiq'a' ri aj chiri' y pa kiq'a' konojel ri q'atbel taq tzij ri xeya'on pa tijoj-poqonal, nicha' ri qa-Dios.

¹⁹ Jak'a re wakami, rix xa xiwetzelaj kan ri qa-Dios ri xkolon kichin ri ite-itata' chuwech ronojel ri tijoj-poqonal y q'axo'n. Y chuqa' xibij chi niwajo' chi nuya' jun rey pan iwi'. Wakami k'a, kixjel-pe chuwech ri Jehová pa taq itzobaj, chi te'ej, chi tata'aj, chi alk'ualaxela' y chi iy-mam, xcha' ri Samuel.

²⁰ K'ari' ri Samuel xuben chi xejel-apo konojel ri tzobaj richin ri Israel y xchatej kan ri tzobaj richin ri Benjamín.

²¹ K'ari' xubij chi kejel-apo ri tzobaj richin ri Benjamín y chukojol ri' xchatej kan jun jay winaqi' richin ri Matrí y chupan ri' xchatej kan ri Saúl, ruk'ajol ri Cis. Y xkikanoj k'a ri Saúl chikikojol y man xkil ta.

²² K'ari' ri Samuel xuk'utuj k'a jun bey chik chire ri Jehová, richin niketamaj wi ri Saúl k'o chiri' o ni. Y ri Jehová xubij chike chi ri Saúl kan k'o-wi chiri' y xa xrewaj-ri' chukojol ri ejqa'n.

²³ K'ari' xebe junanin richin xbekik'ama-pe, y xkiya' pa kinik'ajal ri winaqi' richin ri tinamit. Toq ri Saúl xapon chikikojol ri winaqi', xkitz'et chi kan man jun chik ri más ta nim rupalen chuwech rija'.

²⁴ Y ri Samuel xubij chire ri tinamit: ¿Xitz'et ri achike xucha' ri Jehová richin nok kan rey? ¡Man jun chiwe rix ri nitikir ta nujunamaj-ri' rik'in rija'!, xcha'. K'ari' ri winaqi' xkibij: Utz ruwa-ruq'ij ri rey, yecha'.

²⁵ Chirij ri' ri Samuel xuq'alajirisaj chuwech ri tinamit ronojel ri k'o chi nuben ri rey y xutz'ibaj kan chupan jun wuj. Y re wuj re' xuyek kan chupan ri rachoch ri Jehová.

²⁶ K'ari' xeruteq-el ri winaqi', y chikijujunal xebe pa taq kachoch. Y ri Saúl chuqa' xbe pa rachoch pa Guibeá e rachibilan-el ri aj-labal. Y ri achi'a' ri' kan ja ri Dios ri xsilon-el kánima richin xebe chirij ri Saúl.

²⁷ Jak'a ri e q'ori' xkibij: ¿Nitikir kami rija' yojrukol?, xecha'. Y kan man xkiya' ta k'a rejqalen y man jun k'a sipanik xkiya' chire. Jak'a ri Saúl xuben chi man xniman ta chike.