1 Rey 6 - Kaqchiquel Bible

Ri rey Salomón nupaba-q'anej ri rachoch ri Jehová

¹ Toq ri rey Salomón xq'aton yan pe tzij kaji' juna' pa ruwi' ri ruwach'ulew Israel, chupan ri ruka'n ik' ri nibix Zif chire, jari' toq xuchop-q'anej rupabaxik ri rachoch ri Jehová. Y re' xbanatej toq ri israelita 480 juna' yan ke'el-pe pan Egipto.

² Y ri rupan rachoch ri Jehová ri xupaba-q'anej ri rey Salomón xuya' k'a waqlajuj jaj raqen, wo'o' jaj rik'in ka'i' q'a'aj ruwech y waqxaqi' jaj rujotolen.

³ Ri corredor ri k'o-pe chuwech ri ruchi' ri rachoch ri Dios, k'o k'a wo'o' jaj rik'in ka'i' q'a'aj raqen y ka'i' jaj rik'in nik'aj ri ruwech.

⁴ Pa jotol-q'anej chire ri jay ri' xerubanala' ventana ri kokoj yeq'alajin ri chuwech-el y ri chupan xa janila e nima'q kibanik.

⁵ Chuqa' xerupabala-q'anej ch'aqa' chik jay pa taq ruxikin y ri chirij. Pa taq cholaj k'a xerubanala' chike, y oxi' wiq jotol chikaj.

⁶ Ri cholaj jay ri ek'o pa nabey wiq jun jaj rik'in ka'i' q'a'aj ruwech ri kipan, y ri cholaj jay ri ek'o pa ruka'n wiq, jun jaj rik'in nik'aj ruwech ri kipan y ri rox wiq jun jaj rik'in nik'aj ruwech ri kipan. Ri tz'aq richin ri jay kan choj-choj beneq-q'anej niq'alajin ri chuwech, jak'a ri chupan, ri tz'aq richin ri nabey wiq kan más pim rubanon y ri ruka'n wiq más chik juba' xax, y ri tz'aq richin ri ruk'isibel-q'anej wiq kan más k'a ti xax. Keri' k'a xban chire richin chi ri che' ri yeq'e'e', yeli'e-qa pa ruwi' ri wiq tz'aq ri e banon kan.

⁷ Ri rachoch ri Jehová xpabex k'a q'anej rik'in abej ri kichojmirisan chik pe ri achi'a', roma ri' kan man jun chik k'a bajibel, ni toch'bel abej, ni samajibel ri banon rik'in q'eqapueq ri xukusex ta chik chiri' richin xban ri jay ri'.

⁸ Ri ruchi' ri napon chupan chi oxi' wiq jay k'o pa xokon chire ri rachoch ri Jehová. Y richin yajote-el, k'o k'a jotolbel banon ri achi'el caracol rubanik.

⁹ Y toq xk'is-q'anej rubanik ri tzaq, k'ari' xya'ox ri ruwi', rik'in tiox-che' ri e banon tz'alem y tem chire.

¹⁰ Toq xeruben k'a ri cholaj jay ri xkisutij-rij ri rachoch ri Dios, ri kipalen chikijujunal wiq jay jun jaj rik'in jun q'a'aj jotol. Keri' k'a xban chire richin chi ri tiox-che' ri yeq'e'e', yeli'e-qa pa ruwi' ri wiq tz'aq ri e banon kan.

¹¹ Toq ri Salomón najin chubanik ri jay ri', ri Jehová xubij chire:

¹² Ninwajo' yich'on awik'in pa ruwi' re jay re yatajin chupabaxik. Wi rat kan xtataqej ronojel ri jalajoj ruwech nupixa', yin kan xtinben k'a ri xinsuj chire ri David ri atata', kan awik'in k'a rat xtiq'ajer-wi ri nubin chire.

¹³ Y kan xkik'ase' k'a chi'ikojol rix nuwinaq Israel chupan re jay re', y kan man xkixinmalij ta kan, xcha'.

¹⁴ Keri' k'a ri Salomón xuk'is-q'anej rubanik ri tz'aq y ri ruwi' ri jay.

Ri Salomón nuchop ruwiqik rupan ri rachoch ri Jehová

¹⁵ Ronojel ri ruwech ri rupan ri jay, xuya' tz'alem tiox-che' chuwech. Ri tz'alem ri' xerut'ajajej-q'anej, xuchop-el ri pan ulew chire ri jay k'a pa jotol-q'anej k'a akuchi e q'e'el-wi ri tem richin ri ruwi'. Y ri pan ulew, tz'alem k'isis k'a ri xerut'ajajej-qa.

¹⁶ Chupan ri nima-jay ri' xuben k'a jun rutaslen, richin xuben chik kan jun ti jay ri chirij-qa. Y xuben chi wo'o' jaj rik'in ka'i' q'a'aj raqen y wo'o' jaj rik'in ka'i' q'a'aj ruwech. Ri ti jay ri' xut'ajajej chuqa' rik'in tz'alem tiox-che', nitiker-el pan ulew y napon k'a chikaj-q'anej. Keri' k'a xban ri jay ri akuchi kan man jun wineq nok-apo roma chiri' k'o-wi ri Jehová.

¹⁷ Y ri jun chik jay chuwech-pe ri tasbel, lajuj jaj rik'in nik'aj ri raqen.

¹⁸ Chijun ri rupan ri rachoch ri Jehová xnojisex ruwech rik'in tiox-che' y kan man jun abej niq'alajin ta pe. Y ri tiox-che' ri xeyolox chuwech ri jay kan xeban k'a jalajoj ruwech retz'aba'l achi'el ri kotz'i'j y ri ruwachibel taq ik'oy.

¹⁹ Y ri ti jay ri k'o-apo chirij xuwiq k'a, richin chiri' niya'ox-wi ri káxa richin ri rujikibel-tzij ri Jehová.

²⁰ Y ri jay ri' ri akuchi kan man jun wineq nok-apo xuben chire chi kaji' jaj rik'in nik'aj raqen, ri ruwech y ri rujotolen. Xutz'apej rik'in q'anapueq ri jebel ch'ajch'oj, ronojel ri ruwech ri jay ri' y xuben chuqa' ri porobel-pom rik'in tiox-che', y k'ari' xutz'apej-rij rik'in q'anapueq.

²¹ Chuqa' xutz'apej ruwech ri tz'alem chupan ri jun chik jay rik'in q'anapueq ri jebel ch'ajch'oj, y xuben jun cadena ri banon rik'in q'anapueq, y xuya' akuchi k'o-wi ri okibel chupan ri jay ri kan man jun wineq nok-apo chiri'.

²² Xuya' k'a q'anapueq chijun ruwech ri rupan ri ka'i' jay, nitiker-el pan ulew k'a pa jotol-q'anej. Chuqa' xuya' k'a q'anapueq chirij ri porobel-pom ri k'o-apo chupan ri jay akuchi k'o-wi ri Jehová.

²³ Chuqa' chupan ri jay ri' xeruben kiwachibel ka'i' querubín rik'in che' olivo. Xuben chike chi ri kipalen ka'i' jaj rik'in oxi' q'a'aj.

²⁴ Chikijujunal k'a ri querubín ri' kirik'ik'en ri kixik', y ka'i' jaj rik'in oxi' q'a'aj ruwech ri kixik' chikijujunal.

²⁵ Chi e ka'i' k'a querubín junan-junan kibanik y junan k'a ketabal.

²⁶ Ri kipalen ka'i' jaj rik'in oxi' q'a'aj.

²⁷ Ri Salomón xeruya' k'a ri ka'i' kiwachibel querubín chupan ri jay ri akuchi k'o-wi ri Jehová, y rije' kan kirik'on k'a ri kixik'. Ri kixik' chi e ka'i' nutun-ri' pa nik'aj chire ri jay ri', y ri jun chik rutza'n ri kixik' napon k'a chuwech ri jay.

²⁸ Ri ka'i' querubín ri' kan xnojisex chuqa' kij rik'in q'anapueq.

²⁹ Y chuwech ri tz'alem ri k'o chupan ri rachoch ri Jehová xerubanala' k'a kiwachibel querubín, palma y kotz'i'j.

³⁰ Y ri pan ulew pa ruwi' ri tz'alem, xuya' q'anapueq chirij, y keri' xuben chire chupan ri jay y ri corredor.

³¹ Y ri pan okibel richin ri jay ri akuchi k'o-wi ri Jehová, xuya' ruchi' ri banon rik'in tz'alem olivo. Ri ruchi' ri jay wo'o' k'a rutza'n.

³² Ri ka'i' ruxaq ri ruchi-jay xuben rik'in che' richin olivo y chuwech ri' xeruben ruwachibel querubín, palma y ri kotz'i'j. K'ari' xuya' q'anapueq chirij chijun ri ruxaq ri ruchi-jay.

³³ Ri marco richin ri ruchi' chijun ri jay xuben rik'in che' olivo, y kaji' rutza'n xuben chire.

³⁴ Y ri ruxaq ri ruchi-jay ri', rik'in k'a k'isis xeruben-wi, y kaji' k'a ruxaq ruk'uan ri' ri kan yerik'itej toq yejaqatej, xuben chire.

³⁵ Chuqa' xeruben kiwachibel querubín, palma y kotz'i'j ri e toch'on chuwech ri ruxaq. K'ari' xuya-apo q'anapueq chikij ronojel re'.

³⁶ Y xuben k'a ri tz'aq chirij ri ruwa-jay richin xutz'apej rij, y xuben-q'anej rik'in abej ri banon chik rutzil. Xuben chire chi pa ruwi' ri ox-ox cholaj abej, xeq'ebalox kan jujun cholaj tz'alem ri banon rik'in tiox-che'. Y keri' xban chire chijun ri tzaq.

³⁷ Ronojel ri samaj richin xban ri rachoch ri Jehová xchapatej chupan ri ik' Zif chire ri rukaj juna' chire ri q'atbel-tzij richin ri Salomón. Y chupan ri ik' ri' xeya'ox-qa ri nabey taq abej richin xban-q'anej ri jay ri'.

³⁸ Y chupan ri juna' julajuj, chupan ri ik' waqxaqi' rubini'an Bul, jari' toq xk'achoj-q'anej ri rachoch ri Jehová achi'el ri rubanik ri bin. Wuqu' k'a juna' ri xuk'uaj richin xban-q'anej ri rachoch ri Dios.