1 Rey 5 - Kaqchiquel Bible

¹ K'o k'a jun achin rubini'an Hiram, rey richin ri ruwach'ulew Tiro, y rija' janila xrajo' ri David toq k'a k'es na. Y jun q'ij xeruteq k'a pe jun tzobaj rusamajela' richin xbekiq'ejela' ri Salomón roma xrak'axaj chi ja rija' xok kan rey pa ruk'exel ri David ri rutata'.

² Y toq xetzolej ri samajela' ri', ri rey Salomón xuteq k'a rubixik chire ri rey Hiram y xubij:

³ Rat awetaman jebel chi ri David ri nata', man xtikir ta xpaba' kan jun rachoch ri Jehová ri qa-Dios, roma rija' ja ri labal kik'in ri e etzelanel kichin ri xerubanala', k'a ri q'ij toq ri Jehová xerujech pa ruq'a'.

⁴ Y wakami ri Jehová ri nu-Dios xuya' yan uxlanibel-k'u'x qik'in roma kan man jun chik etzelanel qichin k'o, ni man jun ri achike ta xtiqach'ob rij.

⁵ Roma ri' yin wakami ninwajo' ninpaba-q'anej jun rachoch ri Jehová ri nu-Dios, roma kan keri' rubin chire ri nata' toq k'a k'es na rija'. Ri Jehová xubij chire ri nata' chi xtuya' kan jun chike ri ruk'ajol pa ruk'exel rija' chupan ri ruq'atbal-tzij. Y chuqa' xubij chi ri ruk'ajol ri', jari' ri xtipaban-q'anej ri rachoch.

⁶ Yin nink'utuj k'a jun nimalej utzil chawe chi tataqa' ruqupixik tiox-che' pa Líbano, y yin xkentoj ri asamajela' ri xkebanon ri samaj achi'el ri kajel ri xtabij rat, roma awetaman chi re wawe' pa nutinamit man jun nitikir niqupin che' achi'el ri isamaj rix ri aj-Sidón. Yin xkenteq chuqa-el nusamajela' ri xketo'on kichin, xcha-el ri Salomón.

⁷ Toq ri rey Hiram xrak'axaj ri ch'abel ri rutaqon-el rubixik ri rey Salomón, janila xkikot y xmatioxin y xunimirisaj ruq'ij ri Jehová, roma kan ruya'on jun ruk'ajol ri David, ri janila runa'oj richin nuq'et-tzij pa ruwi' ri jun nimalej tinamit.

⁸ K'ari' xuteq rubixik chire ri rey Salomón y xubij: Xink'ul yan k'a ri ch'abel ri xateq-pe rubixik chuwe. Yin kan xtinya' k'a chawe ri che' ri ak'utun-pe, y chuqa' xtinya-el k'isis ri nik'atzin chawe.

⁹ Ri nusamajela' xtikeraj-el ri che' pa Líbano y xtikik'uaj k'a chuchi' ri palou. Y yin xtinteq-el ri che' ri' pa ruwi' ya' richin napon akuchi xtabij-wi rat. Y chiri' ri asamajela' xtikisol ri che' y xtikeraj-el. Xaxe k'a nink'utuj chawe chi xtaya-pe chike ri nusamajela' ronojel ri nik'atzin richin nitij wawe' pa wachoch, xcha'.

¹⁰ Y keri' ri rey Hiram kan xuya' k'a ronojel ri tiox-che' y ri k'isis, xa janipe' ri nik'atzin chire ri rey salomón.

¹¹ Y ri Salomón chi juna' chi juna' xuteq más juba' 2,200 quintal trigo, y más juba' 4,000 litro aceite richin oliva ri jebel ch'ajch'oj; ronojel re' richin nikitej ri ek'o pa rachoch ri rey Hiram.

¹² Ri Jehová kan xuya' k'a runa'oj ri rey Salomón achi'el ri rusujun chire, y xk'oje' k'a uxlanibel-k'u'x chikikojol ri e ka'i' rey ri', y xkiben k'a jun jikibel-tzij chikiwech.

¹³ Ri rey Salomón xuteq koyoxik e 30,000 achi'a' chiri' pan Israel, richin nibekibana' ri samaj.

¹⁴ Y xeruteq k'a el e 10,000 pa Líbano richin yesamej chiri'; chi sol chi sol k'a xeruteq. Jun ik' k'a yebesamej chiri', y ka'i' ik' k'a yebek'oje' chi taq kachoch. Y ja ri Adoniram ri k'o pa ruwi' ronojel ri samaj ri'.

¹⁵ Pa ruwi' re' ri rey Salomón xuteq koyoxik chuqa' e 70,000 rusamajela' ri ye'uk'uan ejqa'n, y e 80,000 achi'a' ri yechoyon abej y nikiben rutzil chiri' chuwi' taq juyu'.

¹⁶ Y pa ruwi' ri' ek'o e 3,300 nima'q taq samajela' ri ek'o pa kiwi' konojel ri samajela' ri'.

¹⁷ Y ri rey Salomón chuqa' xuteq rubixik chi kequpix-pe jebelej taq abej ri nima'q kibanik y e choj, richin nok ruxe' ri rachoch ri Dios.

¹⁸ Y ri samajela' ri yechoyon abej, ri xekichojmirisala' ri che' richin ri rachoch ri Jehová, ek'o aj chiri' pan Israel, ek'o aj-Sidón y ek'o aj-Guebal chuqa'.