1 Rey 2 - Kaqchiquel Bible

Ruk'isibel taq ruch'abel ri David chire ri Salomón

¹ Xapon k'a ri q'ij chi ri David xa niken yan, y roma ri' kere' xubij kan chire ri Salomón ri ruk'ajol:

² Ri q'ij richin ri nukamik xa kan napon yan k'a, jak'a rat kan kow k'a kak'oje', y xkatok ta k'a jun kow laj achin.

³ Kan tataqej k'a ronojel ri pixabanik ri nuya' ri Jehová ri qa-Dios, y chuqa' tataqej ronojel ri pixa' ri ruya'on kan chire ri Moisés, richin keri' ronojel ri xtaben kan utz k'a xtel chawech xabakuchi xkabe-wi,

⁴ roma ri Jehová kan rujikiban rutzij chinuwech y rubin chi wi ri walk'ual xtikitaqej ri rubey rija', y wi kan qitzij chi xtikitzeqelibej rija' rik'in ronojel kánima y ronojel kik'u'x; wi keri', kan jantape' k'a xtik'oje' jun wijatzul chupan ri tz'uyubel richin q'atoy-tzij.

⁵ Rat awetaman chik ri xuben ri Joab chuwe ri ral ri Seruiá. Ri richin chi xuben ruk'exel chike ri kamik ri xkiben ri Abner ruk'ajol ri Ner, y ri Amasá ruk'ajol ri Jéter, ri e aj-raqen pa kiwi' ri aj-labal, kan xerukamisaj. Y re' xuben ri Joab stape' k'o uxlanibel-k'u'x. Y roma ri' man xaxe ta k'a rija' xutz'ilobisaj-ri' rik'in kik', xa kan xuben chuqa' chi xel itzel nutzijol.

⁶ Wakami k'a tanojij achike naben chire richin man naya' q'ij chi niken rik'in uxlanibel-k'u'x.

⁷ Jak'a ri e ralk'ual ri Barzilai ri aj-Galaad, kan tajoyowaj kiwech, y taya' q'ij chike chi yewa' junan awik'in pa mesa, roma ja rije' xeto'on wichin toq yin in animajineq-el chuwech ri awach'alal Absalón.

⁸ Keri' chuqa' ri Simí ruk'ajol ri Guerá y rijatzul kan ri Benjamín aj-Bahurim. Rija' xa xroyoj itzel pa nuwi' ri q'ij toq yin in beneq pa Mahanaim. Chirij ri', xa xiberuk'ulu' chik chuchi' ri raqen-ya' Jordán, y yin xinya' nutzij chire pa rubi' ri Jehová chi man ninkamisaj ta.

⁹ Jak'a wakami, rat man takuy rumak. Roma rat kan k'o-wi ana'oj, takanoj k'a achike naben rik'in richin nakamisaj, xcha' ri David chire ri Salomón.

Ri rukamik ri David

¹⁰ Xken k'a ri David y xapon kik'in ri rute-rutata', y xmuq chupan ri rutinamit kan rija'.

¹¹ Ri David xq'aton-tzij pa ruwi' ri ruwach'ulew Israel kawineq juna'. Wuqu' juna' xq'aton-tzij pa tinamit Hebrón, y juwineq oxlajuj juna' pa tinamit Jerusalem.

¹² Jak'a ri Salomón ri xk'oje' kan pa ruk'exel ri David ri rutata', y kan jebel xjike' kan chupan ri q'atbel-tzij.

Ri nabey taq rusamaj ri Salomón

¹³ Chirij k'a ronojel re' ri Adonías ral ri Haguit xapon rik'in ri Betsabé, ri rute' ri Salomón. Y ri Betsabé xubij chire: ¿At peteneq rik'in uxlanibel-k'u'x?, xcha' chire. Y ri Adonías xubij chi keri'.

¹⁴ Ri Adonías xubij k'a: Xa jun ka'i' ch'abel ninwajo' ninbij chawe, xcha'. Y ri Betsabé xubij chire chi tubij ri nrajo'.

¹⁵ K'ari' ri Adonías xubij: Rat jebel awetaman chi ja ta yin ri xinok kan rey pa ruk'exel ri nata' roma kan keri' ta xkajo' konojel ri qawinaq. Jak'a rija' xa chire ri awal ri xuya' wi kan ri q'atbel-tzij roma kan ja ri Jehová biyon chire.

¹⁶ Wakami k'a ninwajo' nik'utuj jun utzil chawe y man nabij chuwe chi man yatikir ta. Y toq ri Betsabé xubij chire chi tubij achike nrajo',

¹⁷ rija' xubij: Ninwajo' chi yach'on ta juba' rik'in ri rey Salomón, roma rija' xtunimaj atzij rat. Yin ninwajo' chi nak'utuj ta chire richin nuya' ta q'ij chuwe chi nok wixjayil ri Abisag ri aj-Sunem, xcha' ri Adonías.

¹⁸ Y ri Betsabé xubij k'a chi kan xtibech'on rik'in ri rey pa rubi' rija'.

¹⁹ Xok k'a apo ri Betsabé rik'in ri rey, richin niberubij ri rutaqikil ri Adonías. Y ri Salomón xyakatej-q'anej richin xuk'ul ri rute', y kan xulukuba-qa-ri' chuwech y k'ari' xtz'uye' chik qa pa rutz'uyubal. K'ari' xuteq ruk'amik jun ch'aket richin ri rute', y kan pa rijkiq'a' k'a xk'oje-wi.

²⁰ Y ri rute' xubij k'a apo: K'o jun ninwajo' nink'utuj chawe y ninwoyobej chi kan ta xtabij chuwe chi ja', xcha'. Y ri rey xubij chire ri rute' chi tuk'utuj ri achike nrajo', y kan xtuya' ronojel chire.

²¹ Y ri Betsabé xubij: Taya' q'ij chi ri Adonías nuk'uaj ri Abisag richin nok rixjayil, xcha'.

²² K'ari' ri Salomón xubij chire ri rute': ¿Achike k'a roma nak'utuj ri Abisag ri aj-Sunem richin nok rixjayil ri Adonías? ¿O xa nawajo' nak'utuj chuqa' ri q'atbel-tzij richin rija'? Wi keri', kan utz k'ari', roma ja rija' nimalaxel. ¡Pa ruwi' ri' ek'o ri sacerdote Abiatar y ri Joab rik'in!, xcha'.

²³ Y ri rey Salomón xuya' k'a rutzij pa rubi' ri Jehová y xubij chi ja ri Dios xtiya'on ruk'ayewal pa ruwi' rija' wi man xtukamisaj ta ri Adonías roma ri xuk'utuj.

²⁴ Y ri Salomón chuqa' xubij: Ja ri Dios ri xya'on q'ij richin ja yin xik'oje' kan pa ruk'exel ri David ri nata', y chuqa' rija' kan xutaqej ri rubin chi kan ja ri wijatzul yin ri xkek'oje' chupan ri ajawaren, y roma ri' chuwech ri Jehová, ninbij chi kan k'atzinel chi nikamisex ri Adonías, xcha'.

²⁵ K'ari' ri rey Salomón chi'anin k'a xuteq rubixik chire ri Benaías ruk'ajol ri Joiadá, richin tukamisaj ri Adonías. Y ri Benaías xunimaj k'a tzij, y xbe chukamisaxik ri Adonías.

²⁶ Chirij re' ri rey xubij chire ri sacerdote Abiatar: Katzolin pan aruwach'ulew ri k'o chunaqaj ri tinamit Anatot, roma kan ruk'amon richin xaken yan ta; jak'a xa man ninben ta roma ja rat xatuk'uan ri káxa richin ri Jehová toq k'a k'es na ri nata', y kan xatej k'a poqon rik'in, xcha'.

²⁷ Keri' k'a xuben ri rey Salomón richin xrelesaj-el ri sacerdote Abiatar. Y keri' xbanatej k'a ri rubin ri Jehová pa Siló chi k'o chi yek'is ri rijatzul kan ri sacerdote Elí.

²⁸ Stape' ri Joab man xutzeqelibej ta ri Absalón, jak'a xa xutzeqelibej ri Adonías, y roma ri' toq xapon re rutzijol re' rik'in, rija' kan chi'anin xberewaj-ri' chiri' rik'in ri porobel ri k'o chuwa-jay chire ri rachoch ri Jehová, y xuchop k'a ri taq uk'a' ri ek'o pa ruwi' ri porobel.

²⁹ Y xbekibij k'a chire ri rey Salomón chi ri Joab xberewaj-ri' chirij ri porobel ri k'o chuwa-jay chire ri rachoch ri Jehová. K'ari' ri rey xuteq-el ri Benaías, ruk'ajol ri Joiadá, richin niberukamisaj kan.

³⁰ Y ri Benaías xbe akuchi rewan-wi ri' ri Joab, y xubij chire: Ri rey nubij chi katel-pe chiri', xcha'. Jak'a ri Joab xubij-pe: Ni, yin wawe' xkiken-wi, xcha'. K'ari' ri Benaías xberubij chire ri rey achi'el xbix-el chire roma ri Joab.

³¹ K'ari' ri rey xubij: Tabana' k'a achi'el xubij rija' chawe. Takamisaj k'a y tamuqu' kan. Rik'in keri' man ja ta chik roj ri oj aj pa rachoch kan ri David, ri nata' ri xqojejqalen ri kikamik ri e ka'i' achi'a' ri xa maneq kimak, ri xerukamisaj ri Joab.

³² Kan ja ri Jehová xtiya'on ruk'ayewal pa ruwi' ri Joab roma xerukamisaj chi espada ri Abner, ruk'ajol ri Ner, y ri Amasá, ruk'ajol ri Jéter, y rije' kan más k'a e utz chuwech rija'. Jak'a ri nata' kan man xretamaj ta toq ri Joab xerukamisaj ri e ka'i' achi'a' ri': ri Abner, aj-raqen kichin ri aj-labal richin ri Israel, y ri Amasá, aj-raqen pa kiwi' ri aj-labal richin ri Judá.

³³ Richin keri' ri Joab y konojel ri rijatzul, kan jantape' xtikejqalej re mak re'. Jak'a ri Jehová kan jantape' xtuya' uxlanibel-k'u'x kik'in ri e rijatzul kan ri David ri xkek'oje' chupan ri q'atbel-tzij, xcha' ri Salomón.

³⁴ Xbe k'a ri Benaías richin xberukamisaj kan ri Joab chiri' rik'in ri porobel. Ri Joab xmuq k'a pa rachoch, ri k'o pa tz'iran ruwach'ulew.

³⁵ K'ari' ri rey Salomón xuben chi ri Benaías, ruk'ajol ri Joiadá, xok aj-raqen pa kiwi' ri aj-labal ri e richin kan ri Joab; y chuqa' xuben chi ri sacerdote Sadoc xok kan pa ruk'exel ri Abiatar.

³⁶ Chuqa' xuteq royoxik ri Simí y xubij chire: Tapaba-q'anej jun awachoch wawe' pa Jerusalem, y kak'oje' wawe' y man jun chik akuchi yabe-wi.

³⁷ Y wi k'o jun q'ij xkatel-el wawe' y xtaq'axaj ri ch'uti'n raqen-ya' Cedrón, tawetamaj k'a chi xkabeken y kan ja rat ri k'o amak, xcha' ri Salomón chire.

³⁸ Y ri Simí xubij chire ri rey: Janila utz ri nabij chuwe yin ri in asamajel, y kan keri' k'a ri xtinben achi'el ri xabij rat, xcha'. Y ri Simí xk'oje' chiri' pa Jerusalem oxi' juna'.

³⁹ Jak'a toq xq'ax yan ri oxi' juna', jari' toq e ka'i' samajela' ri e yuqul pa samaj rik'in ri Simí xe'animej-el, y xebek'oje' pa tinamit Gat rik'in ri rey Áquis ri ruk'ajol ri Maacá. Y xretamaj k'a ri Simí chi ri e ka'i' rusamajela' xa ek'o pa tinamit Gat.

⁴⁰ Toq rija' xunabej re', k'ari' xuchojmirisaj-el ri rubur richin xbe pa Gat, rik'in ri rey Áquis, y chiri' xerukanoj k'a pe ri rusamajela' y xeruk'en-pe rik'in.

⁴¹ Chirij ri', xbeya'ox rutzijol chire ri rey Salomón chi ri Simí xbe pa Gat, jak'a xa xtzolin yan pe.

⁴² K'ari' ri rey xuteq royoxik ri Simí y xubij chire: Rat xaya' atzij chuwech ri Jehová toq yin xinbij chawe chi ri q'ij toq xkatel-el pa jun chik ruwach'ulew, kan xkabeken, xicha' chawe. Y rat xabij chuwe chi kan xtaben ri xinbij.

⁴³ ¿Achike k'a roma man xachajij ta re ya'on-tzij re' y ri ch'abel ri xinbij chawe yin?, xcha' ri rey.

⁴⁴ Chuqa' xubij chire ri Simí: Rat jebel awetaman chi ri xaben chire ri David ri nata' kan man utz ta, y roma ri itzel ri xaben, ri Jehová kan xtuya' rutojbalil pan awi' wakami.

⁴⁵ Jak'a yin kan janila urtisanik xtiya'ox pa nuwi', y ri Jehová xuben yan chi ri q'atbel-tzij richin ri David ri nata' kan xtik'oje' kan richin q'asen, xcha' ri rey chire ri Simí.

⁴⁶ Chirij re' ri rey xuya-el q'ij chire ri Benaías richin tukamisaj kan ri Simí, y kan keri' k'a xbanatej toq ri q'atbel-tzij xjike' kan pa ruq'a' ri Salomón.