1 Rey 16 - Kaqchiquel Bible

¹ Y xeri' ri Jehová xch'on rik'in jun achin rubini'an Jehú, ri ruk'ajol ri Hananí, richin tuq'alajirisaj chuwech ri xtiberuk'uluwachij ri Baasá y xubij chi kere' tubij chire:

² Yin xatinsik' k'a y xinimirisaj aq'ij toq xinben chawe richin xatok rey pa ruwi' ri nutinamit Israel. Y wakami xa xaben achi'el xuben ri Jeroboam; xa xaben richin xemakun ri nutinamit, y xiben richin xiyek woyowal rik'in ri imak.

³ Roma ri' xtinwelesaj ri ak'aslen rat Baasá, y xkenk'is k'a konojel ri ek'o pan awachoch; y xtinben awik'in achi'el xinben kik'in ri aj pa rachoch ri Jeroboam ruk'ajol kan ri Nabat.

⁴ Xabachike chike ri aj pan awachoch ri xtiken chupan ri tinamit, xketij koma ri tz'i', y ri xkeken pa juyu' xketij koma aj-xik' taq chikopi', xcha' ri Jehová.

⁵ Y ronojel ri ch'aqa' chik ri xuben ri Baasá chupan ri ruq'atbal-tzij, ri ruchuq'a' ri ruq'atbal-tzij y ronojel ri rusamaj, e tz'ibatel kan chupan ri Wuj Ri Cholan Nich'on pa kiwi' ri rey richin Israel.

⁶ Y ri Baasá xuxlan k'a el y xmuq pa tinamit Tirsá. Y ri xq'aton kan tzij pa ruk'exel, ja ri ruk'ajol rubini'an Elá.

⁷ Ri Jehová kan rubin chik k'a chire ri Jehú ri q'alajirisey ruch'abel, ri xtuk'uluwachij ri Baasá y chuqa' chikij konojel ri ek'o pa rachoch, roma ronojel ri mak ri xuben chuwech ri Jehová, y xuben chire richin xuyek royowal. Roma ri' xkebek'is ri Baasá y ri ek'o pa rachoch, achi'el xuben chire ri Jeroboam.

Ri q'atbel-tzij richin ri Elá pan Israel

⁸ Toq ri Asá k'a k'es na, y chupan ri juna' juwineq waqi' richin ri ruq'atbal-tzij pa ruwi' ri Judá, jari' toq xok kan rey ri Elá, ri chiri' pan Israel. Y xk'oje' pa tinamit Tirsá richin xuq'et-tzij. Y xuq'et-tzij ka'i' juna'.

⁹ Pan Israel k'o k'a jun achin ri aj-raqen pa ruwi' ri nik'aj chike ri kajlabal ri carruaje richin oyowal richin ri Elá, y rija' rubini'an Zimrí. Y k'o k'a jun q'ij ri Elá k'o pa Tirsá, pa rachoch ri Arsá ri samajel ri k'o pa kiwi' ri ch'aqa' chik samajela' ri e yuqul pa samaj pa rachoch rija'. Y ri Zimrí xyakatej chirij ri rey Elá, toq ri rey Elá k'o chiri' pa rachoch ri Arsá, y kan janila q'abarel.

¹⁰ Ri Zimrí xapon k'a chiri' pa jay akuchi k'o-wi ri rey Elá y xukamisaj. Ronojel re' xbanatej k'a chupan ri juna' juwineq wuqu' chire ri q'atbel-tzij richin ri Asá, rey richin Judá. Y ja ri Zimrí xok kan rey pa ruk'exel ri Elá.

¹¹ Y ri Zimrí kan xaxe toq xok kan rey y xapon pa rutz'uyubal richin nuq'et-tzij, jari' toq xerukamisaj ri aj pa rachoch ri Baasá; kan man jun chik achin xuk'asba' ta kan, ni ta ri e rach'alal, ni ta ri e rachibil.

¹² Y keri' xuben rija' toq xeruk'is konojel aj pa rachoch kan ri Baasá. Kan xbanatej-wi achi'el rubin kan ri Jehová chire ri Jehú ri q'alajirisey ri ruch'abel, chi kan yek'is na ri aj pa rachoch ri Baasá,

¹³ roma ri rumak rija' y ri rumak ri Elá ri ruk'ajol. Kan xemakun rije' y xkiben chuqa' chi xemakun ri tinamit Israel toq xkiya' kiq'ij ch'aqa' chik dios. Rik'in ri' xkiyek royowal ri Jehová Dios richin Israel.

¹⁴ Ronojel ri ch'aqa' chik ri xebanatej chupan ri q'atbel-tzij richin ri Elá y ronojel ri rusamaj, e tz'ibatel kan chupan ri Wuj Ri Cholan Nich'on pa kiwi' ri rey richin Israel.

Ri q'atbel-tzij richin ri Zimrí pan Israel

¹⁵ Toq ri Asá k'a k'es na y chupan ri juna' juwineq wuqu' richin ri ruq'atbal-tzij pa ruwi' ri Judá, jari' toq xok kan rey ri Zimrí, ri chiri' pa tinamit Tirsá. Xuq'et k'a tzij wuqu' q'ij. Y chupan ri q'ij ri' ri aj-labal richin Israel ek'o-qa pa tinamit Guibetón richin nikiben oyowal kik'in ri winaqi' aj-Filistea.

¹⁶ Y ri aj-labal aj-Israel ri ek'o-qa chiri', toq xkak'axaj chi ri Zimrí xyakatej chirij ri Elá y xukamisaj, jari' toq konojel rije' xeyakatej y xkiya' kan rey ri jun achin aj-raqen kichin ri aj-labal, ri rubini'an Omrí.

¹⁷ Y ri Omrí y konojel aj-labal xe'el-el chiri' pa Guibetón, y xbekisutij-rij ri tinamit Tirsá.

¹⁸ Y toq ri Zimrí xutz'et chi xch'akatej yan ri tinamit Tirsá, kan jari' toq rija' xok chupan ri jay richin tobel ri k'o pa rachoch ri rey, y xuya' k'a ruq'aq'al ri jay ri' y chiri' xken-wi rija'.

¹⁹ Ri Zimrí kan xmakun k'a chuwech ri Jehová y xa xuben achi'el xuben ri Jeroboam; y roma ri mak ri' xemakun chuqa' ri winaqi' richin Israel.

²⁰ Y ri ch'aqa' chik rubanobal ri Zimrí chupan ri ruq'atbal-tzij toq xyakatej chirij ri rey Elá, e tz'ibatel k'a chupan ri Wuj Ri Cholan Nich'on pa kiwi' ri rey e richin Israel.

Ri q'atbel-tzij richin ri Omrí pan Israel

²¹ Y xeri' ri winaqi' aj-Israel xa xkich'er k'a ki' pa ka'i' tzobaj; y ri jun tzobaj xkitzeqelibej ri Tibní ri ruk'ajol ri Guinat ri xkiben chire richin xok kan rey, y ri jun chik tzobaj xkitzeqelibej ri Omrí.

²² Jak'a ri winaqi' ri e tzeqelibeyon-el richin ri Omrí xetikir más chikiwech ri e tzeqelibeyon-el ri Tibní. Jak'a ri Tibní xa xken, y ja ri Omrí ri xk'oje' kan rey pa ruwi' chijun ri ruwach'ulew Israel.

²³ Toq ri Asá k'a k'es na, y chupan ri juna' juwineq julajuj richin ri ruq'atbal-tzij pa ruwi' ri Judá, jari' toq xok kan rey ri Omrí, y xq'aton-tzij kablajuj juna'. Y waqi' juna' chire ri kablajuj xq'aton-tzij pa tinamit Tirsá.

²⁴ Y k'o k'a jun juyu' chiri' ri rubini'an Samaria, y ri rajaw ri juyu' ri' rubini'an Sémer. Y ri Omrí xuloq' k'a kan ri juyu' ri'. Xutoj jubama jun quintal rik'in nik'aj saqipueq, y chiri' xupaba-wi-q'anej jun tinamit ri xubini'aj Samaria, roma ri nabey rajaw xubini'aj Sémer.

²⁵ Jak'a ri Omrí xa kan itzel k'a ri rubanobal chuwech ri Jehová, y ja rija' ri más xmakun chikiwech ri rey ri xek'oje' nabey chuwech rija'.

²⁶ Kan xuben k'a achi'el xuben ri Jeroboam ri ruk'ajol ri Nabat, y rik'in ri mak ri' xuben chike richin xemakun konojel aj-Israel, y kan xuyek k'a royowal ri Jehová Dios koma ri ch'aqa' chik wachibel ri nikiya' kiq'ij.

²⁷ Y ri ch'aqa' chik rubanobal ri Omrí chupan ri ruq'atbal-tzij; ri nima'q taq rubanobal rija' y ri samaj ri xek'achoj chuwech, ronojel re' e tz'ibatel kan chupan ri Wuj Ri Cholan Nich'on pa kiwi' ri rey richin Israel.

²⁸ Y rija' xuxlan k'a el y xmuq junan kik'in ri rute-rutata' chupan ri tinamit Samaria, y ri xk'oje' kan pa ruk'exel, ja ri ruk'ajol rubini'an Acab.

Toq ri Acab xq'aton-tzij pan Israel

²⁹ Toq ri Asá k'a k'es na, y chupan ri juna' juwineq waqxaqlajuj richin ri ruq'atbal-tzij pa ruwi' ri Judá, jari' toq xok kan rey ri Acab ri ruk'ajol ri Omrí, ri chiri' pan Israel.

³⁰ Y xk'oje' pa tinamit Samaria richin xuq'et-tzij. Xuq'et k'a tzij juwineq ka'i' juna' ri chiri'. Y ri Acab xa kan itzel k'a ri rubanobal chuwech ri Jehová, y ja rija' ri más xmakun chikiwech ri rey ri xek'oje' nabey chuwech rija'.

³¹ Ri Acab kan man xuch'ob ta juba' chi xa mak ri xerubanala' ri Jeroboam ri ruk'ajol ri Nabat, y kan jari' ri xuchop rubanik rija'. Pa ruwi' ri' kan xk'ule' rik'in jun ixoq rubini'an Jezabel, rumi'al ri Et-baal rey kichin ri aj-Sidón. Ri Acab xuchop k'a rusamajixik y ruya'ik ruq'ij ri Baal.

³² Y xuben jun rachoch ri Baal ri chiri' pa Samaria, y chupan ri jay ri', xuben jun porobel richin nikiya' ruq'ij ri Baal.

³³ Chuqa' xuben-q'anej jun paban-che' richin nikiya' ruq'ij ri Asera. Ja rija' ri más xmakun chikiwech ri rey ri xek'oje' nabey chuwech rija', y roma ri' xuyek royowal ri Jehová ri Dios richin Israel.

³⁴ Chupan k'a ri q'atbel-tzij richin ri Acab, k'o jun achin rubini'an Hiel, aj-Betel, ri nrajo' nuchojmirisaj-q'anej ri tinamit Jericó. Toq xuchop k'a rubanik ri ruxe', xken ri nabey ruk'ajol ri rubini'an Abiram, y toq xuben-q'anej ri ruchi' ri tinamit, xken ri ruch'i'p rubini'an Segub. Kan xk'uluwachitej k'a achi'el ri rubin ri Jehová chire ri ánima Josué ri ruk'ajol ri Nun.