1 Rey 15 - Kaqchiquel Bible

¹ Toq ri Jeroboam ri ruk'ajol ri Nabat, xapon chupan ri waqxaqlajuj juna' chi niq'aton-tzij pa ruwi' ri tinamit Israel, jari' toq ri Abiam xok-q'anej rey ri chiri' pa Judá.

² Y rija' xq'aton-tzij oxi' juna' chiri' pa Jerusalem. Ri rute' rubini'an Maacá, y re ixoq re' rumam ri Absalón.

³ Y ri Abiam xa xuben ri mak achi'el xuben ri rutata', xa man xucha' ta ruk'u'x chubanik ri niqa' chuwech ri Jehová ri ru-Dios, man xuben ta achi'el xuben ri David ri rumama'.

⁴ Jak'a ri Jehová man xuchup ta kan ri rijatzul ri ánima David roma ri rajowabal pa ruwi' rija', y roma ri' xuya' jun ruk'ajol ri Abiam richin chi jari' ri xtik'oje' kan chupan ri q'atbel-tzij, y chuqa' richin chi ri Jerusalem man nitzaq ta.

⁵ Ri David kan choj k'a ri rubanobal ri xeruben chuwech ri Jehová, y kan man xujech'ej ta kan ri' rik'in ri rupixa' ri Jehová ronojel q'ij chire ri ruk'aslen, ri xumakuj xa kan xaxe ri xuben rik'in ri Urías ri hitita.

⁶ Y chijun k'a ri kik'aslen ri Abiam y ri Jeroboam, kan jantape' xk'oje' labal chikikojol.

⁷ Y keri' ronojel ri ch'aqa' chik banobel richin ri rey Abiam xetz'ibatej k'a chupan ri Wuj Ri Cholan Nich'on pa kiwi' ri rey, y kan jantape' k'a xk'oje' labal chikikojol ri ka'i' rey ri'.

⁸ Xuxlan k'a el ri Abiam y xmuq akuchi e muqun-wi ri rute-rutata' chupan ri rutinamit kan ri rey David, y ri xk'oje' kan pa ruk'exel ri Abiam ja ri Asá ri ruk'ajol.

Ri q'atbel-tzij richin ri Asá

⁹ Toq ri Jeroboam k'a k'es na, y chupan ri juna' juwineq richin ri ruq'atbal-tzij pa ruwi' ri Israel, jari' toq xok kan rey ri Asá, ri ruk'ajol ri Abiam, ri chiri' pa Judá.

¹⁰ Y rija' xq'aton-tzij kawineq jun juna' chiri' pa Jerusalem. Ri rati't rubini'an Maacá, y re ixoq re' rumi'al ri Absalón.

¹¹ Ri Asá kan utz k'a xuben chuwech ri Jehová, achi'el xuben ri David ri rati't-rumama'.

¹² Y rija' kan xerelesaj-el ri achi'a' ri kijachon-ki' chubanik itzel k'aslen richin xkiya' kiq'ij ri ki-dios, y xeruwulaj k'a el ronojel wachibel ri e kibanalon kan ri rutata' y ri e rati't-rumama'.

¹³ Y chuqa' xuben chire ri rati't chi xel-pe chupan ri q'atbel-tzij, roma rija' xuben-q'anej jun itzel ruwachibel Asera. Ri Asá xuwulaj-el ri wachibel ri', y xberuboxo' pa q'aq' chuchi' ri ch'uti'n raqen-ya' Cedrón.

¹⁴ Ri ránima rija' kan xuya' k'a richin xuben ri xrajo' ri Jehová chupan chijun ruk'aslen, stape' xa man xeruwulaj ta el ri akuchi xya-wi kiq'ij ri ch'aqa' chik dios ri pa ruwi' taq juyu'.

¹⁵ Chuqa' xuya-apo chupan ri rachoch ri Jehová ri rusujun kan ri rutata', y ri rusujun-apo rija'; ri q'anapueq, ri saqipueq y ri jalajoj kiwech samajibel.

Ri labal chirij ri Baasá

¹⁶ Y chijun k'a ri kik'aslen ri Asá y ri Baasá, rey richin Israel, kan jantape' xk'oje' oyowalen chikikojol.

¹⁷ Y ri Baasá xyakatej k'a el richin niberubana' oyowal rik'in ri Asá, rey richin Judá. Xjote' k'a el chirij ri tinamit Ramá, y xuchop xupaba-q'anej jun tz'aq richin nutz'apej ri bey richin chi yeruq'et ri winaqi' ri ye'el-ye'ok chupan ri ruwach'ulew Judá y rik'in ri Asá.

¹⁸ K'ari' ri Asá xberuk'ama-pe ronojel saqipueq y q'anapueq ri k'a k'o na kan chupan ri beyomel richin ri rachoch ri Jehová y ri k'o chuqa' chupan ri rubeyomel ri rachoch rija'. Xeruteq-el ri rusamajela' rik'in ri Ben-hadad ri rey richin ri ruwach'ulew Siria. Rija' ruk'ajol ri Tabrimón y rumam kan ri Hezión. Y ri Ben-hadad niq'aton-tzij chiri' pa tinamit Damasco.

¹⁹ Y rik'in ronojel ri beyomel ri kik'uan ri samajela', chuqa' xuteq-el rubixik: Yin xinteq k'a el chawe jun sipanik, juba' saqipueq y juba' q'anapueq. Wakami k'a tijunamatej-qawech roj, achi'el xkiben ri qatata'. Yin niwajo' chi rat yabe ta rik'in ri Baasá, rey richin Israel, richin nawelesaj-awi' chupan ri jikibel-tzij ri abanon rik'in, richin chi rija' kerelesaj-el ri aj-labal ri e okineq-pe pa nuruwach'ulew, xcha-el ri Asá chire.

²⁰ Y ri Ben-hadad xjunamatej-ruwech rik'in ri rey Asá, y xeruteq-el ri achi'a' ri e aj-raqen pa kiwi' ri aj-labal, richin xbekibana' oyowal kik'in ri aj-Israel. Y keri' xkich'ek ri tinamit Iión, ri Dan, ri Abel-bet-maacá, ri ruwach'ulew Quinéret y chuqa' chijun ruwach'ulew richin ri Neftalí.

²¹ Y toq ri Baasá xrak'axaj re', xutanaba' kan ri samaj ri najin chupabaxik pa Ramá y xtzolej pa tinamit Tirsá.

²² Y k'ari' ri rey Asá xerumol konojel ri winaqi' ri ek'o pa rajawaren, y kan man jun ri xya'ox kan chaq keri'. Xerumol k'a richin xkik'uaj-el ronojel ri xk'atzin chire ri Baasá richin xupaba-q'anej ri tz'aq. Konojel ri winaqi' ri' xkeraj-el ri abej y ri che' ri najin chukusaxik ri Baasá. Jari' ri xukusaj ri rey Asá richin xeruben-q'anej tz'aq chikij ri tinamit Mispá y ri Gueba ri k'o pa ruwach'ulew Benjamín.

Toq ri Asá xken

²³ Y ronojel ri xuben ri rey Asá; ri xebanatej chupan ri ruq'atbal-tzij rija', y chuqa' ri rusamaj y ri tinamit ri xerupaba-q'anej, ronojel re' e tz'ibatel kan chupan ri Wuj Ri Cholan Nich'on pa kiwi' ri rey richin ri Judá. Chupan k'a ri q'ij richin ri rurijixinen, xyawej k'a roma xqaqa jun yabil chire ri raqen.

²⁴ Y rija' xuxlan k'a el, y xmuq k'a junan kik'in ri rute-rutata' chupan ri rutinamit kan ri rey David; y ri Josafat ri ruk'ajol, kan k'o chik k'a pe pa ruk'exel.

Ri q'atbel-tzij richin ri Nadab chiri' pan Israel

²⁵ Toq ri Asá k'a k'es na, y chupan ri ruka'n juna' richin ri ruq'atbal-tzij pa ruwi' ri Judá, jari' toq xok kan rey ri Nadab, ri ruk'ajol ri Jeroboam, ri chiri' pan Israel. Y ka'i' k'a juna' xuq'et-tzij.

²⁶ Ri Nadab xmakun k'a chuwech ri Jehová y xuben achi'el xuben ri Jeroboam ri rutata', y rik'in ri mak ri' xuben richin xemakun konojel aj-Israel.

²⁷ Y ri Baasá, ruk'ajol kan ri Ahías, ri aj-ruwach'ulew Isacar, xerumol k'a achi'a' y xerachibilaj richin xyakatej chirij ri Nadab. Xberusutij-rij ri tinamit Guibetón, jun tinamit kichin kan ri aj-Filistea. Y chiri' xukamisaj-wi ri rey Nadab.

²⁸ Toq ri Baasá xukamisaj ri Nadab, jari' toq ri Asá ruchapon rox juna' tok kan rey chiri' pa Judá, y ja ri Baasá xok kan pa ruk'exel ri Nadab chiri' pan Israel.

²⁹ Y ri Baasá kan xaxe toq xok kan chupan ri q'atoy-tzij xerukamisaj konojel ri aj pa rachoch ri Jeroboam, y kan man jun chik ri xuk'asba' ta kan. Xuben wi k'a achi'el rubin ri Jehová chire ri rusamajel Ahías ri aj-Siló,

³⁰ roma ri mak ri xuben ri Jeroboam, kan rik'in ri' xemakun konojel israelita, y rik'in ri' xuben richin xuyek royowal ri Jehová, Dios richin Israel.

³¹ Y ronojel ri ch'aqa' chik ri xebanatej chupan ri ruq'atbal-tzij ri Nadab y ronojel ri rusamaj ri xeruben, e tz'ibatel kan ronojel chupan ri Wuj Ri Cholan Nich'on pa kiwi' ri rey richin ri Israel.

³² Y chijun k'a ri kik'aslen ri Asá y ri Baasá, rey richin Israel, kan jantape' xk'oje' labal chikikojol.

Ri q'atbel-tzij richin ri Baasá chiri' pan Israel

³³ Toq ri Asá k'a k'es na, y chupan ri rox juna' richin ri ruq'atbal-tzij pa ruwi' ri Judá, jari' toq xok kan rey ri Baasá, ri chiri' pan Israel. Y xk'oje' pa tinamit Tirsá richin xuq'et-tzij. Xuq'et k'a tzij ka'i' juna'.

³⁴ Xmakun chuqa' chuwech ri Jehová, y xa xuben achi'el xuben ri Jeroboam, y roma ri mak ri' xemakun chuqa' ri winaqi' richin Israel.