1 Rey 11 - Kaqchiquel Bible

Ri Salomón xuya' kiq'ij ch'aqa' chik dios

¹ Ri rixjayil ri rey Salomón ja ri rumi'al ri rey richin Egipto, jak'a pa ruwi' ri' ek'o más ixoqi' ri xerajo' y xe'ok rixjayil. Ek'o chike rije' e aj-Moab, aj-Amón, aj-Edom, aj-Sidón y chuqa' ixoqi' hitita; konojel re ixoqi' re' man e ruwinaq ta.

² Y chikij k'a re' ch'owineq chik kan ri Jehová y rubin kan chike ri israelita chi man kek'ule' kik'in ri winaqi' ri', roma wi xtikiben keri' kan jujik chi xtikiben chike ri israelita chi xtikitzeqelibej ri ki-dios rije'. Jak'a ri Salomón xerajo' konojel re ixoqi' re',

³ y xek'oje' e 700 rixjayil ri kan más kejqalen, y ek'o chuqa' 300 ru-concubina.*f6* Ja ixoqi' re' ri xesacho ruk'u'x ri Salomón,

⁴ y toq ri rey Salomón xapon pa rurijixinen, ri ixoqi' kan kisachon chik k'a ruk'u'x y xerutzeqelibej ri ch'aqa' chik dios. Ri ránima kan man choj ta chik chuwech ri Jehová ri ru-Dios. Kan man xuben ta achi'el xuben ri David ri rutata',

⁵ roma ri Salomón xa xuya' ruq'ij ri dios ixoq rubini'an Astarté ri ki-dios ri aj-Sidón y ri itzel wachibel richin Milcom, ri ki-dios ri aj-Amón.

⁶ Ri rey Salomón kan man utz ta k'a xuben roma man xutzeqelibej ta ri Jehová achi'el xuben ri David ri rutata'.

⁷ Y jari' toq ri rey Salomón xuteq k'a rupabaxik ri akuchi niya'ox-wi ruq'ij ri itzel ruwachibel Quemós ri dios kichin ri aj-Moab, ri chiri' pa ruwi' jun juyu' ri k'o pa relebel-q'ij ri chiri' pa Jerusalem, y chuqa' xuteq rupabaxik ri akuchi niya'ox-wi ruq'ij ri itzel ruwachibel Moloc ri dios kichin ri amonita.

⁸ Y keri' chuqa' xuben chike ri ki-dios ri ch'aqa' chik rixjayil ri man e israelita ta, roma rije' nikiporoj pom y nikisuj kamelabel chikiwech ri ki-dios.

⁹ Roma ri Salomón xa xujech'ej kan ri' chire ri Jehová ri ru-Dios, roma ri' ri Jehová kan janila xyakatej royowal chirij. Ri Jehová kan ruk'utun chik ri' ka'i' mul chuwech ri Salomón,

¹⁰ y chuqa' kan rubin chire chi man tuya' kiq'ij ch'aqa' chik dios. Man rik'in ri', ri Salomón man xunimaj ta ri xubij ri Jehová chire.

¹¹ Roma ri' ri Jehová xubij chire: Roma kere' ri abanobal y xaxolq'otij ri jikibel-tzij, y man xataqej ta ri xinbij chawe, wakami k'a kan xtinwelesaj chawe ri q'atbel-tzij y ninya' chire jun asamajel.

¹² Jak'a, roma kan janila xinwajo' ri David ri atata', roma ri' man ninwelesaj ta ri q'atbel-tzij chawe rokik k'a at k'es na. Xa k'a ja pa ruq'a' ri ak'ajol xtinwelesaj-wi kan.

¹³ Stape' keri', kan man chi ronojel ta ri ajawaren xtinwelesaj kan pa ruq'a' ri ak'ajol. Xa kan k'a xtinya' na k'a kan jun chik tzobaj chire ri nutinamit richin xtik'oje' kan pa ruq'a'; kere' xtinben roma ri wajowabal chire ri David ri nusamajel, y roma ri wajowabal pa ruwi' ri nutinamit Jerusalem ri nucha'on chik, xcha' ri Jehová.

Ri etzelanel richin ri rey Salomón

¹⁴ K'ari' ri Jehová xuben richin xbek'ulun-pe jun etzelanel richin ri rey Salomón, y ri etzelanel richin rubini'an Hadad, rija' ruk'ajol ri rey richin ri ruwach'ulew Edom.

¹⁵ Toq ri David y ri Joab ri aj-raqen kichin ri aj-labal richin ri David k'a e k'es na, xek'oje' ri chiri' pan Edom. Y jari' toq ri Joab y ri aj-labal xebe-q'anej richin xebekimuqu' kan ri kiwinaq ri xeken chupan ri oyowal ri', y chuqa' xerukamisaj kan konojel achi'a' aj-Edom.

¹⁶ Waqi' k'a ik' xek'oje' chiri' ri Joab y konojel aj-labal e richin Israel, k'a xekik'is na kan kikamisaxik konojel achi'a' aj-Edom.

¹⁷ Toq najin ri kamik ri', ri Hadad k'a ti ala' na ok chiri'. Y rija' xanimej-el kik'in ka'i-oxi' achi'a' aj-Edom, ri e rusamajela' ri rutata', y xebe k'a pan Egipto richin xkewaj-el-ki'.

¹⁸ Xe'el k'a el chiri' pa Madián y xebe k'a pa Parán y chiri' xekikanoj-el ka'i-oxi' chik achi'a' richin xekachibilaj-el, y k'ari' xe'apon pan Egipto. Y rije' xbekik'utu-ki' chuwech ri rey richin Egipto, y ri rey ri' xuya' chire ri Hadad jun rachoch, rulew, y ronojel ri nik'atzin chire richin nutej.

¹⁹ Y ri rey richin Egipto janila jebel xutz'et ri Hadad, y roma ri' xuk'uluba' rik'in ri rixnan, ri rach'alal ri reina Tahpenés.

²⁰ Toq e k'ulan chik, re ixoq re' xk'oje' jun ti ral rik'in ri Hadad y xubini'aj Guenubat. Y toq xelesex rutz'um ri ak'ual, ri Tahpenés xuk'uaj ri ak'ual chiri' pa rachoch ri rey, y chiri' xk'iy-wi junan kik'in ri ralk'ual ri rey.

²¹ Y toq q'axineq chik k'iy juna', jari' toq ri Hadad xrak'axaj chiri' pan Egipto chi ri David xuxlan yan el, y chuqa' xken ri Joab aj-raqen kichin ri aj-labal. Jari' toq ri Hadad xubij chire ri rey richin Egipto: Yin ninrayibej chi yitzolin ta pa nuruwach'ulew Edom. Tabana' utzil taya-el q'ij chuwe richin yitzolin k'a chila', xcha'.

²² Jak'a ri rey xuk'utuj chire: ¿Achike k'a ri nik'atzin chawe wawe' chi rat nawajo' yatzolin-el pan aruwach'ulew?, xcha' ri rey chire. Y ri Hadad xubij chi man jun ri achike ta nik'atzin chire, xaxe tiya'ox q'ij chire richin nibe.

²³ Y k'o k'a jun achin rubini'an Rezón, ruk'ajol ri Eliadá. Y ri Eliadá animajineq-el chuwech ri rajaw ri rubini'an Hadad-ézer, rey richin ri ruwach'ulew Sobá. Ri Dios kan xuben k'a chire ri Rezón chi chuqa' xok etzelanel richin ri Salomón,

²⁴ roma toq k'a k'es na ri David, ri Rezón xerumol k'a e ka'i-oxi' achi'a' richin xe'eleq', y ja rija' ri xok aj-raqen pa kiwi'. Toq ri David xberubana' oyowal kik'in ri aj-Sobá, y xerukamisaj, jari' toq ri Rezón xanimej-el y xbek'oje' pa tinamit Damasco, y ja ri Rezón xok-qa rey chiri'.

²⁵ Kan xretzelaj ri tinamit Israel janipe' xk'ase-el ri rey Salomón. Ri Hadad y ri Rezón, rey pa ruwi' ri ruwach'ulew Siria, kan janila k'a chi etzelal xkiben chire ri Salomón.

Ri Dios nucha' ri Jeroboam richin nok rey

²⁶ K'o k'a chuqa' jun chik achin ri xyakatej chirij ri rey, y rija' rubini'an Jeroboam, ruk'ajol ri Nabat, y aj pa Seredá ri chiri' pa ruwach'ulew Efraín. Ri rute' jun malka'n ixoq rubini'an Zerúa. Y ri Jeroboam jun chike ri rusamajela' ri Salomón.

²⁷ Jare' ri xbanatej toq ri Jeroboam xupaba-ri' chuwech ri rey. Xa roma ri rey Salomón najin chubanik ri tz'aq ri nusutin-rij ri rutinamit kan ri David, ri rutata'. Xa juba' chik k'a ri nrajo' richin nik'achoj-q'anej ri tz'aq ri', richin chi utz nutaq'ajuj kan rik'in ulew.

²⁸ Ri Jeroboam kan k'o-wi ruchuq'a' y jun achin ri maneq xibinri'il chuwech, y toq ri Salomón xutz'et k'a re k'ajol achin re', chi kan k'o-wi retamabal, jari' toq rija' xuya' pa ruq'a' ronojel ri samaj richin ri tz'aq ri', ri xq'at pa kiwi' ri aj-Manasés y ri aj-Efraín.

²⁹ K'o k'a jun q'ij toq ri Jeroboam eleneq-pe chiri' pa Jerusalem ruyon, y xberuk'ulu-pe jun achin q'alajirisey ri ruch'abel ri Dios, ruyon chuqa'. Re achin re' rubini'an Ahías, y rija' aj-Siló. Ri Ahías ruq'un-el jun k'ak'a' tzieq.

³⁰ Y ri Ahías xrelesaj k'a chirij ri tzieq ri ruq'un, xuretz, y kablajuj wech' xuben chire ri tzieq ri'.

³¹ Y xubij chire ri Jeroboam: Tachapa-el lajuj chire la kablajuj wech' tzieq la' roma rubin ri Jehová ri qa-Dios richin Israel chi rija' xtrelesaj ri ajawaren pa ruq'a' ri Salomón, y xtuya' chawe rat lajuj tzobaj winaqi'.

³² Jak'a chire ri rey Salomón xaxe chik jun tzobaj winaqi' ri xtuya' roma kan nujoyowaj ruwech ri David ri rusamajel, y roma chuqa' kan rucha'on ri tinamit Jerusalem chukojol ronojel ri tinamit pa ruwach'ulew Israel.

³³ Y kere' xtuben ri Jehová rik'in ri rey Salomón roma xa xumalij kan y xa xuya' ruq'ij ri dios ixoq Astarté, y chuqa' kiq'ij ri Quemós ri ki-dios ri aj-Moab y ri Milcom ri ki-dios ri aj-Amón. Y xubij chuqa' ri Jehová chi ri Salomón man xutzeqelibej ta ri utzilej bey, ni man xuben ta ri choj chuwech rija', ni man xutaqej ta ri jalajoj ruwech pixa' ri ya'on chire, achi'el xuben ri David ri rutata'.

³⁴ Y ri Dios xubij chi ja ri David ri rusamajel ri xucha', y rija' kan xutaqej ri rupixa', y roma ri rajowabal pa ruwi' ri David, man nrelesaj ta ronojel ri ajawaren pa ruq'a' ri Salomón, xa kan k'a xtik'oje' na ri ajawaren pa ruq'a' chijun ruk'aslen.

³⁵ Jak'a toq xtok kan jun chike ri ralk'ual chupan ri ajawaren, jari' toq ri Jehová xtrelesaj kan ri ajawaren pa ruq'a' y xtujech pan aq'a' rat ri lajuj tzobaj winaqi'.

³⁶ Y xaxe chik k'a jun tzobaj ri xtuya' kan chire ri ruk'ajol ri Salomón, richin keri' ri rusaqil ri David, man xtichup ta qa chuwech ri Jehová ri chiri' pa tinamit Jerusalem ri rucha'on richin chiri' ninatex-wi ri rubi'.

³⁷ Y xubij ri Dios chi rija' kan at rucha'on chik rat Jeroboam, richin yatok rey pa ruwi' ri Israel, y keri' k'a xtaq'et-tzij pa ruwi' ronojel ri ruwach'ulew ri xtawajo' rat.

³⁸ Y wi xtanimaj ronojel ri xtubij chawe, y wi xtatzeqelibej ri rubey y utz xtaben chuwech rija', y wi xtataqej ronojel ri rupixa'; wi keri', ri Jehová kan xtik'oje' awik'in y kan xkerujikiba' k'a ri aj pan awachoch chupan ri q'atbel-tzij achi'el xuben chire ri rijatzul ri David, y xtujech k'a ri tinamit Israel pan aq'a'.

³⁹ Y ri Jehová nubij chuqa' chi ri e rijatzul kan ri David xtuya' tijoj-poqonal pa kiwi', roma ri rumak ri Salomón, jak'a re tijoj-poqonal re' man richin ta q'asen, kere' rubin ri Jehová, xcha' ri Ahías.

⁴⁰ Y toq ri Salomón xrak'axaj ronojel re', kan xrajo' xukamisaj ri Jeroboam. Jak'a ri Jeroboam xanimej-el y xberuto' ri', k'a rik'in ri Sisac rey richin Egipto y chiri' xbek'oje-wi, k'a toq xken na ri rey Salomón.

Toq ri Salomón xken

⁴¹ Ri ch'aqa' chik banobel chirij ri ruk'aslen ri rey Salomón y ri retamabal, xtz'ibatej kan chupan ri Wuj Ri Cholan Nich'on pa kiwi' ri rey.

⁴² Y ri Salomón kawineq juna' xq'aton-tzij pa ruwi' ri Jerusalem y pa ruwi' chijun ruwach'ulew Israel.

⁴³ Y toq ri Salomón xuxlan-el, xkimuq k'a chupan ri rutinamit kan ri David ri rutata'. Y ri xq'aton kan tzij pa ruk'exel, ja ri Roboam ri ruk'ajol.