1 Pedro 2 - Kaqchiquel Bible

¹ Roma ri' kan tiya' k'a kan ronojel ruwech etzelal, ri q'oloj, ri ka'i' ipalej, ri ch'upun-k'u'x y ronojel kamulun taq tzij,

² y tirayij k'a ri ruch'abel ri Dios richin yixk'iy y niwil kolotajik, achi'el ri taq ak'uala' ri k'a kalaxik, ri nikirayij ri tz'umaj richin yek'iy.

³ Keri' tibana' roma kan iwetaman chik chi ri Dios kan janila utz qik'in.

Ri Cristo achi'el jun abej ri k'o ruk'aslen

⁴ Kan jantape' k'a kixjel-apo rik'in ri Jesucristo ri achi'el jun abej ri k'o ruk'aslen. Ri stape' man xya'ox ta rejqalen koma ri winaqi', jak'a chuwech ri Dios kan cha'on, y janila rejqalen.

⁵ Y roma ixk'o rik'in ri Jesucristo, rix chuqa' ix achi'el abej ri k'o ik'aslen, ri yixukusex richin nipabex-q'anej ri rachoch ri Dios. Y kan ix loq'olej sacerdote, richin nisuj sipanik ri kan niqa' chuwech, pa rubi' ri Jesucristo.

⁶ Roma ri' nubij chupan ri ruch'abel ri Dios:*f3* chiri' pa Sión kan xtinya' k'a jun abej ri cha'on y janila rejqalen. Ja abej ri' ri xtok k'atzinel chire ri ruxe' ri jay. Y xabachike k'a ri rukuquban ruk'u'x rik'in, kan man xtik'ixbitej ta, nicha'.

⁷ Chiwech rix ri ninimaj rija', janila rejqalen jak'a ri winaqi' ri man nikinimaj ta, xtikiben chire achi'el jun abej ri man xqa' ta chikiwech ri aj-tz'aq. Jak'a re wakami ri abej ri' kan más k'atzinel chire ri jay richin chi kow xpa'e' kan.

⁸ Chike ri winaqi' ri man nikinimaj ta, rija' xa xtok jun achi'el abej ri nikipajk'ij kaqen chirij y xketzaq. Xtikik'uluwachij keri' roma man xkinimaj ta ri rubin ri Dios y rik'in ri' nitz'aqet ri ruch'obonik ri Dios.*f4*

Ri kan e rutinamit-wi ri Dios

⁹ Jak'a rix kan ix jun tinamit ri kan ix cha'on roma rija', roma ja rija' ri xelesan-pe iwichin chupan ri q'equ'm y xixruya' chupan ri saqil. Xuben chi xixok ru-sacerdote, jun loq'olej rutinamit y xixok ruwinaq richin chi nitzijoj ri meyel taq rubanobal.

¹⁰ Ri rubanon kan, man ix jun tinamit ta, jak'a re wakami xixok rutinamit ri Dios. Man ik'ulun ta rutzil rija' jak'a re wakami xik'ul ri rutzil.

Tibana' k'a achi'el ri nrajo' ri Dios

¹¹ Wach'alal ri yalan yixinwajo', roma xa ix q'axel chuwech re ruwach'ulew, ninbij k'a chiwe chi man tiya' q'ij chire ri itzel taq rayinik pan ik'aslen roma jari' ri yebanon oyowal iwik'in.

¹² Roma ri' kan tik'uaj jun k'aslen utz, y choj chikikojol ri winaqi' ri man ketaman ta ruwech ri Dios. Richin chi stape' nikimol-pe tzij chiwij chi man utz ta ri ik'aslen, toq xtapon ri q'ij chi ri Dios nuq'et-tzij ri winaqi' ri' xtikiya' ruq'ij-ruk'ojlen ri Dios roma ri utzilej ibanobal rix.

¹³ Chi'iwonojel tinimaj kitzij konojel ri q'atoy taq tzij, roma ri Dios keri' nrajo'. Tinimaj rutzij ri rey, roma ja rija' ri más uchuq'a' k'o pa ruq'a'.

¹⁴ Tinimaj chuqa' kitzij ri ch'aqa' chik q'atoy taq tzij ri e ruq'a-raqen ri rey. Roma ja rije' ri e ya'on richin nikiya' ruk'ayewal pa kiwi' ri e banoy etzelal, y chuqa' richin nikiya' kiq'ij ri nikiben ri utz.

¹⁵ Ri Dios kan nrajo' k'a chi rix ja ta ri utz ri niben ronojel bey, richin keri' man jun yetikir nikibij chiwij ri winaqi' ri man jun ketaman y man yech'obon ta jebel.

¹⁶ Kan kixk'ase' k'a achi'el ri winaqi' ri etotajineq chik. Jak'a man tikusaj ri solbelri'il ri' richin niben ri etzelal. Xa kan kixok k'a rusamajela' ri Dios.

¹⁷ Tiya' iwejqalen y tiwajowala-iwi' ri iniman chik ri Jesucristo. Tiya' ruq'ij ri Dios y tiqasaj-iwi' chuwech ri rey.

Tikoch'o' ronojel, kan achi'el xkoch'on ri Cristo

¹⁸ Y rix ri ix ximon pa samaj, kan tiqasaj k'a iwi' y tinimaj kitzij ri iwajaw, stape' yalan jebel kina'oj iwik'in, o yalan e itzel.

¹⁹ Roma ri Dios xtuya' urtisanik pan iwi' wi yixqaqa pa jun tijoj-poqonal y xa man jun imak ibanon, nikoch' ronojel ri' roma kan k'o-wi chi'ik'u'x ri Dios.

²⁰ Wi rix niya'ox ruk'ayewal pan iwi' roma kan k'o imak xiben, man jun utz nuk'en-pe chiwe chi janila yixkoch'on. Jak'a wi nik'uluwachij ta jun tijoj-poqonal roma jun banobel utz y yixkoch'on, ri Dios kan niqa-wi chuwech ri niben.

²¹ Richin re' toq ri Dios xixroyoj, roma ri Cristo chuqa' xutej poqon iwoma rix, richin chi rix niben chuqa' keri'.

²² Rija' kan man jun bey xmakun, ni man jun bey xeruq'ol ri winaqi'.

²³ Toq xebix poqon taq ch'abel chire, man xutzolij ta ruk'exel rik'in poqon taq ch'abel. Toq xban chire chi nutej poqon, man xubij ta chi nuben ruk'exel chike. Xa pa ruq'a' ri Dios ri kan pa ruchojmilal niq'aton-tzij xuya-wi ronojel ri xkiben chire.

²⁴ Ja rija' ri xuk'uan ri qamak chuwech ri cruz richin xojrukol pa ruq'a' ri mak richin niqachop ta el jun k'aslen choj. Ja rija' ri xsokotej y xken richin nichojmir ri qak'aslen.

²⁵ Rix ri rubanon kan, xa italun-iwi' achi'el taq karne'l ri e sachineq kan. Jak'a re wakami tzolejineq chik pe ik'u'x rik'in ri Yuq'unel iwichin y ri nichajin ri iwánima.