1 Crón 21 - Kaqchiquel Bible

¹ K'o k'a jun q'ij ri Satanás xyakatej k'a chikij ri winaqi' israelita y roma ri' xubij chire ri David chi tutaqa' kajlaxik ri aj-labal.

² Roma ri' ri David xuya' rutzijol chire ri Joab y chike ri e tata'al richin ri tinamit, y kere' xubij: Kixbiyin y kebe'iwajlaj ri aj-labal aj-Israel, nitiker-el pa xokon rik'in ri tinamit Beerseba y yixapon k'a pa xaman rik'in ri tinamit Dan; y no'iya' rutzijol chuwe ri janipe' ek'o, xcha'.

³ Jak'a ri Joab xubij chire: Ja ta k'a ri Jehová xtibanon chiqe richin xqojk'iyer ta más. Qonojel roj oj asamajela'. Roma ri', ¿achike k'a roma keri' nawajo' chi niban? ¿Achike roma naben chiqe richin yojmakun?

⁴ Jak'a ri rubin ri rey, jari' ri k'o chi xunimaj ri Joab, y keri' k'a xbanatej. Xebe k'a ri Joab y ri ch'aqa' chik tata'al chi kajlaxik ri aj-labal chupan chijun ri ruwach'ulew Israel; y k'ari' xetzolin pa Jerusalem.

⁵ Ri Joab xujech k'a ri kajlabal ri achi'a' chire ri David; y ri kajlabal, e 1,100,000 achi'a' ri yetikir yebanon labal rik'in espada ri chiri' pa xaman chire ri ruwach'ulew Israel, y ek'o chuqa' 470,000 ri chiri' pa xokon chire ri ruwach'ulew Judá.

⁶ Jak'a man xe'ajlex ta ri e rijatzul kan ri Leví, y ni ta ri rijatzul kan ri Benjamín, roma ri Joab kan man xqa' ta chuwech ri achike xubij ri rey chire.

⁷ Jak'a ri Dios chuqa' kan itzel xutz'et ronojel re', y xuteq-pe jun ruk'ayewal pa kiwi' ri winaqi' israelita.

⁸ K'ari' ri David xuq'alajirisaj chire ri Dios chi rija' man utz ta xuben chuwech, y roma ri' ri David xuk'utuj kuyubel rumak chuwech, y xubij k'a: Kan jun nimalej mak ri xinben. Y nink'utuj chawe richin takuyu' ri itzel banobel ri xinben chawech yin ri in asamajel, roma xinben chi achi'el xa ta in jun nakanik chawech rat, xcha'.

⁹ K'ari' ri Jehová xuteq rik'in ri David, ri q'alajirisey ruch'abel rubini'an Gad.

¹⁰ Y xubij chire chi tubij chire ri David chi ri Jehová nusuj oxi' ruk'ayewal ri nuya-pe pa ruwi'. Y ri David tucha' k'a ri más utz nuben chuwech.

¹¹ Ri Gad xbe k'a rik'in ri David, y xubij chire: Kere' rubin-pe ri Jehová chuwe richin chi ninbij chawe rat:

¹² Tacha' jun chike re oxi' ruk'ayewal re' ri xtinbij-apo chawe: Ri nabey, oxi' juna' wayjal; ri ruka'n, oxi' ik' ri yixch'akatej koma ri etzelanel iwichin; y ri rox, oxi' q'ij ri kan ja ri Jehová ri xtuya-pe ri tijoj-poqonal rik'in ri ru-espada. Toq rija' xtutzeqej ri ru-espada, kan jari' xtiqaqa jun nimalej yabil pa kiwi' konojel ri winaqi'. Yin Jehová xtinkusaj ri nu-ángel richin xtuk'en-pe kamik pa ruwi' chijun ruwach'ulew Israel, nicha' ri Jehová. Roma ri', rat David tach'obo' k'a jebel ri achike nabij-el, richin keri' yin xtinbenbij chire ri Jehová ri in taqayon-pe, xcha' ri Gad.

¹³ K'ari' ri David xuk'uluba' ri ruch'abel ri Gad: Yin ink'o pa jun nimalej bis. Más ta utz ja ta ri Jehová xtiya'on ri ruk'ayewal pa nuwi', y man ta xkiqaqa pa kiq'a' ri e etzelanel wichin, roma más k'o joyowanik rik'in ri Jehová ke chikiwech rije', xcha'.

¹⁴ Roma ri' ri Jehová xuya' k'a pe jun nimalej yabil pa kiwi' ri achi'a' israelita, y xeken, e 70,000.

¹⁵ K'ari' ri Jehová xuteq k'a pe ri ru-ángel richin nuk'is ri Jerusalem. Jak'a toq ri ángel najin chire ri kamik, ri Jehová xq'axon rik'in, y xubij chire: Xaxe kela'. Man ye'akamisaj ta chik más, xcha'. Chupan k'a ri ramaj ri' ri ru-ángel ri Jehová k'o pa kaq'iq' pa ruwi' ri akuchi nuch'ey-wi trigo ri Ornán ri jebuseo.

¹⁶ Toq ri David xtzu'un-q'anej, jari' toq xutz'et ri ángel k'o pa kinik'ajal ri ruwach'ulew y ri kaj, y ruk'uan jun espada relesan-el pa ruk'ojelibal richin nuq'ijuj ri Jerusalem. Ri David y ri e tata'al ri ek'o rik'in kan jari' xkilukuba-qa-ki' pan ulew. Y rije' kikusan ri tzieq richin bis.

¹⁷ K'ari' ri David xubij chire ri Dios: ¡Ja yin ri xibin chi ke'ajlex ri achi'a'! ¡Ja yin ri ximakun y xinben janila itzel! ¿K'o kami kimak xkiben re achi'a' re' chawech? Wajaw nu-Dios, nink'utuj utzil chawe richin chuwij yin tiqaqa-wi ri ruk'ayewal y chikij ri e aj pa rachoch kan ri nata', jak'a man jun chik taben chire ri atinamit, xcha'.

Ri Dios man xuya' ta chik ruk'ayewal

¹⁸ K'ari' ri ángel richin ri Jehová xubij chire ri Gad chi tubij chire ri David chi tiberubana' jun porobel ri akuchi nich'ayon-wi trigo ri Ornán ri jebuseo.

¹⁹ Y ri David kan xjote' k'a el chupan ri ulew ri', achi'el xubij ri Gad chire, roma kan ja ri Jehová biyon chire.

²⁰ Rokik ronojel re' ri Ornán nich'ayon trigo. Y toq xtzu'un chirij, jari' toq xutz'et ri ángel. Jak'a ri e kaji' ruk'ajol ri ek'o rik'in rija' xa xkewaj-ki'.

²¹ Toq ri David xapon akuchi k'o-wi ri Ornán, ri Ornán kan xaxe toq xutz'et ri David, xel-pe chiri' richin xxuke-qa chuwech.

²² K'ari' ri David xubij chire: Tak'ayij chuwe re awulew re' rik'in jun utzilej rajel richin yin xtinpaba-q'anej jun porobel richin ninsuj kamelabel chuwech ri Jehová, richin keri' ri Jehová xtrelesaj-el re nimalej yabil re' ri qajineq pa ruwi' ri qatinamit, xcha'.

²³ Y ri Ornán xubij k'a chire ri David: Takusaj, nu-rey, y tabana' ri niqa' chawech. Yin yenya' ri bóyix richin ye'aporoj chijun, ri ch'ayibel trigo richin nok si', y ri trigo richin sipanik. Ronojel re' yenya' chawe nu-rey, xcha'.

²⁴ Jak'a ri David xubij: Janila ninmatioxij chawe, jak'a kan k'o chi ninloq' chawe rik'in utz rajel, roma yin man xtinsuj ta kamelabel chuwech ri Jehová ri xa man yin ta in loq'oyon; y man xtinporoj ta chikop ri xa man nutojon ta rik'in méro, xcha'.

²⁵ K'ari' ri David xuya' k'a wolajuj libra q'anapueq chire ri Ornán richin xutojbej ri ulew ri'.

²⁶ Y ri David xupaba-q'anej jun porobel richin ri Jehová, y xerusuj chikopi' ri yeporox chijun, y xusuj sipanik richin nuq'alajirisaj chi junan ruwech rik'in ri Dios. Xeri' xch'on rik'in ri Jehová, y ri Dios xuk'uluba-pe ri ruch'abel rik'in q'aq'. Y ri q'aq' ri' peteneq chila' chikaj, y xqaqa pa ruwi' ri porobel.

²⁷ K'ari' ri Jehová xubij chire ri ángel chi tuyaka' k'a ri ru-espada. Y ri ángel kan keri' xuben.

²⁸ Y toq ri David xutz'et chi ri Jehová kan xrak'axaj ri ruch'owen, chiri' ri akuchi k'o-wi ri rulew ri Ornán aj-Jebús, jari' toq jantape' xerusuj kamelabel chiri'.

²⁹ Jak'a ri porobel richin yesuj chikopi' y ri rachoch ri Jehová ri xuben kan ri Moisés pa tz'iran ruwach'ulew; re' ye'ilitej-q'anej pa tinamit Gabaón.

³⁰ Jak'a ri David man xtikir ta xbe k'a chiri' pa Gabaón richin nuya' ruq'ij ri Dios, roma kan janila xuxibij-ri' y xuch'ob chi wi xtel-el chiri', ri Dios nukamisaj rik'in ri espada ri'.