1 Crón 17 - Kaqchiquel Bible

Ri Dios xuben jun jikibel-tzij rik'in ri David

¹ Y toq ri David k'o chik chupan ri k'ak'a' rachoch, jari' toq xubij chire ri Natán ri q'alajirisey ruch'abel ri Dios: Wakami yin ink'o pa jun utzilej jay ri kan rik'in tiox-che' banon-wi. Jak'a ri káxa richin ri rujikibel-tzij ri Dios xa pa jun ok ti jay banon rik'in tzieq ri k'o-wi, xcha'.

² Y ri Natán xubij: Tabana' k'a ri janipe' ri nach'ob pan awánima richin naben, roma ri Dios kan k'o-wi awik'in.

³ Jak'a chupan ri aq'a' ri', ri Dios xch'on rik'in ri Natán y xubij chire:

⁴ Kabiyin rik'in ri David ri nusamajel, y tabij chire chi yin ninbij chi man ja ta rija' ri xtipaban-q'anej ri wachoch richin yik'oje' chupan.

⁵ Roma yin kan man jun bey ri ink'o ta pe chupan jun utzilej jay. Kan ja toq xenwelesaj-pe ri tinamit Israel pan Egipto, k'a re wakami. Xa kan xaxe ink'o-pe pa jalajoj kiwech jay ri e banon rik'in tzieq.

⁶ Ronojel mul yibe kela-yibe kela' xinben chupan chijun ri binen ri xkiben ri tinamit Israel, y man jun bey nuch'ojin ta chike ri aj-raqen ri ek'o pa ruwi' ri nutinamit richin nikipaba' ta q'anej jun wachoch rik'in tiox-che'.

⁷ Keri' tabij chire ri David ri nusamajel, chi yin Jehová ri k'iytisanel richin ronojel ninbij chi xatinwelesaj-pe chikikojol ri karne'l richin man ye'ayuq'uj ta chik, richin keri' xatok jun tata'al pa ruwi' ri nutinamit Israel.

⁸ Kan ink'o awik'in ri akuchi at beneq-wi, janipe' k'a ri e etzelanel awichin kan xenk'is. Kan xinnimirisaj k'a ri abi', achi'el ri nima'q taq achi'a' ri ek'o chuwech ri ruwach'ulew.

⁹ Y chire ri' xinch'er jun ruwach'ulew iwichin rix, ri nutinamit; y xinya' k'a chiwe richin xiwichinaj kan, ri akuchi man jun yixnaqon. Ni ta ri e itzel taq achi'a', ni ri itzel kibanobal man xkixkiya' ta pa tijoj-poqonal achi'el ri ojer kan,

¹⁰ toq yin xenya' ri e chojmirisey ri yebanatej pan iwi'. Yin kan xtinqasaj kiq'ij konojel ri etzelanel awichin, y kan ninq'alajirisaj k'a chawe chi kan xkek'iyer k'a ri awijatzul.

¹¹ Y toq xtapon ri q'ij richin yaken, yin kan xtinjikiba' jun chike ri ak'ajol chupan ri q'atbel-tzij.

¹² Rija' xtupaba-q'anej jun wachoch, y yin xtinjikiba' ri ruq'atbal-tzij richin q'asen.

¹³ Yin kan xkinok rutata', y rija' xtok nuk'ajol. Man xtinwelesaj ta ri wajowabal ni ri joyowanik chire, achi'el xinben rik'in ri Saúl ri achoq pa ruk'exel xak'oje-wi kan rat.

¹⁴ Y rija' kan xtijike' k'a kan chupan ri wachoch y chuqa' chupan ri wajawaren, richin q'asen; y kan xtik'ase' ri ruq'atbal-tzij richin jantape', xcha' ri Jehová chire ri Natán.

¹⁵ Chirij ri' ri Natán kan xubij k'a ronojel chire ri David, achi'el ri xutz'et y ri xrak'axaj.

¹⁶ K'ari' ri rey David xch'on rik'in ri Jehová, y xubij: Jehová Dios, ¿in achike ta k'a ok yin, y e achike ta k'a ri ek'o pa wachoch richin xinaya' k'a pa jotol?

¹⁷ Y pa ruwi' re', chawech rat kan ti juba' ok: Nata' Dios, kan xach'on yan chikij ri nuk'ajol yin, ri in asamajel. Y chuqa' kan xinatz'et achi'el jun achin ri kan k'o rejqalen. ¡Jehová Dios!

¹⁸ ¿Achike ta chik k'a xkitikir xtinbij, roma xaben chuwe richin xk'oje' nuq'ij? roma rat awetaman in achike ok yin.

¹⁹ Jehová, roma ri nimalej ajowabel ri k'o pan awánima kan xajikiba' k'a ri xasuj chuwe, richin chi niq'alajin ri nunimirinen.

²⁰ Jehová, man jun chik k'o achi'el rat, y man jun chik dios ri k'o ta chawech. Y ronojel re' kan qetaman chik roj.

²¹ Man jun chik tinamit k'o achi'el roj ri atinamit ri k'o ta jun ru-Dios achi'el rat; roma kan xaxe rat ri xatikir xojakol richin xojok atinamit. Chuqa' xel k'a atzijol chijun ri ruwach'ulew roma ri meyel taq abanobal ri xe'aben. Rat ri xatoqotan kichin ri winaqi' richin ch'aqa' chik ruwach'ulew chikiwech ri qate-qatata' ri xe'awelesaj-pe pan Egipto.

²² Y xaben chiqe chi roj xojok atinamit richin q'asen, y ja rat Jehová, xatok qa-Dios.

²³ Wakami k'a, Jehová, kan xtaben ri asujun chuwe yin ri asamajel, y chike ri ek'o pa wachoch. Kan xtaben ta k'a achi'el ri abin,

²⁴ richin chi ri wijatzul xtik'oje' richin q'asen, y richin chi ri abi' kan xtinimirisex k'a. Y roma ri' ri winaqi' xtikibij chi ja rat Jehová, ri Dios ri k'iytisanel richin ronojel; ja rat ri Dios ri atk'o pa qawi' roj ri oj aj-Israel. Y chuqa' keri' rat xtajikiba' ri wijatzul richin q'asen.

²⁵ Rat, nu-Dios yin, utz xaq'alajirisaj chinuwech chi ri wijatzul xtik'oje' kan richin xtuq'et-tzij; y roma ri' stape' kan in man jun ok chawech, yitikir yich'on awik'in.

²⁶ Rat Jehová, kan at Dios-wi y ja rat ri at nata'; y kan xasuj ri utzilej taq banobel chuwe.

²⁷ Wakami k'a, xqa' chawech richin xaya' urtisanik pa nuwi' y pa kiwi' ri wijatzul richin chi kan xtik'oje' jantape' chawech. Kere' xtibanatej roma rat kan xaya' urtisanik, y re urtisanik re' kan richin q'asen, xcha' ri David.