1 Crón 16 - Kaqchiquel Bible

¹ Xbekiya' k'a kan ri rukáxa ri Dios chupan ri jay ri banon rik'in tzieq ri xuben ri David. Y chirij ri' xekisuj chikopi' ri yeporox jumul, y chuqa' xekisuj sipanik ri nuq'alajirisaj chi junan kiwech rik'in ri Dios.

² Y toq xek'achoj chire ri kamelabel ri', ri David xuya' urtisanik pa ruwi' ri tinamit Israel pa rubi' ri Dios.

³ Chirij re' ri David xusipaj oxi' ruwech kaxlan-wey chike; jun choj kaxlan-wey, jun ponon kaxlan-wey banon rik'in dátil, y jun chik banon rik'in uva chaqirisan. Y re' xusipaj chike konojel aj-Israel ri ek'o chiri'; chi achi'a' chi ixoqi'.

⁴ Chirij ri' ri David xerucha' k'a kan ri e levita richin yesamej chuwech ri káxa richin ri Jehová, richin nikibixaj ri rubi', y nikiya' ruq'ij-ruk'ojlen ri Jehová, ri Dios richin Israel.

⁵ Ri aj-raqen ri xk'oje' kan pa kiwi' ja ri Asaf, ri nuq'ojomaj ri platillo. Chirij-qa rija' ja ri Zacarías, y chirij-qa rija' ja ri Jeiel, ri Semiramot, ri Jehiel, ri Matatías, ri Eliab, ri Benaías, ri Obed-edom y ri jun chik Jeiel. Konojel rije' nikiq'ojomaj ri salterio y ri arpa.

⁶ Y ri e sacerdote Benaías y ri Jahaziel, ja rije' ri yexupun ri trompeta chuwech ri rukáxa ri Dios.

Ri bix ri xuben ri David richin matioxinik

⁷ Y chupan ri q'ij ri', ri David xujech k'a kan re bixanik re' pa ruq'a' ri Asaf y pa kiq'a' ri e rach'alal richin nikiya' matioxinik chire ri Jehová. Y kere' nubij:

⁸ ¡Kan tiqaya' ruq'ij ri Jehová! ¡Kan tiqatzijoj ri nimalej rubi'! Kan tiqatzijoj chike ri tinamit ri nima'q taq banobel ri yeruben.

⁹ Xqojbixan k'a richin niqaya' ruq'ij-ruk'ojlen. Kan tiqatzijoj ri meyel taq banobel ri yeruben.

¹⁰ Kan tiqanimirisaj-qi' roma ri nimalej rubanobal rija'. Kan tikikot k'a ri qánima ri yojkanon richin ri Jehová.

¹¹ Tiqakanoj k'a ri Jehová ri k'o janila uchuq'a' rik'in; Kan tiqakanoj k'a jantape'.

¹² Kan toqaqa k'a chiqak'u'x ronojel ri meyel taq rubanobal ri rubanon qik'in, Man tiqamestaj ri rubanobal ri xaxe qik'in roj xuben-wi. Kan toqaqa k'a chiqak'u'x ri ruchojmilal ri rubin chiqe.

¹³ Kan toqaqa k'a chiqak'u'x roj, ri oj rijatzul kan ri Israel ri rusamajel ri Dios. Kan toqaqa k'a chiqak'u'x roj, ri oj ruk'ajol kan ri Jacob, ri kan oj cha'on roma ri Dios.

¹⁴ Ja rija' ri Jehová ri qa-Dios; Ja rija' ri niq'aton-tzij pa ruwi' chijun ri ruwach'ulew.

¹⁵ Rija' kan jantape' xtik'oje' pa ránima ri rujikibel-tzij; rija' man xtumestaj ta ri rusujunik, stape' xtiq'ax jun 1,000 sol winaqi':

¹⁶ Re jikibel-tzij re' ri xuben rik'in ri Abraham, re yo'ontzij re' ri xuben rik'in ri Isaac,

¹⁷ re jikibel-tzij ri xuben chik rik'in ri Jacob, re jikibel-tzij richin q'asen ri xuben qik'in roj ri oj israelita.

¹⁸ Jare' ri jikibel-tzij ri xuben: Kan xuya' ri ruwach'ulew Canaán chiqe; ri xqak'ul roj richin xqichinaj kan.

¹⁹ Stape' ri qate-qatata' e juba' ok, y xa e q'axel chuwech re ruwach'ulew re',

²⁰ y xa xebe-kela' xebe-kela' pa taq ruwach'ulew, y xeq'axilan pa jun tinamit y chupan chik jun;

²¹ Man rik'in ri' ri Jehová kan man xuya' ta q'ij richin xetz'ilox; koma ri qate-qatata', ri Jehová xuya' tijoj-poqonal pa kiwi' ri ch'aqa' chik rey.

²² Y man xuya' ta q'ij richin yetz'ilox ri e rucha'on; ni man xuya' ta q'ij richin yeyoq' ri e q'alajirisey ri ruch'abel.

²³ Kan tiqabixaj ri rubi' ri Jehová, roj ri ojk'o chuwech re ruwach'ulew; Kan q'ij-q'ij tiqatzijoj ri kolotajik ri nuya'.

²⁴ Kan tiqatzijoj ri ruk'ojlemal chike ch'aqa' chik ruwach'ulew; y tiqatzijoj k'a ri meyel taq rubanobal chike ri winaqi'.

²⁵ Roma ri Jehová kan k'o nim ruq'ij-ruk'ojlen, y kan xaxe rija' ruk'amon chi niqaya' ruq'ij. Rija' kan man junan ta k'a kik'in ch'aqa' chik dios, roma rija' kan k'o rukiy.

²⁶ Roma ri ki-dios ri ch'aqa' chik ruwach'ulew, xa e wachibel y man jun kejqalen: Jak'a ri Jehová kan ja rija' xbanon ri kaj.

²⁷ Kan janila niyik'lun ri akuchi k'o-wi rija'. Ri pa rachoch kan k'o-wi uchuq'a' y kikoten.

²⁸ Kan rik'in ri Jehová k'o-wi ri k'ojlen y kan rik'in rija' k'o-wi ri uchuq'a'. Roma ri' roj ri oj aj pa qachoch, kan tiqaya' k'a ruq'ij-ruk'ojlen ri Jehová.

²⁹ Kan ruk'amon richin niqanimirisaj ri nimalej rubi' ri Jehová. Kan tiqak'ama-pe sipanik chuwech; kan xtiqaxuk-xtiqamej-qi' chuwech ri loq'olej ruk'ojlemal rija'.

³⁰ Kan konojel k'a winaqi' xkebaybot chuwech ri Jehová. Jak'a ri ruwach'ulew man xtisilon ta roma kan jebel jikil.

³¹ Kan tikikot k'a ri kaj; chuqa' kan tikikot k'a ri ruwach'ulew. Kan xtiqatzijoj chike ri winaqi' richin chijun ruwach'ulew chi ri Jehová, ja rija' ri rey.

³² Kan tiwajin k'a ri palou y ronojel ri ek'o chupan; kan tikikot ri juyu' y ronojel ri tikil chuwech.

³³ Kan kebixan ri che' ri ek'o pa k'echelaj, Kan kebixan roma kikoten chuwech ri Jehová; roma rija' xtipe richin xtiq'aton-tzij pa ruwi' ri ruwach'ulew.

³⁴ Kan janila qojmatioxin chire ri Dios, roma rija' kan janila utz; roma ri rajowabal y ri rujoyowanik kan richin tibe-q'ij tibe-seq.

³⁵ Roma ri' tiqabij chire: ¡Qojakolo', Dios qakolonel roj! Kan tamolo' qachi'; Kan qojakolo' chikikojol ri winaqi' ri e richin ch'aqa' chik ruwach'ulew, richin keri' kan xtiqanimirisaj ri loq'olej abi', richin rik'in kikoten xtiqaya' aq'ij-ak'ojlen.

³⁶ ¡Tiqaya' ruq'ij ri Jehová, ri qa-Dios roj ri oj aj-Israel. Tiqaya' ruq'ij tibe-q'ij tibe-seq. Y konojel k'a ri winaqi' xkibij: Kan keri' wi xecha', y konojel k'a xkiya' ruq'ij ri Jehová.

³⁷ Chirij ri', ri David xuya' k'a kan ri Asaf y ri e rachibil richin yesamej q'ij-q'ij chupan ri rachoch ri Jehová ri akuchi k'o-wi rija'.

³⁸ Chuqa' xuya' kan ri Obed-edom y ri e wok'al waqxaqi' rachibil ri e beneq rik'in. Chuqa' rik'in jun chik Obed-edom, ruk'ajol ri Jedutún, y ri Hosá, xuya' kan richin nikichajij ri ruchi' ri jay.

³⁹ Y ri sacerdote Sadoc y ri e rachibil xeruya' kan richin yesamej chuwech ri rachoch ri Jehová ri banon rik'in tzieq, y re' xbanatej pa tinamit Gabaón ri k'o-el chuwi' taq juyu'.

⁴⁰ Y ri sacerdote ri' xkisuj k'a kamelabel chuwech ri Jehová pa ruwi' ri porobel; keri' nikiben ri nimaq'a', y keri' chuqa' nikiben ri tiqaq'ij, kan achi'el ri tz'ibatajineq kan chupan ri pixa' ri xuya' kan ri Jehová.

⁴¹ Y ri David chuqa' xuya' kan ri Hemán, ri Jedutún y ch'aqa' chik ri xecha'ox kan richin yebixan y nikiya' matioxinik chire ri Jehová, roma ri rajowabal y ri rujoyowanik kan richin tibe-q'ij tibe-seq.

⁴² Rije' nikixupuj trompeta, nikiq'ojomaj ri platillo y ri ch'aqa' chik kiwech q'ojom richin chi nikibixaj rubi' ri Dios. Ri e ruk'ajol ri Jedutún, jari' ri yechajin ri ruchi' ri rachoch ri Dios.

⁴³ Chirij ronojel re' konojel xetzolin k'a chi taq kachoch, y chuqa' ri David xtzolin chirachoch richin xerurtisaj ri aj pa rachoch.