1 Crón 14 - Kaqchiquel Bible

¹ K'o k'a jun rey rubini'an Hiram richin ri ruwach'ulew Tiro, ri rey ri' xuto' ri David richin xupaba-q'anej ri jay ri akuchi niq'aton-tzij. Xeruteq-el rik'in ri David, achi'a' ri k'o kiq'ij, aj-tz'aq y ajanela'. Chuqa' xkik'uala-el tiox-che' richin xkipaba' kan ri jay.

² Keri' toq xq'ax chuwech ri David chi kan ja ri Jehová xya'on kan rey pa ruwi' ri tinamit Israel, roma kan janila utz beneq ri ruq'atbal-tzij pa ruwi' ri ruwach'ulew.

³ Y ri David xk'ule' chik kik'in ch'aqa' chik ixoqi' chiri' pa Jerusalem, y xek'oje' chik ch'aqa' ralk'ual.

⁴ Jare' ri kibi' ri e ralk'ual ri David ri xek'oje' pa Jerusalem: Ri Samúa, ri Sobab, ri Natán, Ri Salomón,

⁵ ri Ibhar, ri Elisúa, ri Elpélet,

⁶ ri Nógah, ri Néfeg, ri Jafía,

⁷ ri Elisamá, ri Eliadá y ri Elifélet.

Ri David xeruch'ek ri aj-Filistea

⁸ Toq ri aj-Filistea xkak'axaj chi ri David xqasex aceite pa ruwi' richin xok kan rey pa ruwi' ri ruwach'ulew Israel, kan jari' xebe richin nibekikanoj. Jak'a ri David kan xaxe xrak'axaj chi nikanox, kan jari' xbe richin xeberuk'ulu' chi oyowal.

⁹ Xe'apon k'a ri aj-Filistea chuwa-taq'aj rubini'an Refaim y xkiben-qa kichin chire.

¹⁰ Y roma ri' ri David xuk'utuj chire ri Dios, y xubij: ¿Utz kami yinel-el chubanik oyowal kik'in ri aj-Filistea? ¿Kan xke'ajech kami pa nuq'a'?, xcha'. Y ri Jehová xubij chire chi tibe y kan xkerujech pa ruq'a'.

¹¹ Xejote' k'a el pa Baal-perasim, y chiri' xeruch'ek-wi kan. Roma ri' ri David xubij: Kan achi'el jun raqen-ya' toq nujeq-el rubey, kan keri' xuben ri Dios wik'in; kan xujeq nubey chikiwech ri e etzelanel wichin, xcha'. Y roma ri' xubini'aj kan ri chiri' Baal-perasim.*f7*

¹² Chirij ri' ri aj-Filistea xekimalij kan ri ruwachibel ri ki-dios rije' y ri David xuteq kiporoxik.

¹³ Jak'a ri aj-Filistea xkitaluj chik ki' pa Refaim.

¹⁴ Keri' k'a ri David xuk'ulubej chik jun bey ri Dios, y ri Dios xubij chire: Man ye'aq'ijuj ta chikiwech; xa tasutij-kij y xke'aq'ijuj toq xkatapon chikikojol ri che' bálsamo.

¹⁵ Toq rat xtawak'axaj chi achi'el k'o nibiyaj pa kitum ri che', jari' toq xke'achop chi oyowal, roma yin xtinben chi k'o niq'ajan, y xkinik'o-el chiwech richin kan chaq jun xtinya' chike, y xkenk'is ri aj-labal aj-Filistea, xcha' ri Dios chire ri David.

¹⁶ Y kan xuben k'a ri David achi'el rubin ri Dios chire; y kan xech'akatej k'a ri aj-labal aj-Filistea, nitiker-el pa tinamit Gabaón y napon k'a pa tinamit Guézer.

¹⁷ Ri xuben ri David kan xtalutej k'a rutzijol kik'in ri winaqi' richin chijun ruwach'ulew, y ri Jehová xuben k'a chire ri David chi kan k'o rukiy chikiwech chijun ruwach'ulew.