1 Crón 12 - Kaqchiquel Bible

Ri xjunamatej-kiwech rik'in ri David

¹ K'o k'a jun tzobaj achi'a' ri maneq xibinri'il chikiwech, ri kan e richin labal, xe'apon rik'in ri David pa tinamit Siclag, richin xjunamatej-kiwech rik'in, toq k'a rewan-ri' chuwech ri Saúl, ri ruk'ajol ri Cis.

² Re achi'a' re' kik'ualon rute-ch'ab y yetikir nikikusaj ri kajxokon y ri kijkiq'a' richin nikik'eq abej rik'in ikeq' y richin nikik'eq kokoj raqen ch'ab. Ri achi'a' ri' ri xe'apon rik'in ri David, e rach'alal kan ri Saúl, e benjamita. Jare' ri kibi':

³ Ri k'o más ruq'ij ja ri Ahiézer; chirij rija' ja ri Joás, ruk'ajol ri Semaá aj-Guibeá; ri Jeziel, ruk'ajol ri Azmávet; ri Pélet, ruk'ajol chuqa' ri Azmávet; ri Beracá aj-Anatot; ri Jehú chuqa' aj-Anatot;

⁴ ri Ismaías aj-Gabaón, jun chike ri e juwineq lajuj ri maneq xibinri'il chikiwech, y aj-raqen pa kiwi' ri tzobaj ri'; ri Jeremías; ri Jahaziel; ri Johanán; ri Jozabad aj-Guederá;

⁵ ri Eluzai; ri Jerimot; ri Bealías; ri Semarías; ri Sefatías, ri harufita;

⁶ ri Elcaná; ri Isías; ri Azarel; ri Joézer, coreíta; ri Jasobeam, chuqa' coreíta;

⁷ y ri Joelá, ruk'ajol ri Jeroham; y ri Zebadías, ruk'ajol chuqa' ri Jeroham aj-Guedor.

⁸ Chuqa' jujun chike ri e rijatzul ri Gad xkich'er-el-ki' rik'in ri Saúl, y xjunamatej-kiwech rik'in ri David, toq k'a rewan-ri' chupan ri tobel chiri' pa tz'iran ruwach'ulew. Rije' e aj-labal ri maneq xibinri'il chikiwech, kan e tijon jebel y kan kik'ualon k'a kokoj y nima'q taq kitobal. Rije' kan e achi'el koj yewachin, y kan janila ye'anin achi'el ri masat ri pa taq k'echelaj.

⁹ Ja kibi' re' pa rucholajen: Ri Éser; ri Abdías; ri Eliab;

¹⁰ ri Mismaná; ri Jeremías;

¹¹ ri Atai; ri Eliel;

¹² ri Johanán; ri Elzabad;

¹³ ri jun chik Jeremías; y ri Macbanai.

¹⁴ Konojel rije' e rijatzul kan ri Gad; kan konojel e aj-raqen pa kiwi' ri aj-labal. Ri más juba' ok ri yeruchajij ja ri e wok'al achi'a', y ri más e k'iy ri yeruchajij ja ri e 1,000 achi'a'.

¹⁵ Konojel rije' xkiq'axaj-el ri raqen-ya' Jordán chupan ri nabey ik' chire ri juna', toq ri raqen-ya' janila nimirineq. Y xekoqotaj-el ri winaqi' ri ek'o chiri' chuwa-taq'aj ri ek'o pa relebel-q'ij y ri ek'o pa qajbel-q'ij chire ri raqen-ya' Jordán.

¹⁶ Ek'o achi'a' chike ri e rijatzul kan ri Benjamín y e jujun chike ri tzobaj richin kan ri Judá, y xebek'oje' rik'in ri David akuchi rewan-wi-ri' chupan ri tobel.

¹⁷ Y ri David xpe richin xeberuk'ulu-el, y xubij chike: Wi rix ix peteneq rik'in utzilej iwánima y richin yinito-el; xkixink'ul k'a rik'in ronojel wánima y xkixk'oje' wik'in. Jak'a wi xa ix peteneq richin chi yiniq'ol y yinijech-el pa kiq'a' ri etzelanel wichin, stape' xa man jun itzel nubanon chiwech; kan ja ta ri qa-Dios y ri ki-Dios ri qati't-qamama' xkixtz'eton y kan ta xtuya' ruk'ayewal pan iwi', xcha' ri David.

¹⁸ Y k'o k'a jun achin rubini'an Amasai, aj-raqen pa kiwi' jun tzobaj achi'a' ri k'o janila kuchuq'a'. Y ri Espíritu richin ri Dios xqaqa-pe pa ruwi' rija' richin xubij chire ri David: Ojk'o awik'in David; Ojk'o awik'in, ruk'ajol ri Isaí; Man oj peteneq ta richin niqaben oyowal awik'in; Y man oj peteneq ta richin niqaben oyowal kik'in ri yeto'on awichin; Roma ri qa-Dios kan at ruto'on, xcha' ri Amasai. Y ri David xeruk'ul k'a chi utzil, y xeruya' aj-raqen pa kiwi' ri aj-labal.

¹⁹ Chuqa' jun ka'i-oxi' chike ri e rijatzul kan ri Manasés xkich'er-ki' rik'in ri Saúl, y xjunamatej-kiwech rik'in ri David. Re' xbanatej toq ri David k'o pa kiruwach'ulew ri aj-Filistea y kan xe'el k'a el junan richin nibekibana' oyowal rik'in ri Saúl. Jak'a ri aj-raqen kichin ri aj-Filistea xa man xkajo' ta richin xeto'ox, y xkiteq-el ri David y xkibij-qa chikiwech: Rija' xa xtuto' ri Saúl ri rajaw, y xqojrujech pa ruq'a', xecha-qa.

²⁰ Ri e rijatzul kan ri Manasés ri xetzeqeliben-el ri David chiri' pa tinamit Siclag, jare' ri kibi': Ri Adná, ri Jozabad, ri Jediael, ri Micael, ri jun chik Jozabad, ri Elihú y ri Siletai. Y rije' e aj-raqen pa kiwi' jujun tzobaj ri ek'o e 1,000 aj-labal chupan.

²¹ Ja rije' ri xeto'on ri David, roma rije' kan e aj-labal y maneq xibinri'il chikiwech. Y roma ri' xe'ok k'a kan aj-raqen pa kiwi' ri aj-labal.

²² Q'ij, q'ij ye'apon k'a más achi'a' rik'in ri David, k'a toq xek'iyer ri aj-labal, y xkiben jun nimalej tzobaj achi'el kajlabal ri ch'umila'.

Ri aj-labal ri xe'apon pan Hebrón

²³ Kan janila k'a e k'iy aj-labal xjunamatej-kiwech rik'in ri David pa tinamit Hebrón, richin xkijech ri q'atbel-tzij pa ruq'a' ri David, roma xa xken ri Saúl; y ronojel re' xbanatej achi'el ri rubin ri Jehová chire ri David.

²⁴ Chupan ri tzobaj richin kan ri Judá, xe'apon e 6,800 aj-labal rik'in ri kitobal, y ri kikum.

²⁵ Chupan ri tzobaj richin kan ri Simeón xe'apon e 7,100 aj-labal ri maneq xibinri'il chikiwech, y kik'ualon k'a ronojel ruwech kamisabel ri nik'atzin pan oyowal.

²⁶ Chupan ri tzobaj richin kan ri Leví, xe'apon e 4,600.

²⁷ Chuqa' xe'apon e 3,700 richin ri e rijatzul kan ri Aarón, ri uk'uey kibey roma ri Joiadá, ri aj-raqen pa kiwi'.

²⁸ Chuqa' xapon ri Sadoc jun aj-raqen pa kiwi' ri aj-labal. Rija' man jani k'o k'iy rujuna', y maneq xibinri'il chuwech. Y rija' e rachibilan e juwineq ka'i' aj-raqen ri ek'o pa ruwi' ri tzobaj.

²⁹ Chupan ri tzobaj ri Benjamín, ri junan kijatzul rik'in ri Saúl, xe'apon e 3,000 achi'a'. E k'iy chike rije' kan xkiben achi'el ri nibix chike roma ri Saúl toq k'a k'es na.

³⁰ Chupan ri tzobaj richin kan ri Efraín xe'apon e 20,800 aj-labal ri maneq xibinri'il chikiwech; y rije' kan janila eleneq kitzijol chi kan e jebel chupan ri kitzobaj.

³¹ Chupan ri nik'aj tzobaj richin kan ri Manasés xe'apon e 18,000 achi'a' ri xecha'ox-el richin xbekich'okoba' kan rey ri David.

³² Chupan ri tzobaj richin kan ri Isacar xe'apon e 200 achi'a' ri janila ketamabal richin nikibij chire ri tinamit Israel ri k'o chi nuben y jampe' utz nuben. Y rije' e kachibilan ri aj-labal richin ri kitzobaj.

³³ Chupan ri tzobaj richin kan ri Zabulón xe'apon e 50,000 aj-labal; kik'uan-el jalajoj ruwech kamisabel, y kan e beneq rik'in ronojel kánima richin nibekito' ri David.

³⁴ Chupan ri tzobaj richin kan ri Neftalí xe'apon 1,000 aj-raqen, e kachibilan-el e 37,000 achi'a' ri kik'ualon ri kikamisabal ri kikum y ri kitobal.

³⁵ Chupan ri tzobaj richin kan ri Dan xe'apon e 28,600 aj-labal.

³⁶ Chupan ri tzobaj richin kan ri Aser xe'apon e 40,000 aj-labal.

³⁷ Y pa relebel-q'ij chire ri raqen-ya' Jordán xe'apon e 120,000 aj-labal, ri e eleneq-pe pa tzobaj richin kan ri Rubén, ri Gad y ri nik'aj chire ri Manasés; konojel rije' kik'ualon jalajoj ruwech kikamisabal.

³⁸ Konojel re achi'a' re' kan e richin labal, y xe'apon k'a pan Hebrón richin xkich'okoba' kan ri David richin xok kan rey pa ruwi' chijun ruwach'ulew Israel. Y konojel ri ch'aqa' chik winaqi' israelita kan rik'in ronojel kánima xjunamatej-kiwech rik'in ri David.

³⁹ Y ri aj-labal oxi' k'a q'ij xenimaq'ijun rik'in ri David y kan xewa-xe'uk'ya' chiri' roma ri ek'o chiri' kan kichojmirisan chik apo ronojel ri k'atzinel.

⁴⁰ Chuqa' ri yepe nej chire ri ruwach'ulew Isacar, ri Zabulón y ri Neftalí xkik'en-pe ri k'o chi nitij, chikij bur, camello, kowilej taq kiej y bóyix. Y ri kik'amon-pe ja ri k'ej, wíkix ri banon pa kab, uva ri chaqirisan, vino, aceite y kokoj y nima'q taq awej. Xkik'en-pe ronojel re' pa ruk'iyal roma janila kikoten k'o chiri' pan Israel.