1 Corintios 5 - Kaqchiquel Bible

Ri ruk'amon chi niban rik'in jun ri xmakun

¹ Kan xetamex k'a ri mak ri banatajineq chi'ikojol rix, ¡roma k'o jun qach'alal ri xkik'en-qa-ki' rik'in ri ruyijte' ri pa jay! re banobel re', ni ri winaqi' ri man ketaman ta ruwech ri Dios man jun bey nikiben.

² Man rik'in ri' rix kan janila inimirisan-iwi'. Pa ruk'exel ri' kan ruk'amon ta chi yixbison y yixoq' ta roma ri rubanon ri qach'alal ri'; y niwelesaj ta el chi'ikojol.

³ Stape' yin man ink'o ta apo iwik'in chiri', jak'a ri nu-espíritu kan k'o apo iwik'in. Y xinch'ob yan ri achike niqaben rik'in ri qach'alal ri xbanon keri'.

⁴ Y toq xtimol-iwi', ri nu-espíritu kan xtik'oje' iwik'in, y keri' chuqa' ri uchuq'a' richin ri ajaw Jesús xtik'oje' iwik'in.

⁵ K'ari' pa rubi' k'a ri ajaw Jesús, ri achin ri xbanon keri', xtijach-el pa ruq'a' ri Satanás richin chi kan xtutej poqon y ri ru-espíritu xtikolotej toq xtipe ri ajaw Jesús.

⁶ Kan man jun achike roma ninimirisaj-iwi'. ¿Man iwetaman ta k'a chi ri ch'amilej-q'or, ri xa rik'in ti juba' niqaqa chupan ri k'ej muban, kan nuben chi nisipoj ronojel?

⁷ Keri', tiwelesaj k'a el chi'ikojol ri mak, achi'el nelesex-el ri ch'amilej-q'or ri nich'amirisan ri kaxlan-wey; richin chi yixok achi'el ri kaxlan-wey ri banon rik'in k'ak'a' k'ej. Rix, kan qitzij, maneq imak chuwech ri Dios, achi'el toq maneq ch'amilej-q'or rik'in ri kaxlan-wey ri nitij chupan ri q'ij richin Solbelri'il. Roma ri Cristo jari' ri achi'el karne'l ri xkamisex pa qak'exel roj, chupan ri nimaq'ij ri'.

⁸ Keri' roj tiqanimaq'ijuj k'a ri q'ij richin ri qasolbelri'il chire ri mak, y ri' ja ri rukamik ri Cristo. Qojok k'a achi'el ri kaxlan-wey ri maneq ch'amilej-q'or rik'in, nel chi tzij chi qojch'on qitzij y tz'aqet ta ri qak'aslen.

⁹ Chupan ri wuj ri nutaqon iwik'in pa nabey, nubin-el chiwe chi man ke'iwachibilaj ri achi'a' y ri ixoqi' ri nikikanola-ki' richin yemakun.

¹⁰ Y toq yin xinbij keri', kan chikij qach'alal xich'on-wi. Y man xich'on ta chikij winaqi' ri man kikuquban ta kik'u'x rik'in ri Cristo, ri xa e achi'a' y ixoqi' ri nikikanola-ki' richin yemakun, o ri kan k'a nikajo' na chi ronojel kik'in ta rije' k'o-wi, o ri eleq'oma', o ri nikiya' kiq'ij ch'aqa' chik dios. Roma richin chi niqach'er ta el qi' roj kik'in rije', k'o chi yojel-el chuwech re ruwach'ulew.

¹¹ Ri xinwajo' xinbij chiwe chupan ri wuj ri', ja ri man tiwachibilaj jun achin o jun ixoq ri xa nikikanola-ki' richin yemakun, stape' nikibij chi kan e qach'alal. Y keri' chuqa' ri ye'ajowan chi ronojel kik'in ta rije' k'o-wi, ri k'a nikiya' na kiq'ij ch'aqa' chik dios, ri yeyoq'on, ri yeq'aber, y ri ye'eleq'. Re winaqi' re', ni man ruk'amon ta richin yixwa' kik'in.

¹² Jak'a pa kiwi' ri winaqi' ri man kikuquban ta kik'u'x rik'in ri Cristo, man pa nuq'a' ta yin k'o-wi richin chi ninq'et-tzij pa kiwi'. Xa jak'a ri molaj qach'alal ri nik'atzin chi yeqatz'et.

¹³ Ri winaqi' ri man kikuquban ta kik'u'x rik'in ri Cristo, ja ri Dios ri niq'aton-tzij pa kiwi'. Jak'a ri qach'alal ri k'o chi'ikojol y najin chubanik ri etzelal, nik'atzin chi tiwelesaj-el chi'ikojol.