1 Corintios 16 - Kaqchiquel Bible

Ri to'onik ri nimol-el kichin ri qach'alal ri ek'o pa Jerusalem

¹ Y wakami ninwajo' yich'on juba' chirij ri méro ri najin rumolik kichin ri qach'alal ri ek'o pa Jerusalem. Kan tibana' k'a achi'el ri nubin chike ri molaj qach'alal ri ek'o chupan ri ruwach'ulew Galacia.

² Jare' ri ruchojmilal: Ri nabey q'ij chire ri wuqu' q'ij k'atzinel chi rix nich'er kan juba' chire ri nich'ek, richin niya-el chike ri qach'alal. Keri' tibana' richin chi k'o chik ronojel toq xkinapon yin, y man nik'atzin ta chik chi k'ari' nimol.

³ Y toq xkinapon iwik'in, ja rix ri xkixbin ri achike qach'alal ri xke'uk'uan ri to'onik. Yin xtinben k'a el ri kiwuj ri qach'alal ri', richin nikijech chike ri aj-Jerusalem. Y k'ari' xkenteq-el.

⁴ Y wi kan nik'atzin chi yenwachibilaj-el, kan yibe k'a ri'.

Ri Pablo nrajo' nibe pa Corinto

⁵ Jak'a nabey ninwajo' yiq'ax na pa ruwach'ulew Macedonia, y k'ari' xkinapon iwik'in rix.

⁶ Nuch'obon chi toq xkinapon iwik'in, ninwajo' yiyaloj-el juba'. O rik'in juba' kan xtink'owisaj chuqa' el ri ruq'ijul job chiri', richin chi rix yinito' ta el rik'in ri nik'atzin chuwe chupan ri nubey ri akuchi chik xkibe-wi.

⁷ Man ninwajo' ta chi xaxe ta jun o ka'i' q'ij ri yik'oje' iwik'in. Kan ninwajo' k'a yiyaloj juba' iwik'in, wi keri' ri rurayibel ri ajaw.

⁸ Y wakami k'a yik'oje' na re wawe' pan Éfeso k'a toq xtiq'ax na kan ri qanimaq'ij Pentecostés, y k'ari' xkibe iwik'in.

⁹ Yik'oje' na re wawe' roma ri Dios ruya'on janila nusamaj ri kan janila rejqalen, stape' e k'iy ri ye'etzelan wichin.

¹⁰ Y wi ri Timoteo napon ta chila' iwik'in, kan tik'ulu' k'a chi utzil. Rija' kan rusamaj-wi ri ajaw nuben, achi'el yin.

¹¹ Man ta xtiben chire chi man jun ruq'ij. Y toq xtel-pe chila' iwik'in, xtiya' ta pe ri nik'atzin chire richin ri rubey richin chi yinorutz'eta' kan, roma woyoben e rachibilan ri ch'aqa' chik qach'alal.

¹² Jak'a ri qach'alal Apolos, janila xintej nuq'ij chirij chi xapon ta iwik'in y xerachibilaj ta el ri ch'aqa' chik qach'alal, jak'a wakami man xrajo' ta. Man rik'in ri', k'a toq xtijame' juba' ruwech, k'ari' xtapon iwik'in.

Ri ruk'isibel taq ch'abel

¹³ Wach'alal, tichajij k'a ri ik'aslen y chuqa' kan ta kuqul ik'u'x rik'in ri Dios. Man titzolij-iwi' chiwij, xa tik'oje' iwuchuq'a' y kow kixk'oje'.

¹⁴ Y ronojel ri niben, kan rik'in ajowabel tibana'.

¹⁵ Wach'alal, rix iwetaman ruwech ri qach'alal Estéfanas y ri e aj pa rachoch, y chi rije' jari' ri nabey ri xeniman ri Cristo chiri' pa ruwach'ulew Acaya. Rije' kan rik'in ronojel kánima yekito' ri ch'aqa' chik qach'alal.

¹⁶ Y nink'utuj k'a utzil chiwe chi tinimaj kitzij rije', y chuqa' chi tinimaj kitzij konojel ri e achi'el rije', ri yeto'on y nikiben ri rusamaj ri Dios.

¹⁷ Yin yalan yikikot chi xe'oqaqa wik'in ri Estéfanas, ri Fortunato y ri Acaico. Rije' xkiya' chuwe ri man xixtikir ta xiya' rix chuwe,

¹⁸ roma rije' kan xkik'en-pe uxlanen chire ri wánima, achi'el kibanon iwik'in rix. Ri qach'alal ri e achi'el rije' kan ruk'amon k'a chi ninimex kitzij.

¹⁹ Ri molaj qach'alal ri ek'o re pa ruwach'ulew Asia nikiteq-el rutzil-iwech. Chuqa' nikiteq-el rutzil-kiwech ri qach'alal Áquila y Prisca y chuqa' ri molaj qach'alal ri nikimol-ki' pa kachoch rije'.

²⁰ Konojel k'a ri qach'alal ri ek'o wawe' nikiteq-el rutzil-iwech. Tiq'ejela-iwi' chi'ijujunal rik'in jun ajowabel, y rik'in jun loq'olej tz'ubanik.

²¹ Yin Pablo nintz'ibaj k'a el re rutzil-iwech rik'in re nuq'a'.

²² Y wi k'o jun ri man najowan ta richin ri ajaw Jesucristo, tiqaqa k'a itzel oyonik pa ruwi'. ¡Kan katanpe k'a, ajaw!

²³ Ri rutzil ri ajaw Jesucristo xtik'oje' ta k'a iwik'in chi'iwonojel.

²⁴ Kan tik'ulu' k'a ri wajowabal chi'iwonojel rix ri ix richin chik ri Cristo Jesús. Kan keri' ta k'a.