1 Corintios 15 - Kaqchiquel Bible

Ri Cristo kan qitzij chi xk'astej

¹ Wach'alal, pa nabey, toq xik'oje' chi'ikojol, xintzijoj chiwe ri utzilej ch'abel richin kolotajik. Y rix kan xik'ul-wi ri ch'abel ri xintzijoj chiwe, y kan xkuqer-wi ik'u'x rik'in.

² Y roma ri' xixkolotej. Jak'a nik'atzin chi rix man niya' ta kan, wi kan qitzij chi xinimaj, y wi man keri' ta, ri ikuqubabel-k'u'x man ta k'o rejqalen.

³ Ri ch'abel ri xink'ul yin, ri kan janila rejqalen, kan ja chuqa' ch'abel ri' ri xintzijoj chiwe rix; chi ri Cristo xken roma ri qamak, kan achi'el ri tz'ibatajineq kan chupan ri ruch'abel ri Dios.

⁴ Y chirij ri' xmuq. Jak'a pa rox q'ij xk'astej, kan achi'el ri tz'ibatajineq kan chupan ri ruch'abel ri Dios.

⁵ Y chirij ri' xuk'ut-ri' chuwech ri Pedro, y k'ari' chikiwech chi kablajuj ri e taqon roma rija'.

⁶ Chirij ri', xuk'ut-ri' chikiwech más e 500 qach'alal, toq kimolon-ki'. E k'iy k'a chike rije' ri k'a e k'es na y ek'o chiqakojol. Jak'a ek'o ri xa xeken yan el.

⁷ Y chirij chik ri', xuk'ut-ri' chuwech ri Santiago, y k'ari' xuk'ut chik ri' chikiwech konojel ri e taqon roma ri Cristo.

⁸ Jak'a chinuwech yin xuk'ut-ri' k'a pa ruk'isibel, stape' man pa ruq'ijul ta chik, achi'el jun ak'ual ri man pa ruq'ijul ta richin nalex.

⁹ Roma ja yin ri man jun ok wejqalen chikikojol ri ch'aqa' chik ri e taqon roma ri Cristo. Yin kan ninna-wi k'a chi xa man ruk'amon ta chi yin in jun chike rije', roma janila k'a k'iy etzelal xinben chike ri molaj qach'alal.

¹⁰ Jak'a ri Dios xuya' ri rutzil chuwe, y ri' xuben chuwe chi xjalatej ri nuk'aslen. Yin más yan chik k'a in samajineq-pe ke chikiwech ri ch'aqa' chik ri e taqon roma ri Cristo. Jak'a man ninbij ta chi ja yin xibanon ri samaj, man keri' ta; xa kan ja ri rutzil ri Dios ri xbanon.

¹¹ Roma wi ja ri ch'aqa' chik ri e taqon roma ri Cristo o wi ja yin ri yojtzijon ri ruch'abel ri Dios, ri' man jun rubanon, y ri ch'abel ri' jari' ri xinimaj rix.

Ri kaminaqi' kan xkek'astej-wi

¹² Y wi ri ruch'abel ri Dios ri niqatzijoj nubij chi ri Cristo xk'astej-el chikikojol ri kaminaqi', ¿achike k'a roma ek'o qach'alal chi'ikojol ri yebin chi ri kaminaqi' man yek'astej ta el?

¹³ Wi ta maneq k'astajibel, chuqa' ri Cristo xa man xk'astej ta ajk'ari'.

¹⁴ Y wi xa man xk'astej ta ri Cristo, kan man jun k'a nik'atzin-wi ri niqatzijoj, y man jun chuqa' nik'atzin-wi ri ikuqubabel-k'u'x.

¹⁵ Y rik'in ri' kan niq'alajin ta chi roj xa man qitzij ta ri xqabij chirij ri Dios, chi rija' xuk'asoj ri Cristo. Y wi ta qitzij chi maneq k'astajibel kichin ri kaminaqi', ri Cristo man ta chuqa' xk'astej.

¹⁶ Roma wi ri kaminaqi' kan man xkek'astej ta, ri Cristo xa kan man xk'astej ta ajk'ari'.

¹⁷ Y wi ri Cristo man ta xk'astej, xa man jun ta nik'atzin-wi chi rix ikuquban ik'u'x rik'in, y xa k'a ixk'o ta na chupan ri imak.

¹⁸ Y wi ta keri', ri kaminaqi' ri xkikuquba-el kik'u'x rik'in ri Cristo, xa man xekolotej ta el.

¹⁹ Y wi ri oyobenri'il rik'in ri Cristo xaxe ta richin ri k'aslen chuwech re ruwach'ulew, kan ruk'amon ta chi más nijoyowex qawech roj ke chikiwech konojel ri winaqi'.

²⁰ Jak'a ri Cristo kan xk'astej-wi-el. Ja rija' ri nabey ri xk'astej-el chikikojol ri ch'aqa' chik kaminaqi' ri xkek'astej-el.

²¹ Qetaman k'a chi xa roma jun wineq qonojel xqaqa ri kamik pa qawi'. Y chuqa' xa roma jun chik wineq toq xkek'astej-el ri kaminaqi'.

²² Rik'in k'a ri Adán xqichinaj-wi ri kamik qonojel. Y roma ri Cristo xqojk'astej chik el qonojel.

²³ Jak'a kan pa ruchojmilal xtibanatej ronojel re'. Ri Cristo nabey xk'astej-el. Y toq xtipe chik jun bey, roj ri oj richin chik rija' xqojk'astej-el chuqa'.

²⁴ Y k'ari' k'a xtapon ri ruk'isibel q'ij, toq ri Cristo xtich'akon chikij ri q'atbel taq tzij, y ri k'o uchuq'a' pa kiq'a'. Y toq ch'akowineq chik chikij konojel, xtuya' ri ruq'atbel-tzij chire ri Dios ri Qatata'.

²⁵ Nik'atzin chi ja ri Cristo niq'aton-tzij k'a toq xech'akatej yan konojel ri ye'etzelan richin, y xtuben chike chi xkeqaqa pa ruq'a'.

²⁶ Y ri ruk'isibel ri xtich'akatej, ja ri kamik.

²⁷ Ri ruch'abel ri Dios*f15* nubij chi ronojel xok pa ruq'a' ri Cristo. Jak'a toq nubij ri ch'abel ronojel, man nel ta chi tzij chi ri Tata'ixel chuqa' xuya-ri' pa ruq'a'.

²⁸ Toq ronojel xtok pa ruq'a' ri Cristo ri K'ajolaxel, jari' toq ri Cristo xtujech chuqa' ri' pa ruq'a' ri Tata'ixel, ri xya'on ronojel pa ruq'a' rija'. Y k'ari' ri Dios xtik'oje' pa ruwi' ronojel.

²⁹ Wi maneq ta k'astajibel, ¿achike k'a nikajo' nikil ri winaqi' ri niqasex-ya' pa kiwi' koma ri kaminaqi'? Wi man ta yek'astej ri kaminaqi', ¿achike roma toq niqasex-ya' pa kiwi' koma ri kaminaqi'?

³⁰ Y wi maneq ta k'astajibel, ¿k'o ta kami nik'atzin-wi chi roj jataqil yojapon chuwech ri kamik?

³¹ Y jubama q'ij-q'ij niqil qakamik, y re' kan jare' ri qitzij. Re' junan rik'in ninbij chi kan jebel ninna' iwoma rix, chi xinimaj ri qajaw Jesucristo.

³² Wi maneq ta k'astajibel, ronojel ri yenk'uluwachila' man jun ta rejqalen, achi'el ri xink'uluwachij pan Éfeso, toq ri winaqi' kan xeyakatej chuwij achi'el k'uxunela' taq chikopi'. Xa más ta utz niqaben achi'el ri tz'ibatel kan:*f16* Xaxe qojwa' y qojuk'ya', roma xa chua'q-kabij xqojken-el, nicha'.

³³ Man k'a kixq'olotej, roma rix iwetaman chi wi yixok kachibil ri man utz ta ri kich'obonik, xa kan xtiyojtej chuqa' ich'obonik rix.

³⁴ Titzolin-pe ik'u'x, y man chik kixmakun. Rix kan ruk'amon k'a chi yixk'ix-qa, roma chi'ikojol k'a ek'o ri man ketaman ta ruwech ri Dios.

Ri kibanik ri xkek'astej-el

³⁵ Y rik'in juba' ek'o ri yebin: ¿Achike rubanik toq xkek'astej-el ri kaminaqi'? ¿Achike kami nitzu'un ri kich'akul?, yecha'.

³⁶ Ri nich'obo keri' xa jun wineq nakanik. Roma jun ija'tz toq k'o chik kan pan ulew, k'o chi niq'ey-qa, y k'ari' toq nibek'ulun-pe ri tiko'n.

³⁷ Toq nitik-qa ri trigo, man ja ta ri q'ayis ri nitik-qa, xa ja ri rija'tz ri trigo.

³⁸ Ja ri Dios ri nibanon chi achi'el ri ija'tz ri nitik-qa, keri' ri rubanik ri nel-pe.

³⁹ Y keri' chuqa' k'iy ruwech ch'akulaj ek'o. Jak'a ri qach'akul roj jun wi chik rubanik, ri kich'akul ri chikopi' jun wi chik, ri kich'akul ri aj-xik' taq chikopi' jun wi chik y ri ker jun wi chik kich'akul.

⁴⁰ Y keri' chuqa' roj ri ojk'o wawe' chuwech re ruwach'ulew, man junan ta qabanik kik'in ri ek'o chuwech ri kaj. Ri jebelej qabanik roj man junan ta rik'in ri jebelej kibanik ri ek'o chuwech ri kaj.

⁴¹ Ri q'ij kan k'o jun rubanik ri kan jebel ok nitzu'un, ri ik' chuqa', y ri ch'umila' jun wi chik kibanik. Y keri' chikikojol chuqa' ri ch'umila', man junan ta ri jebelej taq kibanik.

⁴² Y keri' k'a ri ch'akulaj ri xtikik'uaj ri kaminaqi' toq xkek'astej-el; nimuq jun ch'akulaj ri xa niq'ey, jak'a xtel-pe jun ch'akulaj ri man k'isel ta.

⁴³ Ri ch'akulaj ri nimuq, man kan ta utz, jak'a ri ch'akulaj ri xtik'astej-el, kan jebel wi. Ri ch'akulaj ri nimuq, maneq ruchuq'a', jak'a ri ch'akulaj ri xtik'astej-el, janila ruchuq'a'.

⁴⁴ Ri ch'akulaj ri nimuq xa richin re ruwach'ulew, jak'a ri ch'akulaj ri nik'astej-el richin chila' chikaj. Roma ri' k'o k'a jun ch'akulaj richin re ruwach'ulew, y k'o jun richin chik chila' chikaj.

⁴⁵ Keri' niq'alajin chupan ri ruch'abel ri Dios,*f17* chi ri nabey Adán xban y xuk'ul ruk'aslen. Jak'a ri Cristo, ri jun chik Adán, kan aj-chikajil-wi, y kan nuya' k'aslen.

⁴⁶ Nabey k'a nik'oje' ri qach'akul richin re ruwach'ulew, k'ari' nik'oje' ri qach'akul richin chila' chikaj.

⁴⁷ Ri nabey achin, kan richin wi re ruwach'ulew, roma rik'in ulew xban-wi. Jak'a ri jun chik, kan aj-chikajil.

⁴⁸ Roj ri k'a ojk'o na wawe' chuwech re ruwach'ulew, oj junan rik'in ri nabey wineq ri xban rik'in ulew. Jak'a ri ek'o chik chila' chikaj, kan e achi'el chik k'a ri jun ri kan aj-chikajil.

⁴⁹ Wakami roj xa k'a junan na rubanik qach'akul rik'in ri nabey wineq ri xban rik'in ulew, keri' chuqa' xtapon ri q'ij toq xqojok achi'el ri Cristo ri aj-chikajil.

⁵⁰ Ninwajo' k'a chi rix niwetamaj chi ri qach'akul ri qak'uan wakami man xtibek'oje' ta rik'in ri Dios chila' chikaj, roma ri qach'akul xa k'isel, y maneq ruq'a' chire ri rajawaren ri Dios ri man k'isel ta.

⁵¹ Jak'a wakami ninwajo' ninq'alajirisaj chiwe chi man qonojel ta k'a xqojq'ax chupan ri kamik, jak'a qonojel xtijalatej-el ri qach'akul.

⁵² Xtibanatej k'a chi xa pa jun ti ramaj xqojjalatej-el, achi'el pa jun ruyupik runaq'-wachaj. Kan jak'a toq xtuya' rutzijol ri ruk'isibel trompeta, jari' xkek'astej-el ri kaminaqi' rik'in chik kich'akul ri man k'isel ta. Y roj ri k'a oj k'es kan, xqojjalatej-el chuqa'.

⁵³ Ri ch'akulaj ri xa niq'ey k'o chi nijalatej, rik'in jun ch'akulaj ri man k'isel ta. Y ri ch'akulaj ri xa kamel, nik'atzin chi nijalatej rik'in jun ch'akulaj ri man niken ta chik.

⁵⁴ Y jak'a toq ri qach'akul xtijalatej, y man xtiq'ey ta chik, y chuqa' man xtiken ta chik, jari' toq xtibanatej ri tz'ibatel kan chupan ri ruch'abel ri Dios, toq nubij:*f18* Ri kamik xch'akatej yan y man jun chik ruq'a' chiqe, nicha'.

⁵⁵ Y wakami, ¿akuchi k'a k'o-wi ri ach'akonik, rat kamik? ¿Akuchi k'o-wi ri ach'akonik rat jul muqubel kamineq?

⁵⁶ Ja ri mak ri nibanon chi ri kamik nich'akon chiqij. Y ri ruchuq'a' ri mak, ja ri pixa'.

⁵⁷ Jak'a matiox chire ri Dios chi xuteq-pe ri qajaw Jesucristo richin xch'akon chirij ronojel re' qoma roj.

⁵⁸ Y roma ri', wach'alal ri janila yixinwajo', ninbij k'a chiwe chi kan kow kixk'oje', y man tiya' kan. Kan beneq k'a ruwech tibana' ri rusamaj ri ajaw, y jebel tibana' chire, roma ronojel ri niben roma rija', kan k'o-wi utz ri nuk'en-pe chiwe.