1 Corintios 12 - Kaqchiquel Bible

Ri jalajoj ruwech sipanik ri nuya' ri Loq'olej Espíritu

¹ Wach'alal, wakami ninwajo' yich'on chik pa ruwi' ri jalajoj ruwech sipanik ri ruya'on ri Loq'olej Espíritu chiqe. Ninwajo' chi rix k'o ta iwetaman chirij ri'.

² Rix iwetaman ri achike rubanik ri k'aslen ri xik'uaj toq man jani iwetaman ruwech ri Dios. Rix utz k'a chiwe chi xixuk'uex richin chi xiya' kiq'ij wachibel, stape' ri wachibel ri' xa man jun xuben iwoma rix o xch'on ta pe chiwe.

³ Roma ri' ninwajo' k'a chi tiwetamaj chi jun wineq ri uk'uan roma ri ru-Espíritu ri Dios man nitikir ta nuyoq' ri Jesús. Y keri' chuqa' jun wineq ri man uk'uan ta roma ri Loq'olej Espíritu man nitikir ta nubij chi ri Jesús jari' ri ajaw.

⁴ Ri Espíritu nuya' jalajoj ruwech sipanik chiqe. Jak'a ri Espíritu xa jun,

⁵ k'o k'iy rubanik richin yojsamej, jak'a xaxe jun qajaw; y ri' ja ri Dios.

⁶ Jalajoj k'a ruwech ri yojtikir niqaben, jak'a xaxe jun ri niya'on quchuq'a' chiqajujunal; y ri' ja ri Dios.

⁷ Y re' nuya-pe ri Loq'olej Espíritu chiqe chiqajujunal, richin k'o utz nuk'en-pe chike ri ch'aqa' chik qach'alal.

⁸ Chike ch'aqa' qach'alal nuya' etamabel richin nikich'abalij ri ruch'abel ri Dios. Y chike ch'aqa' chik nuya' na'oj, richin nikisol rij ri nubij ri ruch'abel ri Dios.

⁹ Chike ch'aqa' nuben chi nim ri kikuqubabel-k'u'x rik'in ri Dios, y chike ch'aqa' nuben chi yetikir yekik'achojirisaj yawa'i'.

¹⁰ Ch'aqa' chik qach'alal banon chike chi yetikir nikiben meyel taq banobel. Ek'o ri ya'on chike chi nikiq'alajirisaj ri nibix chike roma ri Dios. Chike ch'aqa' ya'on q'ij chi nikitz'et ri nubij o nuben jun chik wineq, wi rik'in ri Dios peteneq-wi o xa rik'in jun itzel espíritu. Chike ch'aqa' ya'on chi yetikir yech'on pa ch'aqa' chik ch'abel. Y chike ch'aqa' ya'on chi yekiq'alajirisaj ri yekibij ri qach'alal pa ch'aqa' chik ch'abel.

¹¹ Ronojel re' rusamaj xaxe jun; y ri' ja ri Loq'olej Espíritu. Nuya' k'a re' chiqe chiqajujunal achi'el ri nrajo' rija'.

Xa jun k'a qabanon chiqach'alal-qi'

¹² Ri ruch'akul jun wineq k'iy k'a ri ruk'uan ri', jak'a xaxe jun rubanon. Y keri' chuqa' roj oj achi'el ri ruch'akul ri Cristo. Stape' oj k'iy xaxe jun qabanon.

¹³ Roma toq xqasex ya' pa qawi', xojok ruch'akul rija'. Chuqa' kan qonojel xok ri Loq'olej Espíritu pa taq qak'aslen. Jun k'a xuben chiqe. Keri' xqaben qonojel, chi judío y chi man judío ta; ri man e totajineq ta y ri e totajineq chik.

¹⁴ Ri qach'akul kan k'iy-wi ri ruk'uan ri', jak'a chikijujunal k'o ri yek'atzin-wi.

¹⁵ Nubij ta ri aqanaj: Yin xa man in q'abaj ta, y roma ri' xa man in richin ta ri ch'akulaj, nicha' ta. ¿Man kami richin ta ri ch'akulaj ri aqanaj, roma keri' ri nubij?

¹⁶ O nubij ta jun chike ri xikin: Yin xa man in wachaj ta, y roma ri' xa man in richin ta ri ch'akulaj, nicha' ta. ¿Man kami richin ta ri ch'akulaj ri xikin roma ri nubij keri'?

¹⁷ Wi ta ri ch'akulaj xa ruyon ta runaq'-wachaj, y maneq ta ruxikin, ¿achi'el ta k'a toq nak'ex? Y wi ta ri ch'akulaj xa ruyon ta xikin, y maneq ta rutza'n, ¿achi'el ta k'a toq niseqon?

¹⁸ Jak'a ri Dios xuya' ronojel chire ri qach'akul achi'el ri xrajo' rija'.

¹⁹ Wi ta ri ch'akulaj xa jun ta rubanik, xa man ta tz'aqet.

²⁰ Jak'a man keri' ta, roma ri qach'akul kan e ruk'uan-wi ronojel ri yek'atzin chire, y xa jun rubanon.

²¹ Roma ri' ri runaq'-qawech man nitikir ta nubij chire ri qaq'a' chi man nik'atzin ta. Y keri' chuqa' ri qajolon man nitikir ta nubij chire ri qaqen chi man nik'atzin ta.

²² Ri niqatz'et roj chi man kan ta yek'atzin chiqe, xa jari' ri más yek'atzin.

²³ Ri maneq kan ta rejqalen chiqawech roj, xa jari' ri más jebel yeqawiq. Y ri qach'akul ri man ruk'amon ta chi nikitz'et ri winaqi', jari' ri niqakuch jebel.

²⁴ Jak'a ri más e utz yetzu'un chire ri qach'akul, man nik'atzin ta chi niqakuch. Keri' chuqa' rix wach'alal, ri Dios kan xixrumol chi'iwonojel. Y ri qach'alal ri nitz'et rix chi man jun yek'atzin-wi chi'ikojol, rija' xuben chike chi kan k'o kejqalen.

²⁵ Rija' keri' xuben chiwe, richin chi maneq ta oyowalen y ch'arojri'il chi'ikojol; pa ruk'exel ri' xa nitola' ta iwi'.

²⁶ Roma ri' wi k'o jun ri niq'axo, yixq'axon chi'iwonojel; y wi k'o jun ri ninimirisex ruq'ij, yixkikot chi'iwonojel.

²⁷ Rix wach'alal aj-Corinto kan ix okineq chik ruch'akul ri Cristo; chi'ijujunal ix richin chik ri ch'akulaj ri'.

²⁸ Chi'ikojol rix molaj qach'alal, chiwe chi'ijujunal ruya'on jun sipanik. Pa nabey ek'o ri e taqon roma ri Cristo, pa ruka'n ja ri yeq'alajirisan ri ruch'abel ri Dios, pa rox ja ri yetijon. K'ari' ri yetikir nikiben meyel taq banobel, jujun chik ri yek'achojirisan kichin ri yawa'i', o ri yeto'on kichin ri ch'aqa' chik qach'alal, o ek'o ri e uk'uey bey, y pa ruk'isibel ri yetikir yech'on pa ch'aqa' chik ch'abel.

²⁹ Man rik'in ri' man chi'iwonojel ta ix taqon. Man chi'iwonojel ta yixq'alajirisan ri ruch'abel ri Dios. Man chi'iwonojel ta yixtijon. Man chi'iwonojel ta yixtikir niben meyel taq banobel.

³⁰ Man chi'iwonojel ta yixtikir ye'ik'achojirisaj yawa'i'. Man chi'iwonojel ta yixtikir yixch'on pa ch'aqa' chik ch'abel. Y man chi'iwonojel ta yixtikir niq'alajirisaj ri yekibij ri qach'alal toq yech'on pa ch'aqa' chik ch'abel.

³¹ Roma ri' kan ruk'amon k'a chi nirayij ri más rejqalen achi'el ri xinbij yan. Jak'a kan ninwajo' chuqa' nink'ut jun chik rubeyal chiwech ri más utz.