1 Corintios 11 - Kaqchiquel Bible

Ruchojmilal richin ruya'ik ruq'ij ri Dios

¹ Kan tibana' k'a achi'el ri ninben yin, roma yin kan ninben achi'el xuben ri Cristo.

² Wach'alal, kan utz wi k'a ri ibanon chi chupan ronojel ri ik'aslen kan ink'o-wi chi'ik'u'x. Rix kan niben-wi ri nubin kan chiwe; ik'ulun kan jebel ri tijonik ri xinya' chiwe yin.

³ Yin kan ninwajo' chi rix niwetamaj chi ri Dios ja rija' ri jolomaj pa ruwi' ri Cristo. Y ri Cristo jari' ri jolomaj pa kiwi' ri achi'a', y ri achi'a' ja rije' ri e jolomaj pa kiwi' ri kixjayilal.

⁴ Toq roj achi'a' yojch'on rik'in ri Dios, y toq niqabij ri ruq'alajirisan ri Dios chiqe, man k'a tiqakuch ri qajolon, richin chi man niqaqasaj ruq'ij ri k'o pa qawi' roj, y ri' kan ja ri Cristo.

⁵ Jak'a ri ixoqi', toq yech'on rik'in ri Dios y toq nikibij ri ruq'alajirisan ri Dios chike, tikikuchu' k'a kijolon rik'in jun tzieq. Roma wi man keri' ta, nikiqasaj ruq'ij ri jolomaj ri k'o pa kiwi' rije' y xa junan rik'in ri juk'un ta el ronojel ri rusumal-kiwi'.

⁶ Roma ri' wi man nikajo' ta nikikuch ri kijolon, más utz nikijuk'-el ri rusumal-kiwi'. Jak'a kan más ruk'amon chi tikikuchu' ri kijolon, richin chi man yek'ixbitej.

⁷ Ri achin man utz ta chi nukuch ri rujolon, roma kan ruwachibel ri Dios, y ruwaq'ijaj richin rija'. Y ri ixoq nuk'ut ri ruruwaq'ijaj ri rachijil.

⁸ Roma ri nabey achin, man rik'in ta jun ixoq xpe-wi, jak'a ri ixoq kan rik'in jun achin xpe-wi.

⁹ Keri' ri Dios kan xuben-wi k'a ri ixoqi' richin ri rachijil, y man xuben ta ri achin xaxe koma ri rixjayil.

¹⁰ Roma ri' ri ixoqi' ruk'amon chi nikikuch k'a ri kijolon, richin nikik'ut chi k'o uchuq'a' pa kiq'a' y koma chuqa' ri ángel.

¹¹ Jak'a chuwech ri Dios, ri achin xa maneq ta wi man ta k'o ri ixoq, ni ri ixoq maneq ta wi man ta k'o ri achin.

¹² Roma ri ixoq xban rik'in jun rubaqil ri achin, jak'a chuqa' ri achin rik'in jun ixoq nalex-wi, ronojel re' kan rik'in ri Dios peteneq-wi.

¹³ Tich'obo' k'a jebel. ¿Ruk'amon kami chi ri ixoq man nukuch ta rujolon toq nich'on rik'in ri Dios?

¹⁴ Roma kan q'alaj chi ri achin kan richin-wi chi man utz ta nuben chire chi nuya' q'ij chi nik'iy-qa ri rusumal-ruwi'.

¹⁵ Jak'a chire jun ixoq kan ruk'amon-wi chi nima'q raqen rusumal-ruwi'. Roma ri rusumal-ruwi' kan ya'on-wi k'a chire richin chi nukuch ri rujolon.

¹⁶ Y rik'in juba' ek'o qach'alal ri man junan ta qach'obonik kik'in, jak'a yin ninbij k'a chike rije' chi re tijonik re k'ari' xinya-el chiwe, kan ja wi yin y ri e wachibil ri yojbin y keri' chuqa' ri ch'aqa' chik molaj qach'alal.

Ri man pa ruchojmilal ta yebanatej

¹⁷ Ninwajo' ninbij chiwe wakami chi ri imolojri'il ri yixtajin chubanik, xa man utz ta. Pa ruk'exel chi k'o utz nuk'en-pe chiwe, xa ruyon itzel ri nibek'ulu-pe.

¹⁸ Ri nabey ri ninwajo' ninbij chiwe, ja ri ninwak'axaj chiwij chi toq rix nimol-iwi', xa man junan ta iwech, xa ich'aralon-iwi'. Y yin ninbij chi rik'in juba' qitzij ri nibix chuwe.

¹⁹ Jak'a chiwech rix kan nik'atzin chi keri' nibanatej, roma xaxe keri' yeq'alajin ri kan qitzij chi kiniman ri Cristo y man kiniman ta.

²⁰ Y toq rix nibij chi nimol-iwi' richin chi ninataj ri rukamik ri ajaw Jesucristo, kan niben-wi k'a ri nima-wa'in, jak'a xa man pa ruchojmilal ta niben chire.

²¹ Roma toq nimol-iwi' richin ri', ek'o qach'alal ri xa nikitej yan qa ronojel ri q'utun. Y keri', ek'o ri xa man jun nikitej kan. Chuqa' ek'o ri man jun tz'uj vino nikiqum kan, jak'a ri ch'aqa' yeq'aber-el chire.

²² ¿Kan maneq kami iwachoch richin chi chiri' ta yixwa-yixuk'ya-wi? ¿O chiwech rix xa kan man jun ok kiq'ij ri ch'aqa' chik qach'alal, ri nikimol-ki' junan iwik'in rix richin chi niya' ruq'ij ri Dios? ¿Y achike chuqa' roma toq kan ye'ik'ixbisaj ri qach'alal ri xa man jun ok k'o kik'in? ¿Kan niwajo' rix chi rik'in ri ibanobal ri', yin ninya' iq'ij? Kan man keri' ta k'a xtinben.

Ri rubanik richin nikinataj ri rukamik ri Cristo

²³ Jak'a ri ruchojmilal ri nuya'on chiwe yin, kan ja wi ri ajaw ri xya'on chuwe. Y ri ruchojmilal ri' nubij k'a chi ri ajaw Jesús, toq nijach yan el pa kiq'a' ri winaqi', chupan ri aq'a' ri' rija' xuchop jun kaxlan-wey.

²⁴ Y toq rija' rumatioxin chik chire ri Dios, xuper ri kaxlan-wey ri', y xubij chike ri rutijoxela': Tik'ama' y titija' re kaxlan-wey re', roma jare' ri nuch'akul ri kan xtijach pan ik'exel rix. Kan titija' k'a, richin natabel wichin, xcha' ri Jesús.

²⁵ Y toq xek'achoj yan chire ri wa'in, ri Jesús xuchop k'a chuqa' ri qumbel ri k'o vino chupan, y xubij: Re vino re', jare' ri nukik'el ri xtibiyin pan ik'exel rix. Rik'in re' nik'achoj ri k'ak'a' jikibel-tzij ri rajowan-pe ri Dios chi nuben iwik'in. Ronojel bey ri xtiqum, kan richin k'a natabel wichin yin, xcha' ri Jesús.

²⁶ Roma ri' toq roj niqamol-qi' richin niqatej ri kaxlan-wey y niqaqum chuqa' ri vino, kan ja wi k'a ri rukamik ri Cristo ri niqaq'alajirisaj k'a toq xtapon ri q'ij chi xtipe chik jun bey.

Ri natabel richin ri Cristo kan k'o chi nich'ob rij jebel

²⁷ Xabachike k'a chiwe ri nitijo ri kaxlan-wey y nuqum ri vino ri xa man richin ta nuya' ruq'ij-ruk'ojlen ri Cristo, kan nimakun chirij ri ruch'akul y ri rukik'el ri Cristo.

²⁸ Roma ri', tina-qa-iwi', y k'ari' titija' ri kaxlan-wey y tiqumu' ri vino.

²⁹ Roma wi xa man niq'ax ta chiwech ri rejqalen ri ruch'akul ri ajaw Jesucristo toq nitej ri kaxlan-wey y niqum ri vino, kan k'o k'a ri ruk'ayewal ri niqaqa pan iwi'.

³⁰ Y roma keri' niben, e k'iy chiwe rix ri maneq kuchuq'a', e yawa'i', y ek'o xeken yan el.

³¹ Jak'a wi ta rix nitz'et-qa ri ibanobal, ri Dios nuben chi man jun ta ruk'ayewal niqaqa pan iwi'.

³² Y wi ri Dios nuya-pe tijoj-poqonal pan iwi', kan richin k'a yixrutijoj, richin man ta niqaqa ri nimalej ruk'ayewal pan iwi', achi'el ri xtiqaqa pa kiwi' ri winaqi' ri k'a e richin na re ruwach'ulew.

³³ Roma ri' wach'alal, kan tiwoyobela' k'a iwi' toq yixwa-yixuk'ya' richin ninataj ri rukamik ri Cristo.

³⁴ Jak'a wi yalan yixnum, más utz chi kan ja ri pa taq iwachoch yixwa-wi-el, richin keri' man niqaqa ta ri ruk'ayewal pan iwi'. Y k'a k'o ch'aqa' chik tijonik ri k'o chi ninya' chiwe toq xkinapon iwik'in.