1 Corintios 10 - Kaqchiquel Bible

Man tiqaya' kiq'ij ch'aqa' chik dios

¹ Wach'alal, yin ninwajo' chi man timestaj chi ri qati't-qamama', xek'oje' chuxe' jun sutz' ri xuk'uan kibey. Y xeq'ax chupan ri Kaqa-Palou.

² Toq rije' xeyuqex roma ri sutz' y toq xeq'ax chupan ri ya', ja ri Moisés ri xkitzeqelibej. Roma ri' xa jun xkiben rik'in rija'.

³ Konojel rije' xkitej k'a ri wey ri xqaqa-pe chila' chikaj rik'in ri Dios.

⁴ chuqa' xkiqum ri ya' ri xuya-pe ri Dios chike. Ri ya' ri' xel-pe pa jun nimalej abej ri kan kachibilan. Y ri abej ri', nuk'exewachuj ri Cristo.

⁵ Man rik'in ri' rije' xa man xkiben ta ri niqa' chuwech ri Dios, y roma ri' ri kich'akul xepunupuxin kan pa tz'iran ruwach'ulew.

⁶ Roma ri' man tiqaben achi'el ri xkiben rije'. Roma rije' xa xkirayij ronojel ri man e utz ta.

⁷ Man k'a tiya' kiq'ij kiwachibel ch'aqa' chik dios, achi'el xkiben jujun chike ri qati't-qamama', achi'el tz'ibatel kan chupan ri ruch'abel ri Dios*f12* toq nubij chi ri winaqi' xetz'uye' richin xewa-xe'uk'ya', y konojel xeq'aber y xekibanala' itzel taq banobel.

⁸ Chuqa' man tiben chi ri achi'a' y ri ixoqi' nikikanola-ki' richin yemakun achi'el xkiben rije', y roma ri' pa jun q'ij xeken e 23,000 winaqi'.

⁹ Ek'o chuqa' chike rije' ri xkitejtobej ri Dios. Y roma ri' xeken pa kiq'a' kumatzi'. Roma ri' rix man k'a titejtobej ri Dios.

¹⁰ Ek'o ch'aqa' roma xexebeloj chirij, roma ri' ri Dios xuteq-pe jun ángel richin xerukamisaj. Roma ri' roj man k'a qojxebeloj chirij ri Dios.

¹¹ Ronojel k'a ri xkik'uluwachij rije', kan k'o-wi k'a nuk'ut chiqawech roj, y roma ri' e tz'ibatel kan richin chi roj re ojk'o chupan re ruk'isibel taq q'ij richin re ruwach'ulew niqak'en qana'oj chirij.

¹² Roma ri' wi k'o jun qach'alal ri kan nuch'ob chi kan jebel kuqul ruk'u'x, roma ri' man nitzaq ta, xa kan nik'atzin k'a chi tuchajij-ri' jebel richin chi man nitzaq.

¹³ Y toq k'o jun tejtobenik nipe pa qak'aslen, man tiqabij chi xaxe roj ri yojk'uluwachin keri', roma konojel keri' nikik'uluwachij. Jak'a ri Dios kan ruya'on rutzij chi kan yojruto-wi, y man nuya' ta q'ij chi nik'o ruwi' ralal ri tejtobenik ri'. Jak'a nuya' chiqe ri uchuq'a' chi yojtikir yojik'o chupan ronojel.

¹⁴ Roma ri' rix, wach'alal ri yalan yixinwajo', man tiya' kiq'ij ch'aqa' chik dios.

¹⁵ Yich'on keri' iwik'in roma wetaman chi kan ix nowineq, y roma ri' k'o chi nich'ob jebel rij ri ninbij chiwe.

¹⁶ Toq niqanataj ri rukamik ri Cristo rik'in ri vino, kan niqamatioxij k'a chire ri Dios chi rik'in ri vino ri' niqak'ut chi xa jun qabanon rik'in ri Cristo roma ri rukik'el. Y keri' chuqa' toq niqatej ri wech'on kaxlan-wey, kan niqak'ut k'a chi xa jun qabanon rik'in ri Cristo roma ri ruch'akul ri kan achi'el xwech' qoma roj.

¹⁷ Roma ri' roj, stape' janila oj k'iy, xaxe jun qabanon; kan achi'el ri jun kaxlan-wey ri qonojel niqatej.

¹⁸ Tich'obo' rij chuqa' ri nikiben ri qawinaq judío, toq rije' nikitej juba' chire ri ti'ij ri nikik'uaj-apo pa rachoch ri Dios. Y rik'in ri' nikik'ut chi rije' nikiya' ruq'ij ri Dios rik'in ri sipanik ri nikisuj ri sacerdote pa ruwi' ri porobel.

¹⁹ ¿Kan keri' kami chuqa' nibanatej kik'in ri wachibel? ¿Kan nich'ob rix chi jun wachibel k'o ruq'ij, y roma ri' ri ti'ij ri nisuj chuwech k'o rejqalen chiwech rix?

²⁰ Ri winaqi' ri nikisuj ri ti'ij ri', xa man chire ta ri Dios nikisuj-wi; xa chike ri itzel taq espíritu nikisuj-wi toq nikiya' chikiwech ri wachibel. Y yin man ninwajo' ta k'a chi niben keri', chi junan iwech niben kik'in ri itzel taq espíritu.

²¹ Rix kan niqum k'a ri vino richin ninataj ri rukamik ri Cristo. Y wi keri', man ruk'amon ta chi niqum chuqa' ri xa xsuj yan chike itzel taq espíritu. Rix nitej ri kaxlan-wey richin ninataj ri rukamik ri Jesús. Y wi keri', chuqa' man ruk'amon ta nitej ri xa xsuj yan chike itzel taq espíritu.

²² ¿Niwajo' rix richin niyek royowal ri Dios? ¿Kan yixtikir kami rix nipaba-iwi' chuwech rija' rik'in ri ibanobal?

Tiqabana' ronojel richin niqaya' ruq'ij-ruk'ojlen ri Dios

²³ Ek'o chiwe rix ri nikibij chi e totajineq chik, y roma ri' yetikir nikiben xabachike ri nikajo'. Kan qitzij wi. Jak'a man ronojel ta utz nuben chike ri qach'alal.

²⁴ Man k'a tiqaben xaxe ri niqa' chiqawech roj; xa nik'atzin chi tiqabana' ri utz nuben chike ch'aqa' chik.

²⁵ Ri ti'ij ri nik'ayix pa k'ayibel, utz niloq' y nitej. Jak'a man nik'atzin ta chi rix nik'utuj akuchi peteneq-wi, richin chi man niq'axo ri iwánima.

²⁶ Roma ri ruch'abel ri Dios*f13* nubij chi ronojel kan rik'in rija' peteneq-wi; richin k'a rija' re ruwach'ulew y ronojel ri yek'iy chuwech.

²⁷ Wi k'o ta jun wineq ri man ralk'ual ta ri Dios, ri yixroyoj richin jun wa'in, utz yixbe, wi niwajo'. Titija' ri nuya' chiwe, y man nik'atzin ta na chi nik'utuj wi sujun o man sujun ta chikiwech wachibel, richin chi man jun ri niq'axo ta ránima.

^28-29 Jak'a wi k'o ta jun ri nibin chiwe chi ri ti'ij ri niya'ox chiwe richin nitej xa sujun chik chikiwech wachibel, rix kan man k'a titej ri ti'ij ri', roma wi rix xtitej, xa xtiben chi niq'axo ri ránima ri xbin chiwe, y man roma ta chi niq'axo ri iwánima rix. Y rik'in juba' ek'o chiwe rix ri yech'obon y nikibij-qa pa taq kánima: ¿Kan roma kami ri ruch'obonik rija' yin k'o chi ninq'et-wi' chire ri k'o chi ninben?

³⁰ Wi yin kan ninmatioxij chire ri Dios ri ti'ij ri nintej, ¿achike k'a roma toq k'o ch'abel yebix chuwij roma ri nintej?, yecha-qa.

³¹ Roma ri' yin ninbij chiwe chi toq yixwa-yixuk'ya' o xabachike chik ri niben, kan tibana' k'a richin niya' ruq'ij-ruk'ojlen ri Dios.

³² Y man tiben chike ri winaqi' chi nikimalij kik'u'x y yetzaq; ni chike ri molaj qach'alal judío, ni ri molaj qach'alal aj-Grecia, y ni chike xabachike ri e ralk'ual chik ri Dios.

³³ Xa kan tibana' achi'el ri ninben yin. Yin man ninben ta xaxe ri niqa' chinuwech yin. Xa kan beneq-ruwech nintej nuq'ij richin chi ninben ri utz chikiwech konojel, roma janila e k'iy ri winaqi' ri yenwajo' yento' y keri' yekolotej ta.