John 2 - Sei di Uka Ago Ruaka di Buka Bedakai

Rema mena irakuna Cana ri

¹ Meda regodenu koina niyori, bi mena irakuna yokoi Cana, Galilee gaganiri. Ma Iesu ini nono ka mironari boyadi

² ma Iesu ini usi dina venesa ka mena irakunari omaradi.

³ Waini koina niyori, Iesu ini nono yaku ina rofu niyo, “Ina vene di waini bi koina niyo.”

⁴ Ma nikabai reyo, “Na rofu bi beika? Nai meda nemoko bi okina kode.”

⁵ Idu ini nono yaku naivo rededi vene rofu niyo, “Ya rofu beika nigo bi refa.”

⁶ Mironari bi fore dudu riyadi botoro koru tora tora 6 moi vataru reyadi; Jew vene yaku mina dudu moi ruaka rina vegu reyadi. Mina yokoi yokoi bi 75-115 litre kana.

⁷ Iesu yaku naivo naivo vene rofu niyo, “Botoro bi koru moi vata baefa.” Ma evade moi vata baeyadi.

⁸ Kamini ina vene rofu niyo, “Gua mamo be erausi resi irakuna ourefeidena amiye rofu moi bofa.” Makai resi moi boyadi.

⁹ Mina irakuna ourefeidena amiye yaku koru kero resi waini niyo mina irigasa goinari baeyo bi toto, idu koru erausi rena naivo rededi vene maka ina diba. Ye irakuna ourefeidena amiye yaku rema mego amiye raka nisi

¹⁰ niyo, “Amiye tau gade yaku waini burefe ouresi moi yakudedi ma okina vene yaku iri vau regedi mamo buni de waini magedi. Idu ya bi waini burefe moi gira rei baeyo gua mamo!”

¹¹ Mina bi ini ouresi mokena vegu, Cana Galilee gaganiri reyo; mironari ini vabara moi ogau riyo ma ini usi dina vene ina rofu mokena vari gira aeyadi.

¹² Mina usi ini nono ma ini dubuiyaka ma ini usi dina venesa Capernaum taoni bosi mironari meda be ameyadi.

Iesu yaku Sei nivakena yavari boyo

¹³ Jew vene di Ferei ebu rena irakuna meda bi negau niyori, Iesu bi Jerusalem ri boyo.

¹⁴ Kamini Sei nivakena yava ideri bi boromakau, mamoe ma pune erena sero rena vene ma fore senesi rena ameinu rededi vene baku reyo.

¹⁵ Buburu vai rena maena risi mamoe ma boromakausa Sei nivakena yavari umeki rei feidesi fore senesi rena vene di fore moi urafo resi ini teiboro moi evairo riyo.

¹⁶ Resi pune erena sero rena vene rofu yomakai niyo, “Minari moi etagae rifa; nai Baba di yava bi yi maketi sana ga rifa!”

¹⁷ Ini usi dina vene yaku burari riyo kana mokei tora reyadi, “Yi yava rofu mokei tora reida, bi nai uka meko ita kana vaido.”

¹⁸ Ye Jew vene nikaiteyadi, “Beika rebe una rofu oteimagiya ma diba nigifa ya vava nufa mina kana vegu reisa bi?”

¹⁹ Kamini nikabai reyo, “Mina Sei nivakena yava ukero vau regedi ma meda regoderi na dudusa akugida.”

²⁰ Ye niyadi, “Mina Sei nivakena yava bi lagani 46 moiyo mamo aku vau reyadi, idu ya yaku meda regoderi akugiya ba?”

²¹ Idu bi ini roaita rofu ago niyo.

²² Mina dada muyesi dadi rae reyori, ini usi dina vene yaku mina ago niyo mokei kero resi Sei di ago ma Iesu di ago rofu mokena vari gira aeyadi.

Iesu yaku amiye di uka mokena diba niyo

²³ Iesu bi Jerusalem ri Ferei ebu rena irakunari amegasa rebe bedakai reyori, amiye tau yaku mina mokena vegu vesi ina rofu mokena vari gira aeyadi.

²⁴ Idu Iesu ina kaya ini uka tau di mokena ina vene rofu de maro, adina bi mina amiye tau gade ini uka diba nisi

²⁵ amiye yokoi yaku amiye rofu nioteimagi bi baku rena de, adina amiye di uka mokena bi sena veifateyo.