Hebrew vene 13 - Sei di Uka Ago Ruaka di Buka Bedakai

Gokai Sei di uka moi ada regi

¹ Usika ourena toga ya kaya ya kaya uka mabifo.

² Idana vene toga gaba refa, adina makai dudu bedakai yaku Sei di naivo naivo vima toto dudu moi dui reyadi.

³ Dibura yavari amededi venesa ya diburari amena kana makai mokefa. Resi vegu no ina rofu rededi vene ka mokefa, ya ka mina roaita ideri dada.

⁴ Amiye tau noibanu yaku mena vegu emagui rebi; ma rema maruka di ekama moi kino ga reyaganedi, ini adina Sei yaku mena de vene ma mena vene koa regediri moi kota aego.

⁵ Yi vegu amena fore uka mana moi gaima risi beika yasa amedo mina rofu maka yi uka bi ada rebiyagane, adina yomakai niyo, “Na toga de iniye ya feresi ya ferei tavoi de regida.”

⁶ Ye mokena buni dudu nigifa: “Varika amiye bi nai aedena amiye; na bi ori de regida. Amiye yokoi bi na rofu beika rego?”

⁷ Yi ourefeidena vene, kaere Sei di ago ya rofu ago nigamadi, mina mokefa. Ini gokai vegu moi raga resi muyeyadi rofu, mokei mona resi ini mokena vari gira aena dudu reyadi, mina ida yokoi maka dudu makai rebifa.

⁸ Iesu Keriso bi agiya, gua ma toga toga idana de nido.

⁹ Deda oteimana ago idana rofu ya moi ourefeidegi usi ga difa, adina buni tora gade dudu, uka meko moi gira rigi bi buni; diya iruku be irina ago gira dudu, adina gabireri raga rededi vene bi ina rofu buni yokoi baku de reyadi.

¹⁰ Una bi uni ori sisika rena fore fata nufa ma karagari naivo naivo reyadi vene ina fafauri bi iruku irigedi di vava nufa de.

¹¹ Adina Sei ma amiye utari naivo amiye tora yaku vegu no di ori sisika regi vibani di dava sana kikifa iniye ideri, moi baeyo ma amiye amegamadi sanari etofarori, ini roaita ori kamu regamadi.

¹² Ye Iesu ka ini dava dudu, amiye moi kikifa regika, bi taoni di biri etofarori esika esika moiyo.

¹³ Mina dada, ina rofu amiye amededi sana etofarori disi maena ina yaku are rei gira reyo, mina ka moibinadi.

¹⁴ Adina minari uni taoni toga toga ameibobigo koina, idu mina taoni baego maina resifa.

¹⁵ Ye ina dudu ori sisika rena kana, toga toga Sei nivakenadi; mina bi ini roka niogau regi ago mini.

¹⁶ Vegu buni resi ya beika nufa rau regika, mina ga vei feidefa, ini adina ori sisika makai kana redediri, bi Sei di uka moi ada redo.

¹⁷ Yi ourefeidena vene di ago neidesi ini vava gabireri raga rebifa, adina ini vegu rededi ago maraganedi dada, yi vima fafau nari rededi. Ada dudu ini moimai aedefa, diya ago tau dudu, ini adina makai ini buni yokoi de ya mago.

¹⁸ Una rofu usa usa nifa, adina una una diba una bi uka di mokena buni nufa, ma vegu tau regika kikifa dudu ura resifa.

¹⁹ Ya mina regika niguba rei mona reida, ye evade maka na bi yasa moi dairiyainedi.

Usa usa nina metona ago

²⁰ Ye gua uka amuta Sei bi uni Varika amiye Iesu muyenari dudusa edadi rae reyo, kaere bi mamoe dogo redo amiye tora. Ye toga toga ameibobina uka ago di dava dudu,

²¹ ini ura rena reyaine, beika baika buni tau ya mago. Resi ka moimai ini nemokori bi ini uka moi ada rededi, bi mina uni uka ideri ka rego, Iesu Keriso dudu, kaere bi toga toga vabara maraine! Rama.

Metona ago

²² Usika ourena, nai egira regika ago toro dudu neidegi ya niguba reida, ini adina nai bura reyaka bi doba de.

²³ Uni dubuini Timothy dibura yavari erufuyo dada, mina diba niyaganedi ya nida; evade okigo vonisi, bi inasa ya vegifa.

²⁴ Yi ourefeidena vene tau noibanu ma Sei di vene tau noibanu yuata nifa. Italy vene ya yuata nina ago moi feidededi.

²⁵ Sei di buni tora gade bi ya tau vakoisa ameyaine.