Yal Wơl 8 - Sră Goh 2018

Bañ hŭi Yàng Jehôwa

¹ Kơrhia tĕ lơh jat kòp jơnau gơnoar sồr mơ añ ai bol mê in tòm ngai do, tồ bol mê geh kis, geh bơtơl oă mơ rgơi mut dòp geh lơgar mơ Yàng Jehôwa neh srat să mơ ală ồng pàng bol mê dê ai bol mê in.

² Kah tĕ mbe Jehôwa Yàng Tom Trồ bol mê dê neh tề lam bol mê tòm jơh gùng dà tòm ƀlàng ngềt ngơt tòm poan jơt nam neh rlau, nàng tơnliah să bol mê, lòng bol mê nàng git ñchi bơta neh gơs tòm nùs bol mê dê, sền bol mê rơp prap gàr ală jơnau gơnoar sồr Kơnràñ dê hala ò.

³ Kơnràñ tơnliah bol mê, lơh bol mê in kong jơgloh lồc behơ̆ siam bol mê mơ mana mơ bol mê hala ồng pàng bol mê dê kung òhềt tŭ lơi git, nàng bơto bol mê in git lah kòn mơnus ò di kis bơh piang lă lơm ò, mơya bơh kòp jơnau neh đơs bơh bơr Yàng Jehôwa dê.

⁴ Ală ồi ào bol mê dê ò gŏ klar sèt mơ jơng bol mê dê ò as tòm pah tŭ tơngai poan jơt nam hơ̆.

⁵ Gen git tĕ tòm nùs bol mê dê lah, kung be dô nă cau lơh glài tơmàl kòn khai dê gen Jehôwa Yàng Tom Trồ bol mê dê kung lơh glài tơmàl bol mê behơ̆ sơl.

⁶ Gen tàng, prap gàr lơh jat ală jơnau gơnoar sồr Jehôwa Yàng Tom Trồ bol mê dê, lòt tĕ tòm ală gùng dà Kơnràñ dê mơ duh rngòt di Kơnràñ.

⁷ Bơh Jehôwa Yàng Tom Trồ bol mê dê gam cèng bol mê mut tòm dô nơm lơgar niam, dô nơm lơgar gơs ală croh dà mơ ală tơrlung dà, gơs ală dà croh gơhòr tòm ală thòng mơ ală mơnơm dềt,

⁸ dô nơm lơgar gơs kòi mi mơ kòi brà, tòm ño mơ tòm chi ƀal, plai lừu, mơñà ôlibe mơ dà lơwe,

⁹ dô nơm lơgar mơ piang lă, lơgar hơ̆ mê rơp sa piang lă wil tơl, ò siơ̆u dô bơta lơi. Lŭ lơgar hơ̆ dê la lòs, bol mê rơp tă kòng bơh mơnơm.

¹⁰ Behơ̆, bol mê rơp sa hòm lai, mơ jòng ro Jehôwa Yàng Tom Trồ bol mê dê. Tài bơh lơgar hàng mơnĕ mơ Kơnràñ neh ai bol mê in.

¹¹ Kơrhia tĕ nàng bol mê ò hŭi Jehôwa Yàng Tom Trồ bol mê dê mơ prap gàr lơh jat ală jơnau gơnoar sồr Kơnràñ dê, ală bơta boh lam Kơnràñ dê mơ ală bơta lơh nền Kơnràñ dê mơ añ ai bol mê in tòm ngai do.

¹² Gơsơlơ̆u wơl, tòm tŭ bol mê sa mơ geh hòm lai, tòm tŭ bol mê bơt bơtào ală hìu niam mơ ơm lơngai,

¹³ mơ tòm tŭ ală mpồl kơnrồ mơ belàt bol mê dê gơlik gơs dờng, màh priă bol mê dê gơbơtơl lìu làc, mơ jơh ală phan bol mê gơlik gơs oă,

¹⁴ gen nùs bol mê dê gơlik pơnhừ să mơ bol mê rơp lòi hŭi Jehôwa Yàng Tom Trồ bol mê dê la Bơtau neh cèng bol mê lik bơh di Ejiptơ, bơh di lơgar ơm dĭ.

¹⁵ Kơnràñ neh tề lam bol mê lòt gan ƀlàng ngềt ngơt cù kìr ngan, ù tiah tơhìr dà mơ ro rañ hơ̆, gơs ală bơs bih khih mơ diang. Kơnràñ neh lơh dà gơcat bơh di pơnai lŭ kră bol mê in hùc.

¹⁶ Kơnràñ neh ai bol mê in mana nàng sa tòm ƀlàng ngềt ngơt, hơ̆ la phan sa mơ ală ồng pàng bol mê dê òhềt git, nàng tơnliah bol mê, mơ lòng bol mê tồ tus di lồi dut gơ rgơi gơlik gơs niam bol mê in.

¹⁷ Bañ đơs is lah: “Gơnap gơnoar añ jê mơ bơta pràn kơldang ală tê añ jê neh lơh gơs añ in ală phan mơna do.”

¹⁸ Mơya kah tĕ Jehôwa Yàng Tom Trồ bol mê dê, bơh hơ̆ Kơnràñ la Bơtau ai bol mê in bơta chài rgơi nàng lơh gơlik phan mơna, mơ behơ̆ Kơnràñ lơh nền bơta ho bal Kơnràñ dê mơ Kơnràñ neh srat să ho nền mơ ală ồng pàng bol mê dê be neh gơs tòm ngai do.

¹⁹ Dilah tŭ lơi bol mê lòi hŭi Jehôwa Yàng Tom Trồ bol mê dê mơ lòt jat ală yàng ndai, duh khoai mơ tơmbic să di đap bol gơ, añ yal tơnggit kràñ cê mơ bol mê tòm ngai do lah bol mê ngan rơp kong tơnroh.

²⁰ Kung be ală làng bol neh kong Yàng Jehôwa tơnroh di đap bol mê gen bol mê kung rơp kong tơnroh behơ̆ sơl bơh ò dòn bơr Jehôwa Yàng Tom Trồ bol mê dê.